Stedasik va Duna bost tir ardialaf berpot ke Jules Verne sanegayan bak 1908, tis tana karba ke Yona zultafa koyara nevatum.
Bat berpot tir kaikiawalkeraf, vey nubasuteks ke Jules Verne, vox fabdupuyun gan Michel Verne nazbeik.
Vildeks
Sigmaringen, 1876. Ilia Brusch ozodafe magyaraf onasik va elice grustayane gan Dunafa Gluyista war numaze va volpestorafa morbera koaskir : 3000 decitmetre moo Duna bost, anton blidason va onaks. Voxen vielu kota sokta va zobafa ik gomilasa ik raklesa runta idjon ice Europa divulon toz dotegalad, pune Karl Dragosch okilik ke bostaf ardial va bula ke bat totuk is kerelesik lasuremrur, is ke bat manaf is vurkaf Brusch redakik...
Koredik
Ilia Brusch : ikon gu Serge Ladko, gradilikye ke berpot, i vodoraf onasik wayas va onarafe elice ke Dunafa Gluyista. Budar da va Duna bost di katitlapir, anton blidason va onaks... Varafa bula ke berpot niter kosmara va inafa ageltucafa pilkoma, i va tela ke Serge Ladko balgariaf gugafamik goyates il turkafa tolgenira, nekev vofe zae is rena ke Natcha kurenya. Voldum lanera ke Ladko, ina me tir musedafa , voxe enwe wupeper radimida gan Yvan Striga an inaf volnik al zo gralomer.
Jaeger W-ye : ikon gu Karl Dragosch, i welimaf diveik drageyes va viroyara ika rundanyara va tota pu Ilia Brusch, enide gu kota dolera va onayan kabay koe kot greelt ke koyara di zo dulapokar. Enwe to Karl Dragosch ardialik tir, i lokiewaf kogrupasik ke bostaf ardial batkane ternas da va tozekaf okilik guines va bost bak bat 1876-e ilanacek di onser.
Natcha : kurenikya ke Serge Ladko, gelkeon facnayana voxis gojena gan Striga volnik ke Ladko.
Yvan Striga : to ikorik ke rupa tir, i tcordik saredjeyen gan kurenikya ke gradilik. Batdume va kevlik gion vidjeper eke va kasafa kotcoba uculegatasa va Ladko di askir. Enwe to int tir zobas raplekusik do yelipa keno Duna bost. Endayuca is ardialafa gritera ke Dragosch askitir da Striga di zo basxatcaxar.
.svg){kind=icon}
