Sagondexo (suterot)
|
Zola koe Sagondexo berpot va ligundewera ke selt is aytcura ke tisik dulaper. Parisaf yambudadolelik kosaf gu bliragropeem is ruyatura tid uga ta vayara va warzafa baliinda banvieli grupensena gan suteroteem : anameda is konolerokuca. Va sposuca kan Sagondexo grupeyer, rotir nope bilita nekiyina gan berpot is nekev malyopara ke taltokevafa fela iku ronokevafa. Bata neva kiavayana gan Huysmans is Mallarmé is Bourget va erba is gojena aliuca pu suterotik vanbureyer. VildeksGervaise Macquart nazbeikya ke Antoine Macquart va Plassans koe Provence gola al bulur, do Auguste Lantier fertye is toloy gasuik ( Claude is Étienne ), sugatason va fala ko Paris. Voxen Lantier va yikya jovler, ika Adèle mawadodelikya. Moi doaliera va Virginie berya ke Adèle koe sanegafo tcatexo, Gervaise bam tir antafe koe Boncoeur gida tisa fordaxe ke Montmartre. Wori, xuvanon gan Coupeau vegungikye tise kepaitadodelik, va dofa blira numaze va yerumara finer. Voxen Lorilleux W-ya berik ke Coupeau va bata yerumara kawazder nume va Gervaise fentalapon kevemuder. Vidiara orkon gu awalkedafa larbudara dilizer : muva dur. Joatason va arga, ganenik va Louvre tcilaxe worad, gadenon gan Madinier W-ye savsaf dodelik vanpiyis tilik. Arplekuyun den moavaxa is megrupen grot, glotcasik is tubatakasik is lipoksusik koo gelawa ke bonteem pimton krabed, ixakon ik kipedjon sebuson num dace vurjeson va tcilasusik. Moi rotakafa estura dene Moulin d'Argent, vidiasik va sint griuziad, yatkaf kire va loplekuaca al gododed isen bata adujana yerumara va pirafa griva ke rodjera pu Gervaise isker. Wori exoma tir tanaca. Toloy yik tid kobasaf numaze tuigeltawemed ise ko intafa vreda rokoirubad, keve Neuve-de-la-Goutte-d’Or nuda poke oga ke Gouget jotafe glotcasikye blise do gadikya. Nana nazbeikya fure koblir. Voxen Coupeau banvieli tisu yerumanikany is gadikany ticu kepaita luber nume vanpir kliwik stegen gan walta. Taruteteson va ropexe gu yerumanik, Gervaise va megakseem al ixalar nume va klokana tcatesa dolta me rofenkur. Voxen Goujet glotcasik aun renas va ine, va aluboy franc talolk beitar enide ine koe sidot ke lipokam ke Goutte-d'Or nuda di rotinker, do baroya dodelikya. Djukakevdason va kimtafa vidia viele gan Lorilleux tolonga zo plukeyer, pune fariutuson gu eroyafa estura bozar. Voxen kapa ziliyasa va intafa xultura va toza ke intafa lubera tcalar. Tire mali konaka safta, Virginie do ine nujinepaler ise va Lantier pulvir. Viele edjiiasik gu dolta va int komonar, lize azega al zo inker, pune Gervaise va savsafa rena ixam djuprokempar. Fure Coupeau, mewisu ok puvotesu, va Lantier den tubatakaxe inker, numazen Gervaise boikene gan izakotuca ke yerumanye gire vanpir fertik ke edjiiasik. Lolon delfajafe isu vunguse, is rawane gan intaf toloy kliwik vumbes va dolta, pu Virginie gopeyakar aze va tamba dem riftik moe teveaf vegem kazokever. Divplatine gan kottel, silukon toz ruyatakoler edje Nana taneon tiyisa imwebaf ravesik, va yasaf vard jovler ise vanpir tresenik. Gervaise nope krema banvielu cugeke ve vonager : tcokeyeson va muluftera ke Coupeau kosafu gu oviskafa deona, pune ko oviskuca adre flaydur aze tere nope ael is copuca awalker. DrunaraGeltrevaf berpot ?1. « Taneaf berpot rotuxadas va sane »Buntuna gu puvotesa divnedira va « prazdafa eepta ke copuca is parodjuca inde wawik gonokrulder » gan Hugo, Zola koe abduekrent ke neva moakler : « Sagondexo tir taneaf berpot icde sane me rotuxadas is divdaakes va dakela ke sane », ruyer. Godjon kevusa va klokedjuca ke Hugo viele Jean Valjean savsaf xaltik belcon vanpir suptaf tumtik is kulapaf jokilik, Zola va mepuvotes ageltucaf grabom mopoyer. 2. ValdigaraVa wawuca gruper kire koe mintila ke Latin revava bak jotugal irubayar, va stutera kabdue sinkiskafa tinida gruper, is va vage burene den sodegaxe ; va sanefa lida kan gadikyafa yasa dere gruper, is kan kurenya rotir tiyisa gritebik ok imwebik ; va dodelafa blira kan aultovesa valdigara don tulon lana neva ke Denis Poulot savsaf dodelik suteyes va Sublime ou l'Ouvrier tel qu'il est en 1870 moekote gruper. 3. Bagalas berpotVoxen, kaike valdigafa geltreva, koe Sagondexo berpot va yunkera va rietova icde bagalas berpot trasit : va dodelik merotaf vox mekiewaf loon dam aryon narat, ko avonasa anameda ke gasta estobasit, gu posara ( walta tukliwasa va Coupeau ; dimlanira ke Lantier divmodasa va gelkeugalaf tacedik ) levplekut, numaze wit inde sin vey konolerokuca is rali kategid. Anameda, konolerokuca is rali koe Sagondexo1. Vrotsondafa anameda ke gastaParis widava ke Sagondexo tir tela ke tuvel is vlardaxo kabdue rebavega aname widava zeitafo gu kot mordaks ke puve is gomil : sirta ke Sozapa is « iera ke adjubenik » dile gildena va batcoba vrutad. Bata vrotsondafa gasta lize alitasa dakela ke sulembaliexe, lize Lariboisière ropexe zo vegedur, titi berpot va orikafa kesa zida inker : Gervaise jovleyene gan Lantier koe fordaxo ke Boncoeur gida va intafi bali abdipestaler : « dumede inafa blira batvielu batlize dilizeter, wale baliexe is ropexe ». 2. SagondexoNumon Gervaise ebokon al wir. Dum bonol sagonden koe baliexe, gan nasmerlafa anameda ke gasta fu zo sagonder. Sagondexo ke Colombe tilye va rotafa turestara elodena va ine ton ant int vilder. Ruyatiasiko tir degraf erbilok ke flovaf nekieem ke anameda, dem « orikafa siva » is « perakekoraca kevnisa va sid », dem bate koefe buze rankene gan mek vikiz. Vere Gervaise kabdue « burmesiko ke oretlik » ke tugrijas foalk suster. « Brigaf is gijarotif is apulvaf kobasik » volrocuesino ruyatiasiko va kobarapo ke korik levrotin gan lunte gralomer, i gan bat « lutaf jivotap » tis intotce ke tcema. Voxen Sagondexo osk me tir antafa zazda ke Colombe tilye lize korik kan krema va int sagonded, voxosk tir gritatcatexo lize Gervaise is Virginie kan aliexa va sint sagonded, dere to megalodaf lipokap ke Goutte-d'Or tir, tere to idularsafa dolta tir lize zionafa grita alitasa is lidafa parvuaca zuvdawed. 3. Talolk ticmiman az akeoyes mo abduak ok radimakGu lanuca ka anameda, Gervaise is Coupeau va takreluca taneon tcaked, voxe tis kosaf gu blokayana konolerokuca, fure xomed. Nazbeik ke Macquart izakikye, Gervaise veyon eter ise tir voltaniafe : « gu ticmiman talolk va int dolaneyer, i gu talolk akeoyes mo abduak ok radimak kare xuyava ke lume, » ~ Zola suteyer. Coupeau ton lesay ke « daavaf vakol is luntik » luxeon tir, is dis va « obliuca is arouca ke jidol », nume va teca taneakafa sulemuca vider. Ison sedme Zola tisa belisik va Darwin, ant lotowanaf tisik va kuranuca sodid. Mali kobasafe sane kali avonan dodelikeem1. Ralidusa prujneraMali seltafa ticfira jali aytcura, Coupeau tolonga va ekaveem mali kobasafe sane kali avonan dodelikeem exuler : koirubara keve Neuve-de-la-Gouttte-d'Or nuda poke Goujet yasa tir keni ralidusa rekolapa. Raliduwera tir to vewara va kota ilamotara, dere tir lidafa favera va ugal. Alkafa atayera ke Gervaise va varla, « dumede trilnaxa ke trayka al kadayar amuda », va dodelikafa ceakaca ke beden kobarugal lecar, i ke ugal dirotan dene kaydeak preyutayan leve trivapoz. Viele gritatcatesikya kalubeyesa koe meem ke Lantier va intafa bagaliuca diten sugawalkayar, pune varla koe warfokam ke edjiak den sodegaxe zo bureyer. 2. Goyol KapaGoyoil kapa tir taneafa bora van pufuca : azega to koe dolta zo tiendur voxazen fure sumkretsa va yom decenad. Djuseluson va Lorilleux tolonga gu mantukaca, Gervaise me klibur da erbabeitutuson va kureraxiz, va Coupeau gadya stakser ; isen remi bata durgara ton dure traspus vor « dum kuksa moi muvacek is aelera ke tawa », viele jivot darpeon adeed, pune kotcoba laizon tukevolawer : lesay « oltavafa gu dey », griayan ganenik va wetan sulem vombeped, trabe va to Gervaise, numisen kottan va ki nudivburer. Kiren, dison va « latkikyafa almanya », goyol anton tir ikasugdalara va gritatcatesikya : Lorilleux tolonga « va azekor is azega is dolta co koartokayar enide va Alestajya tantomon di rawayar, azen lan karvol fegalas va niska remi mielcek ton lorara ke intaf geltameem va sulem ten kotawayar... ». 3. Mali Tumtaf Toleaviel...Kostayan gu dola ba kapa ke Gervaise, Lantier va kacaxa va avonara va dark is ugal di vanburer. Kereleson va mawa ke Étienne, taneon vebar da Gervaise va zionafa grita flavayana koe mawa ke jotye lev intafa ilava di gorundajar ; banvielu vangiltayane gu dakela ke fogra, dere vungur ise foredoner ise bozur. Alitawera ke grita ( wadja ke telyona ke gasta ) va ine rem witcoeem ke alma kostir. Re inafa puvegura tir « zavzagira ton ezba », inafa xeka den sodegaxe tantanon zo bured edje Lantier orkon gu vewara va savewera va Coupeau ko alokafa didara zazdazazdon doimpar. Zikara adre vanpir ne ke tolonga : kapason va « Tumtaf Toleaviel » remi varafa safta, « ganduson va tumtik ko jara », sin va bocafa eka ke struca titfid. 4. ... kali bocafa kapaCoupeau tolonga adre kadar fistukaf kapolkik laonesin gan kapa. Drolene gan intafa izga stutesa koe nomararsa moe bedom, Gervaise va Coupeau « fure awalkesu efuyunu » is abdiawalkesu koe Sainte-Anne ropexe trasir. Dere rupel
|
 | ||||||||||||||||
.jpg)
.svg){kind=icon}