Aller au contenu

Chocontá meld

Teliz mal Wikipedia.

Chocontá meldChocont Saba ton Muisca ava ) tiyir abdiespanafa geja dilizeyesa bak 1490 koe Chocontá wida ( koe re Cundinamarca winka ke Kolombia ). Kevusa neya tiyid teli toloyi gaderopafi kipi ke Muisca abdigalda : ervolia ke Zipazgo gadena gan Zipa Saguamanchica kev tela ke Zacazgo dirgana gan Zaque Michuá.

Orka[betara | va krent betá]

Zovdaks va Saguamanchica koe Historia General de las Conquistas del Nuevo Reino de Granada neva (1688) ke Lucas Fernández de Piedrahíta
Zaque Michuá, nafalik ke Hunza

Saguamanchica bak 1470 kouskejayar aze wayason va Pasca meld, va levrotino cosxo ke Sutagao sane ( okon Fusagasugá ) kadimion tunotrayar ise culiekayar. Voxen dili koe Zipazgo slamayar kiren bak 1474 arti balemda zybyntyba sersik ke Guatavita va rictula ke Zipa tcumiveyer.

Guatavita is Funza icde felira va Zipazgo dun mijeyed numen bata tcumivera me tiyir warzaca. Sersik ke Guatavita va Saguamanchica tolon dilfuyur voxe kotviele zo surteyer. Bam gorayar da va nendara ke Zaque Michuá yaneyer kiren Zaque nafalik va rictula tove Zipa rietovon dadiyir larde Zaque Hunzahuá va varafo cosxo ke Muisca abdigalda jokeon al tutanayar. Kazawayase va temotara ke zybyntyba gadesik ke Guatavita, Michuá va vuidanik ko Funza kelu ke Zipa stakseyer, benplekuson da Saguamanchica ko Hunza kelu ke Zacazgo vengatason waroldon di laniyir. Bata debala tiyir evartaca mu Michuá kiren batkane Zaque nafalik va varafo Muisca cosxo gire rokostujeyer.

Wori Saguamanchica va staksa ke Zaque nuleyer ise va vuidanik askipejeyer. Bagenon Michuá va ervolia dem 40 000 güecha gejik kabelceyer aze va jowa ke Zipazgo vanlaniyir. Pokoleyer da Zipa co fu ixedayar ise va intafa rictula co malnaleyer voxen Saguamanchica volson molikeyer. Pomanon gan utatiba okilik ke Sopó, va ervolia gijafa loon dam tela ke Zaque silukon kabelceyer aze va kevelik kevlaniyir. Voxen ute doaliera, Zaque va dimlanira ke intaf milk ko Hunza benplekuyur. Bata wotrafa gorara ke Michuá zo balgeyer. Saguamanchica katectayar nume va Ubaque staba di esteyer kiren bana levi dilizetes meld gu Zaque va int al djuvangluyayar.[1]

Kaikion remi santevda, Saguamanchica ton lyumara va Panche saneik zo kereleyer, i va gubef volnik ke Muisca dure tolgenis va jowafa utca ke Zipacón is Tena. Va zybyntyba sersik ke Guatavita kostujeyes va Chía utca isu Cajicá dere tumialodayar.[2]

Tenulera[betara | va krent betá]

Arti ervokirafi dili remi santevda, bak 1490 Saguamanchica va kolyumara va Zaque gin xialayar. Va Sopó vanlaniyir lize va ervolia vas 50 000 güecha gejik kabelcer. Battode Guatavita me vezuyur. Miledje Michuá do 60 000 ayik egadayar aze va kevelik kevlaniyir.[3]

Toloya ervolia koe tawek ke Chocontá tere kevlaniyid. Milk ke Zaque va wida taneon artlaniyir numaze va int rotildeyer ise voltayar. Meld remi baroy bartiv slayar ise tiyir forteyotarsaf. Tere milk ke Zipazgo moceneyer voxen okilik ke kota neya zo aytayad.[4]

Vuestexa[betara | va krent betá]

  1. (es) Acosta, Joaquín. Compendio histórico del descubrimiento y colonización de la Nueva Granada. (París, 1848; Imprenta de Beau), bu 190.
  2. (es) Fernández de Piedrahita, Lucas. Historia general de las conquistas del Nuevo Reino de Granada (Antwerpen, 1688), Parte I, Libro II, Capítulo II, bu 32
  3. (es) José Antonio de Plaza. Compendio de la historia de la Nueva Granada desde antes de su descubrimiento hasta el 17 de noviembre de 1831. Bogotá: Imp. del Neogranadino, 1850. bu 6.
  4. (es) Herrera Angel, Martha. Los señores muiscas (Revista Credencial Historia, n° 44, Bogotá, 1993)

Chocontá meld
Chocontá meld sedme zovdaks ke piskuks va Izvapa ke tolgenira va Granada Warzafo Gazaxo ke Lucas Fernández de Piedrahíta ( Antwerpen, 1688 )
Givacka
Evla 1490
Tigixo   Chocontá, Cundinamarca, Kolombia
Danexa Cenera ke Zipazgo
Neya
Zipazgo     /     Zacazgo
Dirgasik
Saguamanchica     /     Michuá
Ervoliapo
50 000 gejik     /     60 000 gejik
Kosikeem
?     /     ?
betara teza
  Tuveli icde Izvopa 
Muisca : sane ke Kolombia is savsaf abdiespanaf seltay
Seltay

TawamiduraVegeduropaYambaKocopaBurmotaropaSkapaInseikLexaAvaVundopaAlkaGeja

Debak

FúqueneGuatavitaIguaqueSuescaTotaTequendama stoya

Izva

Muisca abdigaldaSavsaf bowesikPasca meldChocontá meldTocarema meldEspanafa olgalicura

Nafalik

Zipazgo : MeicuchucaSaguamanchicaNemequeneTisquesusaZaquesazipa
Zacazgo : HunzahúaMichuáQuemuenchatochaAquiminzaque

Lorik

ChiminigaguaBachuéChíaSuéBochicaHuitacaChibchacumCuchaviraNencatacoaChaquénChibafruimeGuahaioque