Toloye Kip berikye (suterot)

Toloye Kip berikye Toloye Kip berikye tir ardialaf is stuvaf berpot ke Jules Verne sanegayan bak 1902, tis tana karba ke Yona zultafa koyara nevatum. Vildeks Atoera Koe James Cook tota, Gibson redakik ker abdida va Newzelanda van New Ireland ewala di romallapir, voxen nope konaka emdura drig tir mekotraf. Flig Balt drigokilik is Vin Mod tan birelik va keldura va balemoy warzaf birelik ika fakafa erba bam vajuled. Do bat drig kalion ponayan, Gibson redakik va Nat nazbeye is Hawkins dorjesik koe Wellington gokatrasir abdida ko tursia lente Papua di lapitir. Voxen Mod is Balt poman gan warzaf birelik va antafa coba aneyad : kostujera va tota az malsavera ta tcordura is butcara koe bana tursia. Bak remlapira mal Wellington kal New Ireland ewala, James Cook tota va toloy bopelanik greler, i va Kip berikye. Kas tarlesik va tota fu lajukostujed ? Toka wana ke stuva ke James Cook tota koe tursieem ke Geefa Pacifika welfa fu tir ? Taneafa pakava James Cook tir kazatota krimtakazasa wal tursia ke Pacifika welfa is Tasmania mal Hobart molt. Voxe koe Dunedin koe Newzelanda, keve etol zo elekar radimida yon birelik al emdud. Flig Balt drigokilik is Vin Mod naf birelik va balemoy birelik ko tana volvartafa zazda bam kreldud, i va lorwamase ayikye. Tire ta intaf azed zo djupomad : tarlera az ilstaksera va redakik is sagaf birelikeem az malsavera va tota ta tcordura. Voxe va azed me lajukoskud. Moo zalor ta aneyara va yulteem koe Bismarck tursia, James Cook tota va toloy warzaf koyasik emuder : Hawkins W-ye dorjesik va tota is Nat Gibson nazbeikye ke redakik. Az va toloy ar bak soktara poke Norfolk ewala, i va toloy nederlandaf bopelanik, i va Kip berikye tise antaf moblisik ke Wilhelmina tota mali 15 viel moe ewala. Nope bata otarura, tarlesik va kostujera va tota me katectad. Bal soktara koe Bismarck tursia koe Port-Praslin az Kerawara ewalama, Gibson redakik ba siel ke mallapira griawir : aun nubemayanon ko takra su xonuker, gan Flig Balt is Vin Mod. Acum Flig Balt vanpir warzaf redakik aze moe zalor van Tasmania va tota lagaranamar. Voxen bak zivottcek is nope inafa volstinuca isu ubzera, Karl Kip va dirgara va tota narir. Kadimion tarlera stana gan Balt tiner numazen Balt do toloy ar birelik arte yultxo zo kobuder. Azon tota va Hobart di artlapir. Toleafa pakava Keson va malyerotara va tarlesikeem, Vin Mod zavzayas nuyaf va toloye Kip berikye eninteper. Sielon moi jiz, ko zolpa ke toloye berikye, va erba is eluxaxa dubieyena bas Gibson redakik ba pisonara is gomilasa imizxa preyutar. Bal jiz to Flig Balt va toloye Kip berikye gu pisonara va Gibson redakik koridar nume va tarlera vengar ! Wazdexeem zo katrasir numen toloye berikye zo xonukalanzad. Nope karakera ke Hawkins dorjesik iltrakupus va sinafa gunuca, is nope banvieli sinafa vonafa vanyera isu buduca, gakera gu parmaf flintugal zo nuner. Acum toloye Kip berikye ta poana kobara ko xalta ke Port-Arthur zo staksed. Banlize sinafa linulara di tir meroculimena. Soe sine va toloy gaderopaf eireaf lanzanik divstoleteson pomad, i va O'Brien dere memalyon isu Macarthy. Nume bal lyumara, do toloy eireik dere va int divstoled. Stekeon, djubuiveson gu intafa volgunuca, Karl Kip isu Pieter ko Australia dimlapid nume gu rictaga va int xaasid. Tere wazdexa ke volgunuca moe afigasuteks va awalkoda ke Gibson redakik zo trasir. Batdume zo dimrokad. Flig Balt is Vin Mod va Australia al lajumallapid aze tcorduson koe tursia ke Pacifika welfa va ara tota al koilkad. Stekeon gan englaf gejatotuk zo soped ise bak meld zo aytad. Koredik Toloye Kip berikye : tid nederlandik ke Groningen widava. Karl Kip taneik tir ikaredakik. Pieter Kip toleik va arientasa tcema koe tursia ke Pacifika welfa co djuredur. Ko Nederlanda godimlapid enide va konolera ke gadikye di tenekad. Koe Wilhelmina tota koyad voxe bopelawed aze gan James Cook zo tuvawelad. Gibson redakik : redakik ke James Cook tota, tis donaf birik is nik ke Hawkins dorjesik. Va birakazasa ja doon al redur ise pokoler da nazbeye koe Newzelanda arientutuson rotinketer. Hawkins dorjesik : tir tarkapaf is gruf arientusik. Wetce nik ke Gibson redakik, va inafe nazbeikye ta arientara djupomar. Va tcemaf blodik koe tursia paskalenyer. Gruf is dinaf, nekev kaikanzasa wazdexa, di tir ant rojusik va toloye Kip berikye. Nat Gibson : tir yikye olgon gikobase. Vanolapanon gan xonukera ke gadye, nekev sintafa darefa nuca, pu toloye Kip berikye me rotixer. Grogara va in laneke di grizidesir. Flig Balt : tir drigokilik ke James Cook tota ise do Gibson redakik jontikedje totar. Pirdayanon gan Vin Mod, va tota soe djukugader batenide va kotcoba egadar. Direfa wara is erba en tid inafa danda. Mea dilon djuyordar. Vin Mod : tir izgaf pirdasik va Flig Balt, va tarlera to drager. Ta koridara va toloye Kip berikye gu pisonara va Gibson redakik dere azeder. Ton kotunafa tula ke izgik, tir lorotaf tozekik. Yunkexa Konaka yunkexa va berpot, koe xantofa piskura, 1902 Dere rupel Jules Verne : Francavaf suterotik ( 1828-1905 ) (fr) Toloye Kip berikye, dene Wikisource ( xantokrent ) Vuestexa

Toloye Kip berikye XANTO Vergumvelt Les Frères Kip Sutesik Jules Verne Ava Francava Suterotinda Berpot Evla 1902 betara teza   Tuveli icde Suteroteem  Taneaf yunkeks ke xantof piskuks ke 1902