Koyara ist Tawava (suterot)

Koyara ist Tawava Koyara ist Tawava tir stuvaf is izvaf berpot ke Jules Verne sanegayan bak 1864, tis tana karba ke Yona zultafa koyara nevatum. Berpot va kosmara va savsaf Runa nubasuteks gan germanaf grupeik pwader. Bantan do nutikye is nyapesik va koyara ist Tawava bokar, kolanison tit Snaeffels islandaf merunkaf tculk. Berpot tir aotcera va opaf orig is rukiafa kaikundera is stuva, i matcacapa ke coba kaikion sanegayana gan Jules Verne. Toza ke berpot va sarefa dulaperapa va beksopa tisa jotafa opa tcazedar. Wana ton pimtara va Islanda sizi XIX-eafa decemda az koplekurapa va toloya vankedasa opa dakir, i va seriopa is sidopa. Vildeks Taneafa pakava To pakava abdufisa va opa is inaf gunteem tir. Xeka kabduon zo plekud ; jadifa dulapera ke koredikeem va opa viele va buga titlanid, kotcoba va bata kerdela drigdackar. Zikera nutir loeke geltrafa isen ravlem ke koredik tid elimaf is brubef is valdigkiraf numen sin bevulad ozodik ke intaf kowedin ind. Kotcoba ba kosmara va beksayana migajeyxa suteyena kan Runa sutera tozuwer, i va migajeyxa trasina koe savsaf nubasuteks urlicken gan Lidenbrock kotlebik. Moida pomayanon gan nutye, battan al gribeksar, pune ko Islanda djukulapir lize xo pulvino gan neva tigid. Sin djuprogoged ise arti tolka ta koyara kal Islanda ampud. Va jontika lentekafa widava remlapid ise kal aneyan mukot totad. Va Snaeffels tculk artlanid aze do Hans Bjelke nyapesik ke brinuga ko buga titlanid. Kotlebik va exulera titsuyon ic levesid elimapon stragar. Voxen wupe va sin pitcar : koe levesidaf derost, narason va joyaja riwe eglud. Gonampud kiren sinafa ickrilena lavada illaumapar numen rontion zo dratced. Axel va klita tere kosmar numen va rob gire rovotadler ; voxe moion eglur ise bakawer abdida va stuvadositik liwe lajukatrasir. Toleafa pakava Radimi bata zixa, bat baroy koredik ko seg kotraf gu seri ke abdiizvaf nyul artlanid. Pok milkava dem apta ke balemeugal ik bareugal artlanid. Tere va nubema trasid, i va nubema gretcayana gu yolt ke sutesik va nubasuteks is migajeyxa tisa xanta ke bata brinuga numen batcoba bazecker da moo joyanya tigid. Viele va brinuga van arula miwana koe migajeyxa fu dakid, pune kosmad da runexo tir elekayano gu noeltafa yazidatraspuxa. Va divroidaxa kofaved. Goxe batcoba va loa bliga drasura nekir. Gan runta zo doimpadimad nume va sinaf ankit me rodegaded. Tere divbuga ke Stromboli italiaf tculk ile geepon Islanda zo divmimad. Ticion, ko Hamburg malafa widava dimlapid lize zo vankieved. Koredik Otto Lidenbrock kotlebik To dalaf koredik ke berpot tir. Tavesik va kawopa dene Johannaeum olda ke Hamburg, tis ziavikye ke Axel, gu ozodaf aptacik ke bat ind zo atoer ( va aptacik dum Humphry Davy nobar ); tir grupelapaf is jonavus ( bal rupa, va savsafa islandava is Runa sutera vangruper ise va latinava is danmarkava is islandava djubelir ). Voxe dere tir mivdwis ise va volkeafi is kategisafi is zidesafi rali dir ise va gubefa pestaka dulapenser. Va intaf ind skeur, va mewayasa kuranuca dikir ise someebgar. Darpe koyara bene Axel adre tuayawer. Axel In tir gadiskaf is nutaf gu Lidenbrock kotlebik, ise pwadesik va berpot. Va gruperapa va sidopa is kawopa dikir, i va grupera deayana gan ziavye, voxis va pulukafa araya don latinava. Tir aulaf is becaf loon dam Lidenbrock beka gan pestakeva dile zo ilamsisker, ise gan beksasuteks tore zo dulaper. To int va staksa ke Arne Saknussem gribeksar. Jontikedje wan tir prealaf is mefolidjaf gu rotisa koyara koaskina gan ziavye. Va in ta brinuga ist Tawava soe dositar numaze lieke adre tuseramawer ise va inaf ayaf dugeem bal wavdaca saber. Koyara ke Axel isto Tawavo tir teca kotavesa exulera jupatasa da in male yafa krutuca adre vanpir milgackik silukon grudeas inde va bula ke nanda pu Lidenbrock kotlebik pebur. Hans Bjelke In tir tcabanesik va nudol ise koe Reykjavík gan Otto Lidenbrock wetce nyapesik zo vilter, pirdayanon gan Fridriksson inaf dokobasik. Tir bareaf bewik ke brinuga ist Tawava. Verne askir da in tir matcaf gu sagaf is abidas zanisik grupaskis va kotcoba ; va bli ke felisik konakviele giwar. Hans dere tir viwazenik ke milasavsaca ke bane sare icde islandik : upakapaf is vurkapaf, ise nekev kona kosmara iku iyela, va meka kontega bal koyara relmer. Watsa koe berpot Xuta aotcesa va opa is tacukuca Bata sorda va jontik fiuk ko xuta riwe tacukafa vox kotviele koswana gan enuca konakilar. Konak vayas ik kowedis ind zo uned enide koredikafa anameda opon zo vayar. Va arulopa ( opa kaaneyasa is tcalutesa is vestasa is vayasa is liwotasa is worasa va levedafa betsava ) is seriopa is kawopa tulon romiwat. Klok dere tir watsapa larde koredik iskuson zo bured, tulon koe ironokafa pakava ke berpot. Lana tacukaca bam kofid numen opa adre zo ilplekur. Vundafa ra is kotavesa nega Va vunde ke bata stuva dere rokatcalat, i va vunde roradane gu kind ( nega ke izvafa ik vundafa stuva ). Vestasik bevulad gradilaf koredik : Axel vas Teseus vektar viele koe buga ke tculk tir egluyun ise loeke djukukatrasir va Marthe abegya ( Ariadne koe vunda ). Katrasitison va drig, inaf kenlanin fem bantode tir kuksa. Milinde, koredik laoned viele nope idulap moo levedafa kuksa totad. Bet grupenik va Odusseia nega ke Omeros va dank ke biralorikya tuoviskas va totasik dimlapis kal Itaka kagruper. Icde Axel bata stuva tir teca koyara kalplekusa va lukruca, is kotavesa nega ( neginda jupasa da belisik va towara ke dalaf koredik van lokiewafa gildara va tamava ik dilint suzdar ). Ostik to Axel enwe tir dalik tere naris va taneafa yorda bas grupeafe ziavikye ilfelise va dalintafa divdomawesa seramuca. Tculk wetce leca ke vundopa Tculk dere nutir lana leca ke vundopa koe nega. Va gijarotiuca is po ke tuwava kaatoer. Remi berpot, tculk ta tulecara va titsuyuca is birtuca ke Tawava zo faver, voxis ta buda gomoticana gan koredik kal mukot. Tculk wetce aldaca ke rietova ke Lidenbrock kotlebik ko berpot taneon zo koplekur, gan Lidenbrock folis da idja ke Tawava co tir welfa dem delaplawesa yazida. Bat envaks va drolera ke vundopa mu vilasi roti ke tuwava tcazedar, voxis va rotira ke Tawava ta warzera va zultafo po. Darpe titlanira ke koredik ist Tawava, tculk vanpir leca ke lyumara ke tuwavaf poeem is ayafa jugemera. Koredik kal artef mukot va yazidafa kuksa goremlapid ise va raporaf narilt goremlanid, numen batcoba va sinafa rantuca kabdue gijarotiuca ke Tawava koafir. Batkane tculk sotir leca ke birtuca is listuca ke tuwava voxis inafi vilasi roti. Yunkexa Konaka yunkexa va berpot, koe piskura ke 1892 Dere rupel Jules Verne : Francavaf suterotik ( 1828-1905 ) (fr) Koyara ist Tawava, dene Wikisource ( xantokrent ) Vuestexa

Koyara ist Tawava XANTO Vergumvelt Voyage au centre de la Terre Sutesik Jules Verne Ava Francava Suterotinda Berpot Evla 1864 betara teza   Tuveli icde Suteroteem  Moek ke xantof piskuks ke 1864