Klokaks (suterot)

Teliz mal Wikipedia.
Klokaks

Klokaks tir berpot ke Émile Zola sanegayan bak 1888, i san-teveafa karba ke Rougon-Macquart yasa nevatum.

Vildeks

Sontera is wenda

Klokaks berpot va watsa ke alka ruer, me ton coesa is skaltesa keska ke Derka ke Mouret gertikye vox ton ageltucafa wenda ronekina gan sontera. Sutesik va Angélique Rougon tis nazbeikya ke Sidonie Rougon dovey megrupenik nakilar. Izva koe wida ke Picardie gola dilizer, i koe wida yoltkirafa gu Beaumont nuyon koswavapana gu Cambrai widava icde vegeduropa pimtana gan Zola.

Jovleyene moi koblira, pintafe Angélique pu Sanegafa Tcicera kizeyap taneon zo odiar, aze dene gestusikya zo rundar aze dene imwadolesikya. Rabier bareafa vedgobesa yasa yander numen ine ba miel ke Kristnazbalaviel kal tamba keve rebava ke wevala gelbeteson otcer. Hubert tolonga moneon irubasa va ine koemuder. Tir nazbeiskafa is lorbapafa ise torigir da bata kakevera en tir vedistaca nume va siwikyama di djukutubronazbear. Ine va bata yasa vere vanikatcur, i va yasa exavafa gu alkafa fidera isu zikera.

Angélique koe bra

Hubert W-ye va koaneyara icde darekeugal ke Angélique laneke askuter aze va kosmaks stivar. Pu Angélique rotuxadar, kalison da inaf ageltucaf gadikeem tir awalkeyes. Ine vanpir fidesik nume va cuisaf grabom di epur. Aulupur, klokason va tokafe mempese sersikye kulapafe, i va klokara koswana gan rupa kareizuna gan Hubert W-ya.

« Klokaks » ton Félicien di sokir, i ton nazbeikye ke tujradik tise trivalingesik. Voxen sinafa rena gan toloy gadikeem me zo vanovar Hubert W-ya trakur da al pursayar kire me al bliar larde mesporayanon gan gadikeem kureyer. Milinde Hautecoeur tujradik gadikye ke Félicien tugertaweyese kadimi muluftera ke kurenik, me askir. Numen kurera me sokir. Nope bata levpoura, Angélique zo troker ise va rena me rovemuxar ise me rotugalar nume vion di griblizer. Nope tubemuas sok ke yikya, gadikeem tere fined voxen gaverson. Moi divlanira va uja, Angélique koe meem ke Félicien kurenye awalker, doon walziliyison va taneafa vox bocafa kutcara.

Neva tir to trelafa, towasa koe aftafa bra dum tire klokara dem jebes anamez. Bat ixakackaf berpot en tir eze arak ke tum, ton lan megubef martig ke Zola. Tir teca trelafa rita is tildera, abdi gire inaf tuwavevaf martig titis ke diref Ayasulemya berpot bak 1890 arti tolda.

Dere rupel

  • Émile Zola : Francavaf francaf suterotik ( 1840-1902 )
  • (fr) Klokaks, dene Wikisource ( xantokrent )


Klokaks
XANTO
Vergumvelt Le Rêve
Sutesik Émile Zola
Ava Francava
Suterotinda Berpot
Evla 1888
betara teza
  Tuveli icde Suteroteem 
Moek ke xantof piskuks ke 1888