Chaquén

Chaquén tiyir lorik va utieem is boduca koe alka is vundopa ke Muisca sane dene abdiespanafa Amerika. Viele espanik va Muisca sanexo artlakiyid, pune gan güecha gejik baken gan Chaquén zo acagiyid. Pimtara Chaquén va taya ke Muisca saneik givamoefiyir. Chaquén bal boda is jora koe Muisca muxaweyer. Pedro Simón espanafa ugalidk ke XVII-eafa decemda icde Chaquén kalir : « Muisca saneik va boda bal jora grustayad edje okilikaf vonkik va sint konakinde likeyed : stutera dem jontika bruxa isu val isu nola isu truga. Korik va tantazukot ik sulemalmaxa dem moavafo amoto diskiyid. Waks ke wasik tiyid kulon zikeyena lioza isen jora dem jontikote chicha ruyatxa tiyid. » Chaquén estes va Tintoa is Sunuba Osk Chaquén tiyir lorik va utieem is boduca, voxosk rubayar da foredonesik di zo esteyed, tulon rupa ke Tintoa is Sunuba. Tintoa tiyir jotafe is takrelafe güecha gejikye aze va Sunuba listikya korenayar, i va taneafa yerumanikya ke sersikye. Kotviele bantan ta geja mallaniyir, pune va ina ikaon korotiyir. Viele moi meld dimlaniyir aze kosmayar da yerumanik va Tintoa skedegayar, pune va kottol djukuresteyer. Renasa tolonga otceyer ise va vexa divvawayar. Viele Chaquén kosmayar lize ina tigiyir, pune gu rostela artazukayar : va Sunuba listikya gu edgardinda goblitisa koe loba ke vema ke Bogotá, is va Tintoa gu rodafa rata anton grupatrisa koe lindaxo numen mevielu di zo griuziayad. Kiewega ke Chaquén Tejo uti ke Muisca sane Koe Boyacá is aryona gola ke Kolombia, tejo uti bak sare ke Muisca seltay zo ksubeyer aze batvieli dun krulder. Mukot ke tejo omba tiyir kabura va kuritcaf azekol num dendara va roidasina nelama. Vuestexa (es) Ocampo López, Javier. 2013. Mitos y leyendas indígenas de Colombia. Plaza & Janes Editores Colombia S.A.

Chaquén Lorikye ke Muisca Kira Yorda Lorik va uti is boduca Atay Gola Muisca Lorafa yasa betara teza