Kalaxe ke weltikya (suterot)
|
Kalaxe ke weltikya tir berpot ke Émile Zola sanegayan bak 1883, i san-taneafa karba ke Rougon-Macquart yasa nevatum. VildeksOrka dem betarapa icde kazasikTegira wali 1864 is 1869 dilizer. Denise Baudu jotafa normandikya tol-sandafa male Valognes ko Paris do san-tevdafe Jean berikye isu alubdafe Pépé artlapir. Sinafe gadikye gedise va biaxe su mulufter, arti tanda radimi awalkera ke gadikya. Pomatason va sin, Baudu ziavikye al suteyer da Denise va rundak koe dalintafa vagefa dolta koe Paris co di rodikiyir. Voxen mali tanda, arienta tenulejer numen ine va Denise mea roseger. Volson, Kalaxe ke weltikya dolexepe gadene gan Octave Mouret ( nazbeikye ke François Mouret is Marthe Rougon ) tir trigapafe eke va doltameem ke revava toz rawar. Baudu gedisu va Vieil Elbeuf dolta lenteon tigisa, gan tantanafa tugijara va dolexe stane gan Mouret zo tabodjar. Enwe va tozafa dolta al gruper, i va dolta zabduyuna gan Deleuze berikeem ugale ina tiyir pinafa. Azon Mouret al vanpir pilkotik ke dolta, kureyeson va Caroline Hédouin nyobrikya ( kobl- Deleuze ) kadimion muluftetesa. Baudu zo tabodjapar moekote kire va prostewaf kazaf ksubereem dun suver, ise va dolta ton ayaf lum djukugumilar. Kaikion, lan bewik ke inafa yasa nope towara ke kaza fu zertud : dolexepe va sinafa rawara adre fu nekir. Medrikafa toza ke Denise dene dolexepeDenise va rundajk dene doltama me trasir nume gorar da va Kalaxe ke weltikya dolexe ta kobara gukoer. Tuke Mouret karolayas nekev inaf tawadayikaf kor, ine dene askedasa brenja zo seger. Voxe va balgera ke dolesikya nulesa va intaf perfejuleem is mefakon usukotan usuk golevgar ise va meka zolonafa dolera mbi isker. Gan emara va grisoayana lioza zo cuesir ise sielon koe mawa dun poler, dwison va turwira va kosura va Pépé gododena pu guazikya. Jean va inafa piksa luxeon me gildar ise va erbapa ta verkara va renafa stuva dun erur, kore ine volfakon vaon war. In va berya nuboker, pimtason va volageltodafa is lugavafa skujera. Denise va weboka ke bagalt bam mielon gonasadar, i va kobara agralon zilina gan Robineau papleketikye ke brenja dem leso. Va pestakafa gaara der tozur... Do Pauline Cugnot nikya viunsusa va gritolk, va renafa rupa ke intafa brenja toz dulaper. Bantel pirdar da ine va fertikye co gonarar, pomoyatason va erbolega is selton ticfitison. Voxe Denise va mana rieta me kevnaler : va mielafu cu epusu va weboka ke bagalt abdualbar. Soe lana dofuguca wal ine is Mouret adre vonewer, voxen sin me grupad da batcoba enwe tir korenaracka : tire va rena me al gruped. Denise wan tir ixakarsafe voxisen ozodaf Mouret va eldeiskafa rupama luxeon anton al gilter. Denise va Robineau jontikviele ( memutceson ) auzur : Jouve stujesikye al katcalar voxe va gadesikeem me munester. Tire febapafa verta al zo exoned : me ginelara, me fertik, kottan mielon gokeniber, ikz. Bak pereaksat, Denise vuder kiren to agaf cadim tir, i rekola zeitafa gu tarulera. Bourdoncle duxase ikagadesikye ke Mouret va manyona tarulera rofaver, ison va Denise me karolar. Enwe Bourdoncle va benplekura ke Mouret anton skur : bantan va ewava ke gadikyef tilik djuvider neke va pak ke unenikeem megatason djutaruler. Lanviele bak pereaksat, Jouve va Denise skedegatason xuvar voxe mbi kalvewar. Tir yatkafe nume va int djujaxadar. Kadimion ba miafizestura Jean va Denise kevlanir, ware imaxutuson va erba. Zvak tir to fisu nisu ruyesu da Jean co tir fertikye ke Denise isen Pépé nazbeik ( korik me gruped da sin tid beraf ). Tarulera va DeniseDenise gan Jouve zo onser ; bantel pu Bourdoncle batviele munester. Denise batdume zo taruler. Batugale ar koredik va krenuguca ke Mouret mu Denise toz pestaled. Jouve abdialbar da va Bourdoncle lodam Mouret wir azen Bourdoncle, merupeson va Mouret kir kivason va inafa tinesa kuranira tove ine, va Denise davon taruler. Mouret al tir kosaf gu intaf bolk : givanon gu tarulera va Denise, va Bourdoncle bam zidegar kire krupter da batcoba tir yovara kev inafi roti. In va int cenkar nume va Denise gire djuproseger : batcoba sedme Bourdoncle tickir divulafa tila. Denise al klabur da pu Mouret pebur voxe tere me ebler. Bam Denise va mawa dene Barras lizukedur, i dene yambudik epus va kevumuva. In va ine dace sodegason seger. Denise kaikion tir dolesik dene Robineau kalusteyesu va tana dolta ke revava. Bantel, pomanon gan Gaujean moraf layesik, va Paris-Bonheur lesolay ke Mouret djukukoznar. Va lana lesoxinda dere redur. Voxen Mouret nekev ciwara ke unenikeem is ilbedera va erba, va dro ke intaf warzeks tuomar. Azen Robineau silukon askir. Voxen Mouret tere va etsa war numen Robineau zo rawar. Arti tanda radimi tarulera, Denise va Pépé koe Tuileries gerd dum gilton gestar. Banlize va Mouret lanis den Desforges W-ya fertik xuye kakever. Mouret va auzura kagaver ise do Denise gozar. Drager da gire di seger ise va dolexepe flider. Batviele sonker da « inya va inafa takra tuidular ». In va betcoba kalir, slasitison va gemelt. Soe tere mallanir, kozwison va Desforges W-ya ticuon dizvesa kake dilk. Dimdenfira ke Denise va Kalaxe ke weltikyaKadimion Denise wetce kuban dolesik va dolexe dimdenfir, ta daava ke Mouret. Batcoba tir dem rotoda : malida Mouret pulvir, pune kottan tinter ise va ine kan ita aneyar. Pauline va lickuca ke Denise yoton tucuynar, pimtason va rinteem ke Mouret tove Clara. Deloche dolesik va talgukay nesase va Denise dun tir gabentafe. Desforges W-ya ko Kalaxe ke weltikya lanir, do Bouthemont papleketik, witison va debala wal Denise is Mouret. Va battan kalkereler ise kevon lasuzenkar, « buiveteson va Mouret gu inafa levcoera ». Bak mil sielcek, Mouret va Denise gu ikabrenjokilik koflir ise lasubrostar voxe zo beldar. Nekon Denise zo romplekur kire va in renar. Ba viel ke frimara, Denise va twa ke Mouret kazawar, i va koganera ta sielestura do in. Va vunda ke mana esturinda grupenar : moi estura, to « eftol » tir, isen Clara is konaka artanya ixam al paked. Denise va gundaca vewar voxe vofar da renar, nope intafa lickuca. Aurélie W-ya puvotesa va Mouret va kakevetca konakilar. Denise wan medjukukempar, nekev inyona sausa pulvaxa isu borera. In va pofa dusiva malsaver : erba is inafa tiyisa mucukera ikz-. Kevon, dusiva ke Denise tid gojafa. Mouret tufikawer voxen Denise va skedegasa stuva vewar. Batcoba va Mouret adre gevar. Lickuca ke Desforges W-yaDenise mallanir isen Mouret gripokolenon sokuvar. Desforges W-ya suzenkar : Denise ta tukalvekara va lioza govedenlanir aze zo pobaxar edje Mouret banlize tigir. Ina va lickuca lular. Mouret tere tenar aze va Denise vinur. Va skedegara va Desforges W-ya joar. Pu Denise yaleper voxen inafe zolone tir volto erba vols rena. Mouret grupansar kiren Denise tir ke megrupena ayikyinda. Enwe in va dolenafa fertikya anton gisekar. Kalafe tenuleMouret gan Denise zo dustuler eke mielon klokar. Bam va pendaropa ke nuca yowar. Fliderapa tozuwed ise Denise va redura va kitcova is koinkera va sabera tukiewasa va blira ke kubanikeem tulon tiaver. Bourdoncle va lickuca ke Mouret lular, kalison da Denise va konake fertikye koe dolexe dikir. Mouret va roklama ke Hutin tis tan inaf drowigaf fertik impavantar nume ve vidjer. Acum Hutin zo tuturnodjar. Voxen bantan folir da blodik tir Denise nume va ine pulvise gu Deloche ikuzese wir pune va int di jaxadar. Va Bourdoncle rozar. Azon Mouret zo givar. Koe bazaxo va Denise bibeper. Pebura kalion vanpir lickafa nyalerapa. Mouret va fertik pu Denise culimer. Ine va mek dikir nume va tretca djukubulur. Mouret dagon renasaf va tuvel obledar. Tere Denise gu blodik ke brenja dem rumeaf aboz zo koflir. Bak lan viel ke dolerapa, wison va Denise viunsuse va berik dum pintik, va ine kuredar. Inafa direfa bulura va in romplekur. Tore Denise vewar voxaze tere malnaler. ZolteraRemi berpot va drolenuca ke Zola mu bate dolexepe satolet, kore ina va ine ton rostaza koartokasa va dolesikya is anelikya atoer. Sedme ina, tcedera ke dolexepeeem me zo rotaruter ise tir kiewaca kore va rawara va aryona kaza is koaykara va olgapafa kobasa gropa nekir. Zola va mweem ke darwineva ko berpot rewar, i va mwa jupasa da lopof ilkik remblir solve lodaxaf di sokawalker. Émile Zola va vrutara icde dirotevaf kind koninde drager, i icde kind tenuwesa mali intafe sare. Koredik
Dere rupel
|
 Moek ke xantof piskuks ke 1883 | ||||||||||||||||
.jpg)
.svg){kind=icon}