Lente nilt (suterot)

Lente nilt Lente nilt tir stuvaf berpot ke Jules Verne sanegayan bak 1896, tis tana karba ke Yona zultafa koyara nevatum. Vildeks Thomas Roch tir francaf gandusik sopus indon gu sayakuca ; inafa norlafa gandura va tufa is aliuca co vanburer, voxen inafa laumasa bakestuca ke gijuca jupar da kot tuvel ke eldeem koe Europa is Tanarasokeem zo buder... kiren meke bowere va granafo dro ikadineno djuprododer. Acum bowere ke Washington va Roch kobuder lodamen in va ara gijarotiaca loon luridafa gu maldodera va bata artowarotasa divroidaxa co denfir. Rupa koe to tildexe tozuwer lize Thomas Roch jonvieler : divulaf auzusik va in wetce lizukaf rilitik kevlanid. Ke sin, Artigas biptik tir, i tufakirapaf is sposaf korik, isen Spade redakik. Azon Roch is inaf ropesikye zo kigder azen koyara koe Ebba tota kal vask ke ilwalesik : kal bumafa Back-Cup ewalama ke Bermuda tursia. Konak totuk moneon ixam al griawid oke al belxad... Mali ugalam, bata ewalama va vask ke biptik is tozekaf blay zanudar, isen inaf yolt tir vey tazuk divrozas va trovgayana bilaga. Tanoyo vansaxo deolon kosmayano gan Artigas tir erilt valeve lavek. Biptik va midtotafe brube al voner. Midtota yoltkirafa gu tug koe nega, va impokara va Ebba tota bal koyara zo faver. Granaf galzakoraf koak ke Back-Cup va xo kimbar lize Nemo va intafa Nautilus midtota koe Bulafa ewala ar berpot ke Jules Verne al ewalzeyer. Bata ewalama nutir tculkafa kiren vikiz va sfelt divstir. Ropesik kigdeyen keni Thomas Roch, tis pwadesik va lok ke berpot, razdar da enwe to biraf dositik ke biptik va trenaf tey anteyad enide kottan laner da ewala tir runkaf tculk. Voxen kas Artigas is Spade pomane gan Serkö dritik va rotisa iara va divroidaxa ke Thomas Roch djutatced oke divlapusuca mu int djuravaldad ? Darpe berpot di grupet, sokuvason va nega askina gan Gaydon enintesik ( enwe tis francaf dritik dere aun tegis ) koe pone. Roch grupeik govegorar kase va artowarotasa vox vilasa birga ke intafa gandura fu doler oke me. Ostik gruper da konaka tota ke intafa patecta mone Back-Cup gadjed ise co zo robulid. Acum ba kiblara « lente nilt » di tigir. Koredik Artigas biptik : welimaf koredik tukwayas va tralafa gijarotiuca is felis va brube ke midtota ; va koedik ke Nemo divrozar, milinde drolen gan awalkopeso ervo, isen inafa ageltucafa pilkoma bak ajek ke berpot di zo razdar. Spade redakik : pomasik is nayanik ke Artigas biptik. Gaydon : enwe yoltkiraf gu Simon Hart, francik. Tir pwadesik ke rupa, isen inaf strageem bal stolerugal va toloya bareaca ke nega ponad, trabe va san-toloy luz ke berpot. Enwe tir katcalaf dritik pilkomaruyus num vanpiyis ropesik va Thomas Roch, djupodimnarison va inafa birga joke Franca. Inafa pilkomacka mali toza gan kigdesik zo razdar. Thomas Roch : gandusik va fulgurateur warzackafo awalkopeso ervo. Zo kobuder kire gan vewara ke yona gijarotifa patecta gu urlickera va intafa birga al zo tuoviskar. Bat koredik pu sutesik gan Eugène Turpin francaf razopik al zo koswar, i gan redusik va divroidaxa is lanyona buliinda, kostoleyen radimi aktomara kev bowere. Serkö dritik : bewik ke birgafi soli ke Artigas biptik tigis koe Back-Cup. Tir gruon vepokaf is vokaf koredik, belcon nunendas va Gaydon is tixolon koerus. Effrondat : drigokilik ke Ebba tota ke Artigas biptik. Yunkexa Konaka yunkexa va berpot, koe piskura ke 1896 Dere rupel Jules Verne : Francavaf suterotik ( 1828-1905 ) (fr) Lente nilt, dene Wikisource ( xantokrent ) Vuestexa

Lente nilt XANTO Vergumvelt Face au drapeau Sutesik Jules Verne Ava Francava Suterotinda Berpot Evla 1896 betara teza   Tuveli icde Suteroteem  Moek ke taneaf piskuks va berpot bak 1896