Jivot ke Paris (suterot)

Teliz mal Wikipedia.
Jivot ke Paris

Vildeks

Idjaf gardap ke Paris, zovdaks ke 1862

Florent, jotaf klokusaf sanerotievik sopuyun bal kevsokara ke 1851, arti stolesa perda va int al divxaltar. Artlapison va Paris, va Gardap mialukugalafa revava romplekuyuna gan tuwitara ke Haussmann nemon kagruper. Quenu berikye va Gardelle bulolatelonyik konoleyer aze va Lisa Macquart kurenyer. Bantanya va jwa ke sinafe ziavikye ludevon ice tueipaxo kosmayar.

Sudafa Lisa va altokafa volalbara va mazdaf Florent tore satoler. Wori toveon djumuper. Voxe tunodrayanon gan inafa kliwuca, buiver da in va play vas kodisukesik va kabay koe Gardap malnaler. Miltan vanpir vefaki ke tukevlara ke bulolatelonyikya va Listafa Normandya, i va kabaydolesik gilabudgasa va dalint.

Ixalason va ayikyeuca gu rietunaca, Florent va urbera va gindaxo kloker nume va zazda ke Lebigre rankesikaj nobar lize va lan sanerotievikaf tumam.

Rankeyenon gan yona dolesikya tabisa va bate mazdikye is gan Lisa balvesa va dimerbara va konoleks, Florent gan ardial zo sopur. To Claude lingesik tis mazdafe nutikye ke bulolatelonyikya prujnembe va berpot : « To man tozekik tid teldik !».

Drunara

I : Jivot ke Paris, « Ctakafa yalestaca »

« Ax ! Va kotcoba wit ise linget !!»

Émile Zola klokayar da va redunikeem ko « kotarnap » ke intaf berpot co dimbuder. Doleks ke cadimeem is tawekeem is Gardap ke Baltard is trapova ke Tamefa Wonara, kabelcas va darkeem is ugaleem, va inafa xadolafa kuranira va « wira va kotcoba isu lingera » malskud.

Pularopafa pimtara patadasa va yolt ke kabayinda tir xekacka ke bat tuwavevaf frimaks va tamava, i va frimara tutrovgasa va prostewafa naeluca ke berpot is levbenplekusa va nega gu pimtara.

Voxen valey yoltara ton teca pulvafa yokagera, ale « lingera » tir : siuda dem kabay is sirga dem wivga va dribuse ckane ke yalestaca ke vlaanderafa XVII-eafa decemda dimnarid. Koredik ke Claude va bata listopafa kruptera tumalyar : Marjolin warzafe ciastoadolesikye tir moavayafe dum kon lingeks ke Rubens ; Claire listafa kabaydolesikya vas « ketikya ke Murillo » vektar ; isen Cadine rosteladolesikyama dem « blekoraf » kutceem is « ranetekoraf » oblakavarduk rotion nutir male Idulugal ke Arcimboldo.

Litevafa disukera

Gard ( Les Halles ), trutca gan Léon Lhermitte, 1895

Ton mialon Cézanne isu Manet, Claude va litevafa disukera gu bate tame koplekur. « Nartafa is ilamtafa » moplekura skuyuna bak lan kristnazbalavielaf sielcek koe bulolatelonya, va tizafa kevaxara ke karafa kseva albayana gan Cézanne gu cultimkorafe tame ke Lisa koplekur, isen « volwalnafa » lebuca ke ifapolya, tisa ikasugdala ke mewerkafa lebaca ke Manet, kev « tcorkorapafa albanaca » ke lentos beonur.

Zola va doaliera stayana ta rojura va witafa yamba tire me vulkur. Pimtason va « granafa jenukafa renta tufaltawesa moe firdteyka ke ticawaltara », va trutca ke Manet dakter, i va Litera ke ticawaltara atoetena bal taneafa « litevafa » wonara bak 1874. Va azilafa is trivafa vegeduropa runrojur, kev korik trakus da « va yamba kan opa someaskit isen raba va ezlopa sokaytar ».

II : Jivot ke Paris : « Kevpestakevafa exaksara »

Tuwaveva kev pestakeva koe Jivot ke Paris

Neya ke Zola kamamad, koe vergumvelt tis forgafo kro ke Wevala ke Paris is akleso va rietavafamuca ke Hugo is inyona mialukugalkorafa klokara. Ikaplekuson va « amuda ke jivot » gu wevala ke swava, i berpotik va lan blayak ke Hugo jlokon dimnarir : i va « Batcoba va bancoba aytatar », ruyeteson va kevpestakevafa voda.

Mistadankasya is toloy bronazbeik, Marjolin « trasiyin koe kuntatum » is Cadine jovleyene « leve kon tuvel », tid mudzeyes sordik griawitis lev sukapa ke ageltuca ke tuwaveva : « Kota volmiliduca ke savsafe Innocents dolexe re tir kotawayana, ~ Claude diviegar. ~ Koe idjaf gardap tigiv, i koe bat jenukaf ctakik, i koe bata warzafa widava maneke tanuskafa. Beka fistulik kalickid, varafe sare batlize tigir. »

Florent is sokasanefa « ayafamucaja »

Otceyes xaltik, dum Jean Valjean koe Yon sutik suterot, tir dalaf koredik ke pestakevafa gesta. Jupason da Florent va Paris kolapir, « senyeson moe rostelafa ilava », dum atelaki vawale doaca, Zola va pestakevaf gradilik divuskejar. Sedme in to rietunaca tid vuka ke Eaftuca. Florent tir oc ke 1848 ise tan « koafiyin dewitcasik tujdes va artowara dum warzafa alka zijnafa is giwasa ». Voxe edje dene Petit Muche zazda « va wanaja dem suxaf blayakap » celkar, pune va enbifa vol romoliker ise va wira va fortey ke dirbeko me tcizar ; anton tir tec Don Quixote kevaliese va « sukarn ».

« Sokasane titir tuwavevafe edeme me »

« Dodelik ke rietava » rewas va « rolaf tazukoy pu mekruldeyes ayik, i pu karaf solgrupeks », va ayik waveon ok gaveon djusteged enide sin vas sinyona klokara di vektad. Dum Charvet kalpokoles « va sandafa artowasa torkeva ta giltavera va patecta dum Franca gu nuyuca », sin va Sokasane gu « aklaf flint kabdu klibuxo » co askid. Ant « dodelik ke ageltuca » va ayik mevurseson ronared nume kan rotuxasa rietava me djunyofad, ise va nuyaxo mu kottan gruredud : « Sokasane titir tuwavevafe edeme me », ~ Zola kaliyir...

III : Meldara ke sudik va mazdik koe Jivot ke Paris

Lisa, rune bulolatelonya

Voxen ayik sometir namuloloc ! Leve duplu ke seltay, relkik batlize tigir ise va lujdik kolanis va tawavo djupromoebidur. Viele Florent va dolta ke berikye kosmar, pune Lisa « rune dolta is gisa va abrotcerse ke tuvel » dum obleda is erbilok ke biuxo, va rielaf awalt impavantar. Obla dem idatcolafa talga lizu atela rumkawed, vrutar da zugafa mola kake kazafa kicera is glastafa telduca va int preyutar.

Rupa ke weltikye estuyune gan relkik

Lisa tir purda ke doltafa Franca zobeyesa va gindafa vertuma nekev zuguca ke rujara. Volson gu « rupa ke weltikye estuyune gan relkik », epura va oyta va durulafa klecara va lidopa ke sintaikeem tadler : edje Florent va nakera ke xalta, pune Lisa dem jiluca metuwidlana zo boiker : « zaday kotraf gu lesko is atela dakelajafa nutiyid griporas tove intaf estusik ».

Wale Bruegel is Darwin

Lana darwinafa wira va pulalyumara va Jivot ke Paris koswar. Sebuson va kornara kevusa va kabaydolesikya gu warzafe kodisukesikye, Claude va watsa ke lan gretcaks ke Bruegel katrasir : i « va yon Sudik keve azega ton divdomawes tcor is aloyas va tanoy Mazdik dulkon vox pirton kolaniyis is vektas vas tec nesey vanmiae lane fixufe sane ».

Bata kobupara va berpot va sugdala drigdar : sanegara va Xanta ke katceem bak 1859 va eaftafa rieta ke Malthus tire vanfolayar : « Ayik mea rokogestun gan yasa soye tir slikaf moe tawava. Bal lorot ke tuwava, mek zoratc mu in zo tiendur. Tuwava dirgar da in gomallanir, numaze fure miv koskur. » Divblira va Florent soye tir « tuwavafa » tenulera ke bata lyumara va kruldera firdayon gu diroteva is gantafoalk.

Gardap : lano logasiko

Lani blibrubefi gestaroti va berpot ke Zola tire levgildar. Gardap belcon nijud « tec zarlayan gulaf yantaf jivot », i « teca takra yatkon gaelesa is kabusa va blira ko litceem », is teco tuidulasiko « ta logara va sane ». Kiren mali Lavoisier, trakut da logara is gaelera sotid teca anteyara : alto va anteyarot sokanteyar, i va vala ok sinka, gu keraf fortey vaon artazukar aze va bebatie ik lanyeyaf zavzaks divimpar.

Gardap artazukayan gu alitasafo cotxo, ton stezaf lanyey, va logasa abduxoa tenuked. « Bludafa dricka » kitcasa va alitasafa kapsa ke begardasikya ke revava tir ikasugdala ke kevpestakevafa vadjera ke Jivot ke Paris : « koe iyepta ke oruzafa gaelrustxa » lize « sersaf » dakelekaj ke bluda kaikfelir, to gaeloy ke vertuma zo blokad, i to kota daava ke doltaf jivot koe eaftafa ageltuca razdawed, malmimason va Florent sokasaneevik dum aytcak.

Dere rupel


Jivot ke Paris
Open book nae 02.svg
XANTO
Vergumvelt Le Ventre de Paris
Sutesik Émile Zola
Ava Francava
Suterotinda Berpot
Evla 1873
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Jivot ke Paris, taneafa xantofa piskura bak 1873