Chiminigagua

Chiminigagua ( okon gu Chimichagua ) tiyir an lorik ke Muisca alka isu vundopa, i kotrotif lorik reduyus va tamava. Pimtara Chiminigagua tiyir vonaf tamef lorik ise sotiyir antafi afi kruldesi viele miel duyur. Viele tamava zo reduyur pune mielak anton tiyir numen antafi afi gan Chiminigagua zo getcayar. Viele ina va zilira va afi pu tame gorayar, pune va gulaf jivot fenkuyur lizu ini draydeyer. Azon ini va toloyi batakafi zveri reduyur aze ko dark vankabuyur. Zveri va afi kou oral anamgimayar. Chiminigagua va zolonuca ke inyon lorapik nediyir : Chía ( Tael ) is Sué ( Awalt ) is Cuchavira ( Korfi ). Redura va Awalt is Tael va Bachué xantumafa lorikya kiyir. Dalafo tumtaxo koe abdiespanafa Kolombia koe Sugamuxi is Guatavita is Bogotá is Guachetá tigiyid. Zaque Goranchacha va dopewa koe Hunza vegeduyur azen sane va oblakeem ke Zaque ( Cojines del zaque ) aykayar, i va toloya ivamufa raporka. Kotvielon moi ticawaltara, Zaque nafalik is yon gertik isu patectolik kabelcayad ise blikeyed enide awalt ronuon wan ticfir. Batcoba va roti pu kocopikeem tove tawadayikeem bak visikorcek kristeyer. Nafalik ke Muisca mo oblakeem badenyayar isen sane blikeyer ise dankayar ise stuteyer. Yontode fipta dem wetara va ayik dilizeyed viele takra ke santoldik gu alto zo soltiolteyer aze pu tumtaf awalt zo firviyir. Sugamuxi gu baerdaf wid zo torigiyir ise wetce Wid ke Awalt kumziliyin gan Bochica zo grupeyer. Sonteteson va Chiminigagua, befoltik to banliz katanayad. Viele espanaf olgalicusik stan gan Gonzalo Jiménez de Quesada va Muisca gola artlakiyid, pune va moava ke Eldorado vundaxo kaaneyayad. Va baerdafa Awalt dopewa firdeyed nume va tan lobuneyen alkaf grabom ke Muisca seltay vilayad. Awalt dopewa dene rawopafa tcila ke Sogamoso noelton zo malvegeduyur. An lorik ke Muisca tiyir yalestafa altoiskafa lorinda gazasa va lorikeem. Wori kan dilaf lorik ( Sué lorik va awalt ok Chía lorik va tael ok Chaquén lorik va boduca ) zo gisiskeyer, voxe meviele rontion. Staksakiraf lorik ke Chiminigagua tiyir Bochica. Viele espanik va Muisca gola artlakiyid, pune ton nazbeik ke Awalt zo pimtayad. Vuestexa (es) Ocampo López, Javier. 2013. Mitos y leyendas indígenas de Colombia - Indigenous myths and legends of Colombia. Plaza & Janes Editores Colombia S.A.. (es) Ocampo López, Javier. 2007. Grandes culturas indígenas de América - Great indigenous cultures of the Americas, 1–238. Plaza & Janes Editores Colombia S.A..

Chiminigagua Lorikye ke Muisca Kira Lizukaf yolt Chimichagua Yorda An lorik Atay Gola Muisca Atayexo Sugamuxi, Guatavita Lorafa yasa Nazbeik Sué, lorikye va awalt Chía, lorikya va tael betara teza