Michuá

Teliz mal Wikipedia.
Liwot va Muisca abdigalda abdi espanafa olgalicura

Michuá ( okon gu Minchua ok Michica ) tiyir toleaf Zaque nafalik ke Hunza ( Tunja ) boweyes va Zacazgo cosxo ( lentefi ki ke Muisca abdigalda koe refe Kolombia sokasane ) wali 1470 is 1490. Tiyir nutikye is dareik ke Hunzahúa. Inaf direik di tiyir Quemuenchatocha nutikye.

Michuá tiyir milugalafa gu Zipa Saguamanchica nafalik ke Zipazgo cosxo tiso geefi ki ke Muisca abdigalda.

Koe Historia general de las conquistas del Nuevo Reino de Granada suteks ke Lucas Fernández de Piedrahíta ugaldik bak 1668 taneatomon zo miwar.

Taneafa ralentara gu Saguamanchica[betara | va krent betá]

Viele Zipa Saguamanchica va vema ke Fusagasugá is cosxoki ke Sutagao levrotison olgalicuyur, pune okilik ke Guatavita gan wafivuca ke Zipa djufelisa va vegungikeem zo fobageyer. Guatavita va skedara va Bacatá bam joayar ise va Michuá nafalik ke Hunza pomadayar.

Michuá va pomadara ke Guatavita kuvon dulzayar. Numaze va dobulik den Saguamanchica stakseyer enide bantan kabdu inaf erkey va int di gonatoer ise va temera ke Guatavita di dulzoeyer. Saguamanchica va staksa ke Zaque balgeyer ise va dobulik askipejeyer.

Numen Zaque va ervolia dem 40 000 güecha gejik kabelceyer. Van jowa ke Zipazgo abdulaniyir voxe zo givayar da milk ke Sopó tiso alokaf volnik ke Zacazgo, va ervolia ke Zipa al vangluyayar. Kivason da intafo po co tiyir axarsafo ta wara va meld, bam denon dimavlayar. Inafa sposuca zo vanolapayar isen tirka ke Saguamanchica zo tugodjayar.

Spuesi dili do Zipazgo[betara | va krent betá]

Saguamanchica va faylura ke Michuá impavantayar, esteson va Ubaque relmeyese is kazokevese va Zaque, is tolgenison az vilason va Pasca is Une. Voxen likera koe Zipazgo va Saguamanchica kevzaniyid kiren Panche cosik va debala impavantayad, tolgenison va Zipacón is Tena, isen miledje Guatavita ta vangira va Chía is Cajicá va milk tixayar. Pirdanon gan eldik, Saguamanchica va intafa ervolia fuxetolayar, ton bati ki gokevgisi va getaltufa dilfura ke Panche is bani golikesi va lenton Guatavita. Santevda tiyir adrafa ta diliara va varafo Zipazgo. Banvielu Zipa va ralentara va Michuá gin trakuyur.[1]

Chocontá meld[betara | va krent betá]

Chocontá meld

Chocontá meld sedme zovdaks ke piskuks va Izvapa ke tolgenira va Granada Warzafo Gazaxo ke Lucas Fernández de Piedrahíta ( Antwerpen, 1688 )

Michuá givayana gu avlara ke Saguamanchica kev int, va tev-kunoy güecha gejik kabelceyer aze va kevelik molikeyer.[2] Toloya ervolia moe tawek ke Chocontá tere kevlaniyid. Milk ke Zaque taneon artlaniyir aze va int tildeyer ise voltayar. Meld remi baroy bartiv jijayar ise tiyir forteyotapafa. Milk ke Zipazgo wayar beka nafalik ke kota neya zo aytayad, don Saguamanchica cenesa.[3]

Xonukera az radimifira mo uskej[betara | va krent betá]

Dum Saguamanchica, Michuá moe meldxo ke Chocontá xonukeyer. Zanisik va alto ko Hunza malbureyed. Darpe Muisca orpa, Quemuenchatocha nutikye klaafe gu sanlerdda mo uskej ke Zacazgo va ina radimifiyir.

Vuestexa[betara | va krent betá]

  1. (es) Fernández de Piedrahíta, 1688, bu 32.
  2. (es) José Antonio de Plaza. Compendio de la historia de la Nueva Granada desde antes de su descubrimiento hasta el 17 de noviembre de 1831. Bogotá: Imp. del Neogranadino, 1850. bu 6
  3. (es) Herrera Angel, Martha. "Los señores muiscas" (Revista Credencial Historia, n° 44, Bogotá, 1993)

  • (es) Fernández de Piedrahita, Lucas (1688). Historia general de las conquistas del Nuevo Reino de Granada. Imprenta de Juan Baptista Verdussen.

Michuá
Muisca nafalik
Zovdaks va Michuá koe Historia General de las Conquistas del Nuevo Reino de Granada neva (1688) ke Lucas Fernández de Piedrahíta
Nafaluca
Prostelay Zaque
Semek Zaque ke Hunza
Soka Muisca abdigalda
Nafalugal 14701490
Dar- nafalik Hunzahúa
Dir- nafalik Quemuenchatocha
Blirizva
Koblira ?
Awalkera 1490
betara teza
  Tuveli icde Izvopa 
Muisca : sane ke Kolombia is savsaf abdiespanaf seltay
Seltay

TawamiduraVegeduropaYambaKocopaBurmotaropaSkapaInseikLexaAvaVundopaAlkaGeja

Debak

FúqueneGuatavitaIguaqueSuescaTotaTequendama stoya

Izva

Muisca abdigaldaSavsaf bowesikPasca meldChocontá meldTocarema meldEspanafa olgalicura

Nafalik

Zipazgo : MeicuchucaSaguamanchicaNemequeneTisquesusaZaquesazipa
Zacazgo : HunzahúaMichuáQuemuenchatochaAquiminzaque

Lorik

ChiminigaguaBachuéChíaSuéBochicaHuitacaChibchacumCuchaviraNencatacoaChaquénChibafruimeGuahaioque