Teyesa tursia (suterot)

Teyesa tursia Teyesa tursia tir izvaf berpot ke Jules Verne sanegayan bak 1884, tis tana karba ke Yona zultafa koyara nevatum. Vildeks Tegira koe Aigaia tursia bak 1827 dilizer lize tizafa molikera va ellasik gu turkik kevud. Vintes ellasik va turkafa ervolia volokon acagid. Koe bata memiltafa lyumara, ellasafamik tis europaf kuranik ke konak vedeyot zobed. Ke sin, Henry d'Albaret francik tis birarikulik. Nicolas Starkos ellasik va turkaf kerelesik luxeon volkinokon dokobar ise moe intyona tota va gralomeyen ellasik remburer enide va sin ton levetirik di doler. Antaf korik djukuracagir : Andronika gadya, zukesa da in ko vofa mona gire di kolanir. Moe Kerkira ellasafa ewala ristuna gan Britana, Henry d'Albaret francaf gradilik va welimaf Elizundo omeltik arienton toz skedar. Va Hadjine nazbeikya ke omeltik duxiber aze mbi jukar. Voxen Nicolas Starkos tcordik dere tis levetirevik bam artfir. Elizundo omeltik va tufa gu kazara va bat kimtik danur. Tcordik dratcer da va xanta ke tufa ke Elizundo basitalkatar ede va Hadjine nume inaf konoleks me mbi jukar. Omeltik moduntur voxaze kadimion awalker. Gixuson va patiafa neva ke gadik, Hadjine va kotcoba raver, va dragera ke Starkos malvewar aze otcer. Va Henry d'Albaret me walzer kire pester mebagaliafe gu kurera. Bantan va dirgara va Syphanta gejatota ropiilana gan yasegafa erba mbi odiar numaze va tcordik kerestias va ellasafa tursia toz tawukar. An zugaf tcordik tir vundaf Sacratif dure krulas. Fayik gu koaliera me lajuvebandar. Miledje Hadjine va derka ke gadikye al kaluster, yazgason va varaf konoleks ta dimdolera va tulevetirayan ellasaf stolenik. Voxe int gan tcordik zo gralomer numaze koe levetirafo kazaxo zo kodoler. Xuye, inaf toloy jukusik ( bat tcordik is ban francaf fayik ) va ine miledje kozwid aze seotatason tutcazad. Henry d'Albaret war aze va gejatota doon dimlapitison rundanyar. Hadjine va kotcoba pwader, razdar da tir xanton gu inafa koflira va redakik ke totuk ise dakter da re tir bagaliafe gu in. Starkos en tir vundaf Sacratif ise va intaf milk permudar aze kan tcordaf totuktum va gejatota dilfur. Doaliera kev ellasaf gugafamik tenuler. Bantan zo stoled. Starkos tir yatkaf tove Hadjine lorkayase va tufa, nume va ine ton levetirik djulevplekur ise va Syphanta tota dem Henry d'Albaret is drigik koeon tigis djudivroidar, voxe ba ironokafa vula vofar da dalintafa gadikya ke tunuyayan gralomenik tir. In va inafa giwara benplekur voxen miledje stolenik impavantad ise exud. Koe dilizesa kroguca, Starkos/Sacratif is Andronika xonuked isen tcordik zo surted. Henry is Hadjine tere rokured aze koe Ellasa galted. Koredik Henry d'Albaret : francikye, 29-dafe, birarikulik. Elizundo : omeltikye, illiriik ok dalmatiik, 60-dafe ik 70-dafe. Hadjine Elizundo : 22-dafa, nazbeikya ke Elizundo dovey ellasafa gadikya. Gozzo : guazafe birikye ke Mani dega. Skopelo : 50-dafe, arabafe yudikye, abidas nayanik ke Starkos. Andronika Starkos : ellasafa gugafamikya, gadikya ke Starkos. Nicolas Starkos : ellasikye, nazbeikye ke Andronika, 35-dafe, okon gu Sacratif tcordik. Stradena redakik : taneafe redakikye ke Syphanta tota, aytane bak kevtcordaf tawuk. Todros redakik : 50-dafe, ellasikye, ikaredakik ke Syphanta tota. Xaris : vrodberikye ke gadikya ke Hadjine, inaf nendasik. Yunkexa Konaka yunkexa va berpotam, koe xantofa piskura, 1884 Dere rupel Jules Verne : Francavaf suterotik ( 1828-1905 ) (fr) Teyesa tursia, dene Wikisource ( xantokrent ) Vuestexa

Teyesa tursia XANTO Vergumvelt L'Archipel en feu Sutesik Jules Verne Ava Francava Suterotinda Berpot Evla 1884 betara teza   Tuveli icde Suteroteem  Yunkes moek ke xantof piskuks