Pinunaf nok (suterot)

**Pinunaf nok**
	XANTO
	XANTO
Vergumvelt	The Adventure of the Speckled Band
Sutesik	Arthur Conan Doyle
Ava	Englava
Suterotinda	Berpotam
Evla	1892
betara	teza

Pinunaf nok

Pinunaf nok ( englavon The Adventure of the Speckled Band ) tir berpotam ke Arthur Conan Doyle taneon sanegayan bak 1892 koe Standard Magazine virda az direilanon koe Yona stuva ke Sherlock Holmes berpotamak.

Vildeks

Bula ba tena

Ba gazda ke balemeaksat ke 1883, Watson gan Holmes kes va warzafa anelikya zo divmodar. Artlanison va bontay ke 221B kraba keve Baker vawila, sin va jotaf Helen Stoner kevlanid. Bantan va Sherlock Holmes gu divulafa bifa dilizeyesa koe Stoke Moran djuruper, i koe waba ke ikagadikye ( Grimesby Roylott ) lize dere soker.

Helen Stoner pebur da ikagadye tir tizik lanedje ton altokafo popo ise koe Barata bliyir. Roylott selaropik va nyobrafa gadikya ke Helen weti konaka ilana al kurer aze do ina is inaf nazbeikyeem ( Helen is Julia ) va abdigadafa waba ke Hoylott yasa tigisa koe Surrey gola kosokeyer. Gadikya ke Helen kadimion awalkeyer : Helen is Julia di zavzayad antafa remi konaka tanda do ikagadikye. Mawa ke Julia wale tela ke bantelye is tela ke jelikya tigiyir.

Weti tolda abdi nega ke Helen Stoner, Julia berya koe waba ton divulaf goaspil kabdi kurera awalkeyer. Ba siel ke piza, Julia ko mawa ke Helen al piyir aze pulviyir, divrozason va litera da va abrotcifa azda bak daref mieltum al gildeyer, num evodason va Helen. Azon Julia al mallaniyir aze milinde kotviele va telvungeem is tuvel kouon al kalbudeyer. Voxen isti miel, Julia mayakon alve kizoyuyur numen Helen va mawa vere al divlaniyir. Julia va intafa mawa al fenkuyur aze lopceson al divlaniyir, diviegason pu berya : « To nok, to pinunaf nok !», klubon bazeson va mawa ke ikagadikye, aze al titkeyer. Roylott selaropik va intafa mawa silukon divlaniyir aze va grelera ko wida volmiv aneyayar voxen tenule di rodjeyer. Helen uculer da ikagadik va bata awalkera yordayar voxen tegi nutuvolgunad larde in koe intafa budeyena mawa miv tigiyir. Yikya setiker da va azda pimtayana gan berya voxis solwife yantafe ompe al gilder edje koe plor tigiyir voxe va xanta me gruper. Lan fotikikaf blay rictayan gan selaropik moe pilkot ke waba ostik milugale sokeyer, nume bak mielaf bifatum rotir laninde al yordar.

Arti tolda radimi bata medivena folva, Helen va lane Percy Armitage djukukurer ise sume waba ke Roylott selaropik djukusoker. Weti tolka badi nega, kobara koe waba su zo bokad nume Helen koe savsafa mawa ke Julia al gonokeniber. Voxen darevielon, va mielafa azda pimtayana gan berya bak sielcek ke inafa awalkera solwion al gilder. Abdipestaleson va kone wupe, Helen ko London mallakiyir lize va Holmes kevlaniyir ise pomatanon eruyur da in va arienta di grogayar.

Maera

Holmes pu Helen Stoner abdiplekur da kodisuketeson va xo, do Watson tcicesik ko waba titi kielcek lakitir edje selaropik me tigitir. Kadimida yikya va Baker vawila su mallakir, pune Roylott va kraba ke kogrupasik silukon kolanir aze granser da draga walpulviyina do Helen pu dalint zo goled. Nope wiyafa vewara ke Holmes, Roylott va nornokay divnarir aze mucur, jupason da Holmes gildackar da va bata arienta gomedulaper. Bata tremafa bifa va minia ke Holmes icde inafa tirodafa volgunuca tupoar. Holmes va rielcek impavantar ise va bafela ke gadikya ke toloy Stoner berik dene tegivsutesik ruper nume kosmar da tod kurera ke Julia ik Helen, Roylott selaropik va turwi vas acku ke ziliduks pu arnazbeikya co gonoverkar. Roylott va vraticki en tarutetesi va kasafa kurera ke Julia ik Helen kle nugir.

Kiel vanfir numen toloy nik kal waba koe Surrey mallakid inde al abdiwid. Banlize va Helen Stoner katrasid aze va xo worad. Kogrupasik tuageltar da mawa ke Julia rem dilk me zo rovokolanir viele telvungeem tir budeyen. Batcoba va fotikiktum tuvolgunar. Acum dere azilompe gildeyene gan Helen me tir tele ke obla giskisa va telvungeem. Koe mawa ke Julia, Holmes va konaka mepreksafa tadlexa soe kosmar. Otson ice ilava, wazdel ke mamlesiki tir, i wazdel inkeyen kabdi awalkera ke Julia, voxe va meki mamlesiki kogluyar nume en tir mefavlaf. Tice wazdel, feme ke sukonarak kogluyas va mawa ke Roylott selaropik tir. Helen diver da bata stita keni wazdel ke mamlesiki zo loplekuyur voxe doster da man inkeks tir mepestoraf larde kon sukonarak vanstis kale divefa rebava loeke co tir keskotaf. Kogrupeson va mawa ke selaropik, Holmes va abica divulafa xa vaxe konaka muka nutisa mefavlafa trasir. Wori rindera nuvaskir da in va varafa arienta vangruper beka va mecoba kramafa pu Watson is Helen Stoner banviele razdar.

Holmes trakur da Helen daletoe kenibeson koe mawa ke Julia keunir, batdume ba miel djumaltegitir nume va arienta maeter. Holmes erur da Helen koe mawa ke Julia bak sielcek tigitir : viele Roylott silukon dimlanitir ise va intafa mawa al kolanitir, pune Helen kan afifa kabera gowalzeter batkane Holmes is Watson grupeted da ko mawa ke Julia rem fenkuyun dilk rovokolanitid. Helen va mawa melorason luxeon divlanitir aze koe vegungafa mawa tildeter. Azed varon tire zo askuter milinde Holmes al abdiwiyir.

Holmes is Watson va mawa ke Julia kolanid aze remi konak bartiv koe orika ked vieli kena bifa moni bare bartiv sokir. Toloy nik va odjafi afi mal mawa ke selaropik remo gaelasa boyta koe rebava bam remwid, batcoba tisa sugda ke inafa ranyara. Holmes is Watson wan kemed vieli loram poke sukonarak zo gilder. Bam Holmes van wazdel ke mamlesiki iper aze kan runza godjon tazer, diviegason : « Va ina wil, Watson ? Kas wil ?», voxen Watson va mecoba wir. Arti abic verast, « virnafu » kizoyu mal mawa ke selaropik zo gilder. Watson tir buktaf, Holmes al narur. Toloy ayik ko plor iped aze va mawa ke selaropik kolanid. Bantel tir itafenkursus vane pij, awalkeyes dum Julia. Aname inafa taka zamyala tir, i zamyala gemafa dum vinotca is dem kretsakirafa alma : pinunaf nok. Holmes va jortes sulem kan aptaf gor feliler aze gu azilbor kobuder, i gu bor yanton loras gildeyen weti tolda gan Helen ba budera.

Arienta batkane zo maer : Roylott selaropik va Julia al aytar, koplekuson va zamyala ( malbureyena div Barata, dum aryon sulem ke waba ) rem gaelasa boyta, tatceteson va kurera is djukufaveson va mil suzenk aytatas va toleafa ikanazbeikya fure kuresa va Armitage. Wori sopuse cave me tiyir lanafe isen zamyala bak konak mielcek co rokoplekuyur voxe va tigisik ke mawa me co bugdayar. Battode selaropik bagon gonazdasiyir enide zamyala kal in di dimterigeyer : bana azda gan Julia az Helen zo gildeyer. Viele Holmes va wazdel al tazeyer lizo zamyala van ilava ke kosik titterigeyer, pune sulem kerujon dimterigeyer numaze va korik tigis kake rebava awalkolon bugdayar. Holmes vanyer meluntaf tove selaropik beka merontion tir blodaf gu inafa xonukera. Helen Stoner moi Holmes is Watson ko mawa artlanir aze kiazawer kire dere int va lanafa awalkera su taruter.

Yunkexa

Konaka yunkexa va berpotam, koe sanegasa virda bak 1892 :

Dere rupel

Arthur Conan Doyle : Englavaf suterotik ( 1859-1930 )
(en) Pinunaf nok, dene Wikisource ( xantokrent )

Vuestexa

Tuveli icde Suteroteem

t · p · b Sherlock Holmes, nevatum ke Arthur Conan Doyle
The Adventures of Sherlock Holmes ( Yona stuva ke Sherlock Holmes )
Berpot	1887 ~ A Study in Scarlet ( Vayara va kere ) • 1890 ~ The Sign of the Four ( Sugda ke balema ) • 1902 ~ The Hound of the Baskervilles ( Vakol ke Baskerville yasa ) • 1915 ~ The Valley of Fear ( Vuda Krant )	Sherlock Holmes
Yona stuva ke Sherlock Holmes The Adventures of Sherlock Holmes (1892)	A Scandal in Bohemia ( Bilita koe Ceska ) • The Red-Headed League ( Blakerikafa Gluyista ) • A Case of Identity ( Pilkomafa arienta ) • The Boscombe Valley Mystery ( Bula ke Boscombe krant ) • The Five Orange Pips ( Aluboya dorga ke kramte ) • The Man with the Twisted Lip ( Ayikye dem mucunaf kutc ) • The Blue Carbuncle ( Faltafa aka ) • The Speckled Band ( Pinunaf nok ) • The Engineer's Thumb ( Arekta ke dritikye ) • The Noble Bachelor ( Kaelafe oluikye ) • The Beryl Coronet ( Amoto dem berielxa ) • The Copper Beeches ( Rolmukafa tajda )
Namio ke Sherlock Holmes Memoirs of Sherlock Holmes (1894)	Silver Blaze ( Dilgavafa teyka ) • The Adventure of the Cardboard Box ( Liwayaf bor ) • The Adventure of the Yellow Face ( Blafotafa gexata ) • The Stock-broker's Clerk ( Betayes unenik ) • The Gloria Scott ( Gloria Scott tota ) • The Musgrave Ritual ( Musgrave welima ) • The Adventure of the Reigate Squire ( Pilkotik ke Reigate ) • The Adventure of the Crooked Man ( Minkedikye ) • The Resident Patient ( Ropen sokesik ) • The Greek Interpreter ( Ellasavaf remtrakusik ) • The Naval Treaty ( Birafa bioga ) • The Final Problem ( Bocaf zvak )
Dimpira ke Sherlock Holmes The Return of Sherlock Holmes (1905)	The Adventure of the Empty House ( Vlardafa mona ) • The Adventure of the Norwood Builder ( Vegedusik ke Norwood ) • The Adventure of the Dancing Men ( Stutesik ) • The Adventure of the Solitary Cyclist ( Antiaf tolkrafolusik ) • The Adventure of the Priory School ( Priory bema ) • The Adventure of Black Peter ( Ebeltaf Peter ) • The Adventure of Charles Augustus Milverton ( Charles Augustus Milverton ) • The Adventure of the Six Napoleons ( Tevoy Napoleon ) • The Adventure of the Three Students ( Baroy vayasik ) • The Adventure of the Golden Pince-Nez ( Moavaf pezkurt ) • The Adventure of the Missing Three-Quarter ( Graces berkik ) • The Adventure of the Abbey Grange ( Abbey Grange ) • The Adventure of the Second Stain ( Toleafa kretsa )
Inafa bocafa celyomura His Last Bow (1917)	The Adventure of Wisteria Lodge ( Wisteria Lodge waba ) • The Adventure of the Bruce-Pardington Plans ( Zovdom ke Bruce-Pardington midtota ) • The Adventure of the Devil's Foot ( Oretlikafa nuga ) • The Adventure of the Red Circle ( Kerafu ivamu ) • The Disappearance of Lady Frances Carfax ( Griawira ke Frances Carfax ) • The Adventure of the Dying Detective ( Ilblis kogrupasik ) • [His Last Bow - The War Service of Sherlock Holmes ( Inafa bocafa celyomura )
Savseluxaxak ke Sherlock Holmes The Case-Book of Sherlock Holmes (1927)	The Adventure of the Mazarin Stone ( Aka ke Mazarin ) • The Problem of Thor Bridge ( Zvak ke Thor za ) • The Adventure of the Creeping Man ( Upenyesikye ) • The Adventure of the Sussex Vampire ( Forteyfamik ke Sussex ) • The Adventure of the Three Garridebs ( Baroy Garrideb yoltik ) • The Adventure of the Illustrious Client ( Tcumpaf anelik ) • The Adventure of the Three Gables ( Barragufa mona ) • The Adventure of the Blanched Soldier ( Weriktaf sayakik ) • The Adventure of the Lion's Mane ( Yinaxot ke krapol ) • The Adventure of the Retired Colourman ( Bulusaf ksevadolesik ) • The Adventure of the Veiled Lodger ( Italkkirafa vredanikya ) • The Adventure of Shoscombe Old Place ( Shoscombe Old Place )