Antiaf tolkrafolusik (suterot)

**Antiaf tolkrafolusik**
	XANTO
	XANTO
Vergumvelt	The Adventure of the Solitary Cyclist
Sutesik	Arthur Conan Doyle
Ava	Englava
Suterotinda	Berpotam
Evla	1903
betara	teza

Antiaf tolkrafolusik

Antiaf tolkrafolusik ( englavon The Adventure of the Solitary Cyclist ) tir berpotam ke Arthur Conan Doyle taneon sanegayan bak 1903 koe Standard Magazine virda az direilanon koe Dimpira ke Sherlock Holmes berpotamak.

Vildeks

Tozafa debala

Ba pereaksat 23/04/1895, Violet Smith W^-ya va 221B ke Baker vawila denlanir, keyakseteson va evodasa rupa pu Sherlock Holmes. I yikya pebur da tir tavesik va lexa ke tuwawawesa yasa mali awalkera ke gadikye weti konak aksat. Valey gadikya doon ware kruldesa, kone ziavikye yoltkirafe gu Ralph Smith tiyir voxe bak santoleaksat ke 1894 dere awalkeyer. Koe Geeafrika bliyir ; inafa awalkera gan toloy korik zo munesteyer, i gan Bob Carruthers tis grupenik ke Ralph Smith koe Afrika isu Jack Woodley. Rabateson va wawuca ke yikya, Bob Carruthers bam drageyer da ina den dalint koe Charlington koe winka di irubayar ise pu nazbeikya ika kubanya di taveter. Batcoba zo malnaleyer krede Violet Smith kan impadimak va gadikya belon di rowiyir. Batdume ba kota saftatena ko London gilapir aze dimlapir, faveson va tolkrafol ta zalor mal vedgobeso yasaxo kal golda ke Charlington, moo lana aulapafa vawa koo vayka. Vanyer tuvaleapana gan debala voxe va korik bal tolkrafolusa exulera konakviele al katcalar, i va lukastikye dure radimelapise arte 200 m-. Zo evodar lodame zo vudesir voxe va coba gimwana kev int pu Holmes erur

Maera va welima

Holmes gan ara arienta zo kereleper, batdume va Watson ko Charlington stakser. Bak gazda ke toleaksat, palseson koe amna, bantel va tazwa ke tawaday dizver tire kozwir. Va Violet Smith moe tolkrafol kadimelapin gan lukastikye dere kozwir. Levion bane ayikye koe fraday ke gleida ke lan pilkotap tigis kene vawa va int al palseyer. Exaksunon va Violet Smith keyer aze radimelapiyir aze kal wabapa dimlapiyir. Batdume Watson va irubasikeem ke bato xo djucenkadayar. Auzuson va lanu sistu ke Pall Mall, lajugotur da waba gan kotik yoltkiraf gu Williamson re zo lizukedur.

Watson pu Holmes munester voxen bantel gu dizvereem ke Watson zo awuzar kiren batcoba va maera va arienta me abduplekur. Bak kiel ke bareaksat ko Charlington voldo Watson miv lapir. Anamerutuson va irubasikeem ke waba, ko lizukafa zazda lanir lize lajukosmar da Williamson tir savsaf wegayenses gertik. Va Jack Woodley divrozayan gan Violet Smith dere kevlanir, i va ficikye nubokason rwamane.

Ba alubeaksat, Holmes is Watson va twa ke Violet Smith kazawad, i va twa kocenkasa da Bob Carruthers vedgobesik kuredayar voxen mbi vewayar kiren in pu are ayikye ixam al aguntar. Batdume is golde bula ke tolkrafolus radimelapisik va play djukugriflir.

Holmes vantrakur da yikya bal bocafa dimlapira van London bak gazda ke pereaksat laxukeunir. Ko Charlington ba bat viel do Watson bam lapir. Sin gaveon artlapid aze va lukastikye radeyese moe vawa kosmad, i va tolkrafolikye dere lasugiwatason kaaneyase va Violet Smith. Bata bara va pilkot ke tubizafa wabapa ke Charlington rem fraday ke gleida kolanir aze waroldon kosmar da Williamson gertik va poana kurera va Violet Smith gu Jack Woodley su fiptar. Lukastikye tigise do Holmes is Watson va roletaf lukast tiolter nume nijur Bob Carruthers savsaf vedgobesik ke yikya. Gan tegira ke Jack Woodley nik en zo vuiler nume va westa divucomar aze viltar, bakason vols aytason.

Bob Carruthers pu Holmes bam diver da koilkatason va konoleksap ke Ralph Smith ziavik ke Violet, int is Woodley al urbeyed. Rieta tiyir da tan ke tola va Violet batdume gokureyer. Wori darpe ironokaf aksattum, Carruthers va Violet duxibeckeyer. Voxen in al vewayar. Voxen Jack Woodley mewegayes va poana kurera kan dofugaf gertik gorayar. Tere jiz zo oger numen Williamson gu flint vas perda is Woodley vas sanda is Carruthers gu gakerama zo lanzad.

Yunkexa

Konaka yunkexa va berpotam, koe sanegasa virda bak 1903 :

Dere rupel

Arthur Conan Doyle : Englavaf suterotik ( 1859-1930 )
(en) Antiaf tolkrafolusik, dene Wikisource ( xantokrent )

Vuestexa

Tuveli icde Suteroteem

Tana yunkexa ke taneaf piskuks va berpotam bak 1903

t · p · b Sherlock Holmes, nevatum ke Arthur Conan Doyle
The Adventures of Sherlock Holmes ( Yona stuva ke Sherlock Holmes )
Berpot	1887 ~ A Study in Scarlet ( Vayara va kere ) • 1890 ~ The Sign of the Four ( Sugda ke balema ) • 1902 ~ The Hound of the Baskervilles ( Vakol ke Baskerville yasa ) • 1915 ~ The Valley of Fear ( Vuda Krant )	Sherlock Holmes
Yona stuva ke Sherlock Holmes The Adventures of Sherlock Holmes (1892)	A Scandal in Bohemia ( Bilita koe Ceska ) • The Red-Headed League ( Blakerikafa Gluyista ) • A Case of Identity ( Pilkomafa arienta ) • The Boscombe Valley Mystery ( Bula ke Boscombe krant ) • The Five Orange Pips ( Aluboya dorga ke kramte ) • The Man with the Twisted Lip ( Ayikye dem mucunaf kutc ) • The Blue Carbuncle ( Faltafa aka ) • The Speckled Band ( Pinunaf nok ) • The Engineer's Thumb ( Arekta ke dritikye ) • The Noble Bachelor ( Kaelafe oluikye ) • The Beryl Coronet ( Amoto dem berielxa ) • The Copper Beeches ( Rolmukafa tajda )
Namio ke Sherlock Holmes Memoirs of Sherlock Holmes (1894)	Silver Blaze ( Dilgavafa teyka ) • The Adventure of the Cardboard Box ( Liwayaf bor ) • The Adventure of the Yellow Face ( Blafotafa gexata ) • The Stock-broker's Clerk ( Betayes unenik ) • The Gloria Scott ( Gloria Scott tota ) • The Musgrave Ritual ( Musgrave welima ) • The Adventure of the Reigate Squire ( Pilkotik ke Reigate ) • The Adventure of the Crooked Man ( Minkedikye ) • The Resident Patient ( Ropen sokesik ) • The Greek Interpreter ( Ellasavaf remtrakusik ) • The Naval Treaty ( Birafa bioga ) • The Final Problem ( Bocaf zvak )
Dimpira ke Sherlock Holmes The Return of Sherlock Holmes (1905)	The Adventure of the Empty House ( Vlardafa mona ) • The Adventure of the Norwood Builder ( Vegedusik ke Norwood ) • The Adventure of the Dancing Men ( Stutesik ) • The Adventure of the Solitary Cyclist ( Antiaf tolkrafolusik ) • The Adventure of the Priory School ( Priory bema ) • The Adventure of Black Peter ( Ebeltaf Peter ) • The Adventure of Charles Augustus Milverton ( Charles Augustus Milverton ) • The Adventure of the Six Napoleons ( Tevoy Napoleon ) • The Adventure of the Three Students ( Baroy vayasik ) • The Adventure of the Golden Pince-Nez ( Moavaf pezkurt ) • The Adventure of the Missing Three-Quarter ( Graces berkik ) • The Adventure of the Abbey Grange ( Abbey Grange ) • The Adventure of the Second Stain ( Toleafa kretsa )
Inafa bocafa celyomura His Last Bow (1917)	The Adventure of Wisteria Lodge ( Wisteria Lodge ) • The Adventure of the Bruce-Pardington Plans ( Zovdom ke Bruce-Pardington midtota ) • The Adventure of the Devil's Foot ( Oretlikafa nuga ) • The Adventure of the Red Circle ( Kerafu ivamu ) • The Disappearance of Lady Frances Carfax ( Griawira ke Frances Carfax ) • The Adventure of the Dying Detective ( Ilblis kogrupasik ) • [His Last Bow - The War Service of Sherlock Holmes ( Inafa bocafa celyomura )
Savseluxaxak ke Sherlock Holmes The Case-Book of Sherlock Holmes (1927)	The Adventure of the Mazarin Stone ( Aka ke Mazarin ) • The Problem of Thor Bridge ( Zvak ke Thor za ) • The Adventure of the Creeping Man ( Upenyesikye ) • The Adventure of the Sussex Vampire ( Forteyfamik ke Sussex ) • The Adventure of the Three Garridebs ( Baroy Garrideb yoltik ) • The Adventure of the Illustrious Client ( Tcumpaf anelik ) • The Adventure of the Three Gables ( Barragufa mona ) • The Adventure of the Blanched Soldier ( Weriktaf sayakik ) • The Adventure of the Lion's Mane ( Yinaxot ke krapol ) • The Adventure of the Retired Colourman ( Bulusaf ksevadolesik ) • The Adventure of the Veiled Lodger ( Italkkirafa vredanikya ) • The Adventure of Shoscombe Old Place ( Shoscombe Old Place )