Muisca abdigalda

Muisca abdigalda tiyir soka lospasa va Muisca saneikeem koe istefo tawavo ke refe Kolombia sokasane abdi espanafa olgalicura. Balemoyi abdigaldaki tiyid : Muyquytá Zipazgo cosxo is Hunza Zacazgo cosxo is Iraca tumtaxo is Tundama tumtaxo voxis konako mivvexaxo. Xanta Mali lekeugal, Muisca va yerumara wali staba ksubeyed numen sina kadayad vangluyara ke yona doda. Ison vuwafa waldura gu vindara wal amidafa doda iku banafa fiste zo divatceyer, isen dofa vegedusa lagara dum lavakiraf bolk ta midura va ontinafa taya, isen sayakafa tanara ta likera va volnafa mikra dum Panche is Muzo, va lomantafa vangluyara tuadrayar. Bata kotcoba di tiyir tazukafa riga ke abdigalda. Lopof andik ta ardil is targuca is gaderopafi is skapafi roti va sint likeyed ise va sintafa doda lalevbenpluyud. Bata koboda va geja daskiyid. Voxen cenen okilik va gadera va staba is doda me mbi deswayad nume grustara ke dodeem is stabeem zo nendoyeyed. Opelon cenesik va intafa ardilafa tirka laumasiyir numaze va vamoefa gorara ronovaskiyir ise va kiewega loote mbi kserayar. Zipazgo cosxo moni 1450 awiyir, gadenon gan Saguamachica gejayasa va Panche mikra, aze kali 1541 lapteyer viele espanafa olgalicura va istexo ke refa Kolombia ceneson tenukeyer. Cosxo ke Muisca abdigalda va kipi ke ontinafa gola ke Ronefa Rodega koe Kolombia modivatceyer, koe refa Cundinamarca winka isu Boyacá isu Santander. Koe Cundinamarca, xopo tiyid azekexa ke Bogotá is Ubaté is Pacho krant isu Fusagasugá isu Tenza isu Cáqueza ; koe Boyacá : Tunja is Moniquirá is Chiquinquirá is Duitama is Villa de Leyva is Sogamoso ; vagee Santander : wale Suárez kuksa isu Chicamocha. Grustara Muisca abdigalda vas cosxo vas mon 47 000 km² ruldayar, valentu Chicamocha gola vage Páramo de Sumapaz gee Bogotá, is vataltu Vélez is Zipacón varon datca ke Ronefa Rodega tite azeka ke Meta golapa. Sanelia ke cosxo tiyir vas mon 1200000 irubasik ba artlakira ke espanik. Vuwafa gluya wal Bacatá wida isu Chiá isu Tunja isu Ramiriquí isu Duitama isu Tobasía kruldeyed. Dalafa niedara tiyir gruidera va dodeem kan sayakaf mergil koe tulon Zipazgo gola voxisen bancoba nope alkafa lazava koe Zacazgo gola loeke nutiyir, beka adrafa tanara ta kobara ik kazara is ugalorafa vangluyara tod geja va abdigaldafa grustara ke Muisca sane ape yordayad. Nafalik felis va lano tawavo va mivaskafa bowere ke dilaf okilik ( psihipquá ) tarkayar ise va dodaxo ke uta doda dunuyur voxe vanpiyir an sayakaf dirgasik is dalaf dadisik va tamsa jwa tisa birtaf bolk dem dodaf is olkikaf culiek. Moaykane dre dem nafalik is dalafa doda do aryona dilafa fliyir, dem okilaf ardil. Zybyn staba tiyid gadikyoxilafa staba gadena gan zybyntyba redakik. Fli va gadikyefa oxila ( bas gadikye pu nazbeikye ) vols tela gadikyafa ( trabe berikyafe nutikye ke nafalikye ) me konoleyer. Kota doda gan intaf okilik zo gadeyer ise va zolonafa mivvexuca dene abdigalda dadiyir. Psihipquá okilik kare ardil va karnizxo amidafo gu tokoda is duga digiyid. Valey intafa meunaykafa vreda, gu ingaxa is roga is blucte dere zo solwiyid. Zipa okilapik va loa karnizxo don yono koe sumefo xo digiyir. Karnizxo tiyid avak ke seltaf skedareem is sanegafa blira ; manlize alkafa firvira isu miga is jora dilizeyed, bildera va warzeks pu okilik zo askiyid, kobara zo gorayad, gaderopafi roti zo keyakseyer isen geja zo egayar. Valey pona dem berafa staba is gundafa araya is dofa ava, abdigalda va dofa rojura kev divef volnik dum Panche saneik dure lyuman ravaldayar. Batdume güecha Muisca gejik vas an okilik ( Zipa ok Zaque ) rontion rupteyed. Gaderopafe tadle ke cosxo Muisca balumaks va lan mepilkomodan Zipa nafalik, re viden dene Tcila ke Moava koe Bogotá. Kipi ke Muisca cosxo isu sanelia ton toloya gaderopafa tanta zo grustayar : Zipazgo dem Zipa nafalik is Zacazgo dem Zaque nafalik. Toloy nafalik nope mikrafa is arayafa beruca gaderopon is kazon paskalepeyed voxe soe ta stujera va cosxo dun gukevlayad. Kota Muisca abdigalda ton stabeem zo grustayar, i ton staba yoltkirafa gu zybyn ke Muisca ava. Kota zypyn staba gan okilik yoltkiraf gu zybyntyba zo gadeyer, isen dene staba valevefa vwa tiyir tela ke teca utca vadjesa vas tanoya ok konaka wida is bowena gan utatiba okilik. Tulon bowesik ke Zipazgo tiyir Zipa ; zybyn staba dum Guatavita gan Zybyntyba zo gadeyer ; valeveon uta utca dum tulon Sesquilé gan Utatiba zo dirgayar. Bana vexala va ardilafe tadle ke cosxo ke Muisca abdigalda : Zipazgo ok Zacazgo : ana vwa, bowena gan Zipa ok Zaque. Zybyn : mialukafa cosafa ema, bowena gan Zybyntyba. Uta : taneafa ema, ton wida, gadena gan Utatiba. Zipazgo Muisca sane va ontinafa azekexa ke refa Cundinamarca winka isu Boyacá iste patecta poktalte Ronefa Rodega kereleyer, leve bowera ke Zipa ke Bacatá ( Bogotá ). Remi espanafa felira, cuga wida tiyisa ke Zipazgo va Santafé de Bogotá tadleyed, vaxe vema ke Chiquinquirá isu Saboyá koplekuyuna gu winka ke Tunja. Espanaf ulgaldusik ke Granada Ikagazaxo seylon ruyecked da gaderopafi roti ke Zipa tiyir gifafi lodam teli ke Zaque. Lucas Fernández de Piedrahíta munester da taneaf Zaque gazik tuke Iraca ke Suamox va int al korotiyir, solve Zipa ton sayakafa felira askyid. Nafalaxo ke Zipazgo Zybyn stabaxo Uta utca Bacatá Bacatá, Chía, Funza, Engativá, Fontibón, Facatativá, Tenjo, Subachoque, Tabio, Cota, Cajicá, Cogua, Zipaquirá, Nemocón, Bosa, Zipacón, Soacha. Guatavita Guatavita, Sesquilé, Guasca, Sopó, Usaquén, Tuna, Suba, Teusacá, Gachetá, Chocontá, Suesca. Ubaque Ubaque, Choachí, Chipaque, Cáqueza, Usme. Ubaté Ubaté, Cucunubá, Simijaca, Susa. Fusagasugá Fusagasugá, Pasca, Tibacuy. Zacazgo Refa Lenguazaque dota isu Villapinzón tiyid ke nafalaxo ke Zacazgo. Guachetá luxeon ape tiyir ke Zacazgo voxe rotir meruptesa. Nafalaxo ke Zacazgo Zybyn stabaxo Uta wida Hunza Hunza, Ramiriquí, Tibaná, Guachetá, Icabuco, Machetá, Moniquirá, Motavita, Tuta, Samacá, Sotaquirá, Lenguazaque, Turmequé. Tenasuca Tenasuca, Tenza, Garagoa, Sutatenza, Somondoco, Soratá, Tibirita. Saquencipá Saquencipá, Ráquira, Sutamarchán, Sachica, Sora, Cucaita, Chíquiza. Tumtafo stabaxo Valey toloya dalafa gaderopafa tanta ( Zipazgo is Zacazgo ), ugaldusik va kruldera ke toloyo tumtafo stabaxo miwad : Iraca stabaxo ( tigiso koe Suamox re tis Sogamoso ) dem okilik yoltkiraf gu Iraca is bevulas direik ke Bochica mokrik ( dere yoltkiraf gu Nemterequeteba ), is Tundama stabaxo ( tigiso koe refa Duitama ). Iraca korobutik belcon tiyir gaderopaf is sayakaf okilik is gertik ke Awalt dopewa is diwapik dis va roti ta stujera va saz is fraskera va akola. Gan okilik ke Pesca isu Busbanzá isu Gámeza isu Toca zo sollibuyur voxisen tod miltuca ok mulos, okilik ke Tundama dere brudayar. Tumtafo stabaxo Zybyn stabaxo Uta wida Iraca tumtafo stabaxo Sogamoso, Bombaza, Busbanzá, Pesca, Pisba, Tópaga, Toca. Tundama tumtafo stabaxo Duitama, Tobasía, Paipa, Cerinza, Ocavita, Onzaga, Soatá, Sativa. Mivvexaxo Konako Muisca mikrafo stabaxo bevulayad mivvexafo ok merupteso nume me tiyid dem pilkovaf okilik : Mivvexaxo Zybyn mikrastabaxo Uta wida Saboyá Saboyá, Chevre, Tisquizoque, Irobá, Mópora, Casatoca Chipatá Chipatá, Ubaza, Guavatá, Güepsa, Inzaque Agatá, Cocomé Sorocotá Tinjacá, Sorocotá, Moniquirá, Guatocá, Gachantivá, Pavachoque, Suta Charalá Tacasquirá Ostik, toloya ara abdigalda ke Chibcha veysane tiyid merupteso va Muisca bolk : Guanentá ke Guane mikra is El Cocuy ke Tunebo. Seltaf ardil Konaka ingaxa ke Muisca nafalik, re videna dene Tcila ke Moava koe Bogotá. Muisca saneik va karuca ke fortey karolapayad, batdume oluafa yasa xelkayad da gu meoluik va sint meviele belcekayad, mei gu mikrik ke sane ke idulaf siday torigin gu bartik is valevik. Dene kota Muisca yasa, gadikyoxilaf bolk zo rewayar isen Zipa nafalik va warzaf Zaque okilik voltod orpaf konolenik kofliyir, voxis va jadiwik ke Güecha gejikeem. Dene Muisca ava ( Muysccubun ava ), jontik ravlem dasugdas va ardilaf ekeem krulded : Zipa ok Zaque : Nafalik ke Zipazgo ok Zacazgo. Psihipqua : Sersik ok okilapik. Uzaque : Karaf oluik dadis va jiomafi rotipi is sayakafa gijarotiuca. Zibyntyba : Bowesik va zybyn staba, stabokilik. Utatiba : Bowesik va uta utca, utcokilik. Chyquy : Muisa gertik, diwapik. Pabahue : Feliik is jiomaik. Uaia : Oluikya is weltikya. Paba : Rictulikye. Hue : Jiomaik ok okilik. Güecha : Gejik. Cupqua : Vonkik. Ubata : Aptaf vuidanik. Tyuquyne : Staksakirik. Chuta : Zanisik. Bospquaoa : Kwik. Izva ► Pasca meld ► Chocontá meld ► Tocarema meld ► Espanafa olgalicura va Muisca Muisca bowesik ► Muisca bowesik Muisca ankit tir alkafa moavaxa kaatoesa va El Dorado fipta dilizesa moe tumtafa uzda ke Guatavita. Bata olkotca dene Tcila ke Moava koe Bogotá re zo vider, ise tir tana leca ke Kolombia is arayafa pilkoma ke kolombiikeem. Zipa nafalik ke Bacatá: Zipa nafalik Nafalugal Ewava Meicuchuca ≈ 1450-1470 Saguamanchica 1470-1490 Nemequene 1490-1514 Tisquesusa 1514-1538 Zaquesazipa 1538-1539 Zaque nafalik ke Hunza: Zaque nafalik Nafalugal Ewava Hunzahúa abdi 1470 Michuá 1470-1490 Quemuenchatocha 1490-1537 Aquiminzaque 1537-1540 Sanelia Irubasikafa ota ruldasa vas Muisca abdigalda tir megrupena kiren meka otularacka krulder, dum icde varafa tadava. Baroya sazdara va abdiespanafa Muisca sanelia zo askid : Omafa sazda : sedme patavara ke Rosemblat, Muisca sanelia tiyir vas 300 000 ik 500 000 olkik. Bata patavara gelkeon zo naleyed voxe re zo malyopayad. Mialukafa sazda : bata sazda tir patavaks ke konak kolombiaf izvopik krafias da direfa ota tiyir lodaxafa. Sedme sin, Muisca sanelia tiyir vas 800 000 ik 1 200 000 olkik, voxen espanafa tolgenira gu vwa vas 650 000 kastayar. Ontinafa sazda : lonoeltafa sazdara tcilkana gan konak aptacik va ota vas 2.38 ik 3 celemoy olkik gunester, voxen bata sanelia va vwa vas 1.5 celemoy co titfiyir. Dere rupec ► Izva ke Kolombia

Muisca abdigalda Zipazgo, Zacazgo (es) GIVACKA Debala Geefa Amerika, Kolombia Kruldera 800 – 1540 Vertuma Abdigalda Kelu Hunza, Suamox, Bacata Ava Muisca ( Chibcha ) BIFA ► 800 : Tadlera va abdigalda ► 1537 : Espanafa olgalicura NAFALIK Konak Zipa ok Zaque : Meicuchuca Saguamanchica Nemequene Tisquesusa Quemuenchatocha betara teza   Tuveli icde Izvopa