Tufa ke Rougon yasa (suterot)

Tufa ke Rougon yasa Tufa ke Rougon yasa taneatomon sanegayan bak 1871 tir taneafa karba ke Rougon-Macquart nevatum gan Émile Zola. Vas jontika giva icde orka ke lo koredik awitis koe arak ke nevatum ruldar. Vildeks Berpot koe sordafa Plassans widava tisa xuta ke konak berpot ke nevatum dilizer. Valey yasafa izva, dalafa rupa vas kevsokara ke Louis-Napoléon bak santoleaksat ke 1851 is danexa tove Plassans widavama tikir. Louis-Napoléon wetce taneatisik va Franca teni artowara jiadayasa va gazaroti al zo libuyur. Batcoba va jonbarafa solparsara koe sagaca ke sanelia ke Plassans is tela ke varafa franca nekir. Oluikeem va gindaroti klubamon zober solve dodelikeem va sokasane zober. I-eaf luz Liza koe Plassans vagee franca bak santoleaksat ke 1851 dilizer. Lana vria lekeugalon tiyisa awalkikxo is yoltkirafa gu Saint-Mittre lizuxo, va rumeik is alizmonik is renasik ikz- jekur. Lantanye dem zelt ken Saint-Mittre lizuxo mielon artlanir. Va zelt palser aze mo trovgayan naboxak debanyar. Sardikya artlanir. Sin tid jotaf fertik : inye Silvère is inya Miette. Inye kazokeveteson va sokasaneeviktum djukumallanir. Leve taelafta gozad, belcon anamplekuson koe beretrafa lioza ke Miette. Kal kima ke widava lanid lize va odjaca tutsokawesa gilded. Batcoba tir ompe ke lanisa ervolia dankagasa va Marseillaise drom ; ina van Plassans lanir. Silvère zo konter. Silvère is Miette van Plassans roykason vulted numaze keni ervolia artlanid. Konake ayikye vabdueon lanise va Miette icde inafe gadikye tugunayane gu pisonara fogreson nuged. Miette vurjer ant viele ine gu dubiesik dere zo duvur. Arak ke vikikeem va inya zober numen Miette gan agralafa ewa re kalina icde gadye zo vanolar. Va irowa kanarir ise neditison va keraf koef agdiz va intafa seila katacer. Kan iteem ke arak, wetce Nuyuca awir numen sin zo vecad. Silvère aneyatason va intafa viltaxa yater. 2-eaf luz Plassans tir dem baroya belca : oluikeem is glastikeem is dodelikeem. Oluik koe kodia gizavzagid. Fouques yasa tiyir matelamidusa yasa abdi artowara. Adelaïde Fouques ( kobl- bak 1768 ) ba san-alubda tugadikiskawer. Tir abigafe ise nuve tir oviskafe. Va Rougon jotafe matelamidusikye yoromafe is zugiafe al kurer. Arti tanda va Pierre nazbeye ( 1787-1840 ) dikid. Rougon arti san-aluboy kureraf aksat awalker nume Adelaïde va Macquart tufertar, i va grijik gigriawis bak rekolapa. Sin va toloy nazbeik doveyon did : Antoine Macquart ( 1789-1873 ) is Ursule Macquart ( 1791-1840 ). Sin belcon nuyapon blid. Adelaïde gideoner. Inaf tawayeem gan deksaf matelamidusik zo viunsur ; ine ganon dun zo dubier. Ba san-perda, Pierre toz torigir da taway is tufa mwedon tid inafa. Gan linularajeem ke yasa is dubiera ke matelamidusik zo boiker. Adelaïde va Pierre loloon kivar nume loloon zo gruider. Pierre va bata debala jokeon lasusaver. Va erba ke mona vajuler nume va matelamidusik taruler. Antoine zo koervoliar voxe Pierre va inafa tunuyara me djukukaluster. Ursule va edjiiasikye yoltkirafe gu Mouret numaze va Marseille koirubar. Mouret va kot bueleks vewar. Pierre va ikse uculer. Pierre va Adelaïde re djumilstakser voxe co abdualbayar da ine erackon co bulur. Warzot ke ezilpusa xonukera ke Macquart koe Swiza artfir. Adelaïde koe wico rundanyar, iskeson va vajulera va mona pu Pierre. Ine va taway re djudoler ise va nazbeikya ke dolekik djukurer. Va Félicité Puech trumar, i va nazbeikya ke parloesik va krubeda. Kurera zo kevnaler. Ine va dolera va tawayeem dulaper voxen in gan gadikya mwon zo digir isen Antoine is Ursule va yona roka digid. Pierre lajubuiver da gadya va tawayeem ika alub-kunoy franc talolk is abdizilira va krupa vas tev-decemoy franc talolk doler. Félicité is Pierre va gedira va yasafa tretca paked. Arti barda, Puech gadikye bulur nume va tretca pu jotafa tolonga isker. Konaka direfa tanda erbon tid egalesa numen tretca konakviele riwe al griawir. Félicité va kuluca klokayar. Arti bar-sanda inafe gadikye mulufter ; ine trakur da fu konoler voxen erba gu lani turwi al zo kober. Pierre al tupwertawer ise tuvungawer isen tretca vijir. Félicité va baroye ocye is toloya ocya bliar : Eugène Rougon ( kobl- 1811, ~ Eugène Rougon Donik ), az Pascal Rougon ( 1813-1873, ~ Pascal selaropik ), az Aristide Rougon ( okon gu Saccard, kobl- 1815, ~ Elakera, az Erba ), az Sidonie Rougon ( kobl- 1818, ~ Elakera ) titis gadikya ke Angélique Rougon ( Klokara ), az Marthe Rougon ( 1820-1864, ~ Olgalicura va Plassans ). Félicité va tukulawera miv al ebgar voxe va bali ke nazbeikyeeem re sugapar. Sine koe dalafa bema ke widava vayad numen batcoba va yasapol famiwapar. Toloye va rokopa vayad solve bareafe va selaropa askir. Temed da vamoe intafa gropa al zo kotrakud. Titi 1848-e ilanacek, Eugène riwe tir balem-sandafe is tcistafe is viafe is prelkese voxe va morafa xialara isu tufa vligur. Inafa runda koe aluteikaf ilput me tigiyir. Trasitison va tufa, in va Paris agdar. Bak taneaksat koon koirubar, pestaleson da koncoba fu sokir. Aristide tir vepokafe ise va skujerama albar. Me wegayer ise kalion djukulawer. Tir gelukafe nazbeye ke Félicité. Radimi dimlapira kou Paris, bene gadikeem blickir. Va Angèle nazbeikya ke Sicardot redakik kurer. Azon Aristide is intafa yasa gu Paris divsoked. Aristide is Angèle va tanoye nazbeikye dikid : Maxime ( kobl- bak 1840 , ~ Elakera ). Pascal tiyir ebeltaf namulol ke yasa. Moi vayarugal, wetce selaropik va Plassans koirubar ise va winkafa blira karolar. Va tuwavafa izva vayar kotviele va ugalam dadir. Va abic anelik jekur isen ant wawik va in ruped. Me al kureyer ise va bifa ogena koe Paris me grupenar. Pierre is Félicité dem balem-kunoy franc talolk bak 1845 bulud. Soe va tukulawera dun kloked. Pierre al tiyir zolonackafe ise nutiyir kulackafe. Artowara ke 1848 sokiyir isen kot Rougon yasik tir pitcas, buven gan volfala is djuprofaves va kot rotis ik adraf mergil ta abdufira. Rougon tir yasa dem tozekik djuprogelakes is djuprodubies. 3-eaf luz Plassans dalon tir viderevafa widava isen abictan va artfira ke gindaroti ke Louis-Napoléon abdikalid. Carnavant biptikye nobase va Rougon yasa tir zardaf neyasik va gazaroti. Kategirevafa katanara dene Rougon toz dilized. Ke korik tigis bal katanara tid : Isidore Granoux W-ye dolesik va soyore, is De Roudier W-ye kulaf pilkotik gurpulvis bak konak bartiv, is Sicardot redakik ikagadik ke Aristide is tis felis korobutik, is Vuillet W-ye nevadolesik is piskusik va safteafa fela. Rougon vanpir sanegaf okilik ke rega. Bak balemeaksat ke 1849, Eugène va Paris bulur aze va gadye remi toloya safta auzur. Va katanara tcoker voxe me paker, kore pu Sicardot jontikviele pulvir. Vuillet va inafa tigira rodaxar. Aristide va sokasaneevikeem zober kire trakur da in vanwar nume koe sanerotifa fela va malyopara va kategirevikeem ke widava suter. Gan rega ke Rougon zo vanovar. Voxe moi kakevera do Eugène, va sokasaneevikafa cenera mea laner numaze ten zober. Levida Eugène ko Paris ba 1-e ke alubeaksat dimmallapir, pune va gadye al prilapar. Sin va lan azed nugid voxe pu Félicité vol tusanead. Soe tere Pierre va abdumimaks razdar : di vanpir yutesik. Rega zo givar da Louis-Napoléon va milk ko Roma stakser enide sokasane kabdion reduyune di zo belkesir. Ba 10-e ke santoleaksat Louis-Napoléon gu taneatisik zo libur. Rega va in zobeper, don pilkovon Pierre. Bak diref ilanacek, rega ke Rougon tir loeke sposafa kiren sanelia gan sokasane zo argar. Carnavant biptikye satoler da kevsokera fu ensokir. Pu Félicité dere vofase vaon pulvir. Toza ke taneaksat ke 1851 tir. Félicité va tselka ke Pierre lajuseotar nume va yona twa bas Eugène belir. Bata twa nedid da Eugène va neya ke Louis-Napoléon Bonaparte kobaver. Ine va mecoba pu Pierre kalir voxnume va zobera ke Aristide va sokasane dwir. Dace lajujupar da Pascal va lanyona katanara paker. Tici santaneaksat, kevsokera tutirodawer kiren Louis-Napoléon zo kagar da co djuvanpir gindik. Rougon yasikeem re tir ke neya ke gindaroti isen Sicardot va ervo levegar. Ba 1-e ke santoleaksat, lana twa ke Eugène bazer da gemelt fu sokickir isen Pierre va kotcoba pu Félicité gokalir. Voxe me pulvir. Ba 3-e ke santoleaksat warzot winugon zo dakter. Dotokilik is gertikeem mu gindaroti gorad, i mu gindik tsunes va sokasaneevaf volnik. Sanerotievaf utcokilik griflir aze va Plassans bulur. Aristide va teliz vajikes va kevsokera suter voxe va Rougon moion auzur, evodanon gan skujera ke rega. Va biptikye is Félicité keyakses va noeltaf bifeem gilder. Gildason da kevsokera en fu jupekawer, pune kal bazaxo ke fela vulter nume va rubiara va intaf teliz lajuweyonar. Rabateson va diref cenesik, re goker. Bak diref vieltum, exura koe vemafa widava dilized. Edje rega ke Rougon va int katanar, pune warzot artfir : vintesik moe kelda tigid. Jontiktan vasketeson mallanid, redakikye va intaf milkam kazokever. Félicité va tatcera va mallanira ke Pierre tunakilar. Bantel do alub-sanoy ervokirik kadimeon gozavzagir. Kadimi mallanira ke arak ke rega, Pierre den gadikya vasketeson lanir. 4-eaf luz Antoine Macquart ( mialaberikye ke Pierre ) va Plassans kadimi titfira ke Napoléon I koirubayar. Tiyir kliwaf is ruyatfamaf ise va kottan kobas ta blirawara vliguyur. Tiyir yatkaf viele kosmayar da Pierre va intaf konoleks al konariyir. Va widava exuleyer, kareizuson pu kottan inde gan berye gu intafa erba al zo azregeyer. Mone dolta ke Pierre dason rasoker. Tere Félicité keyakseteson ganer numen in gu tol-decemoy franc talolk is warzaf bluctetum is kraba lizukeduna tori tanoya tanda zo tuvalear. Voxe kali turodara va erba wiluon kalulir aze va erba bas Rougon mea roseotar. Watason va abica erba, Antoine va kita is badona djuratronkar. Arti sanda, gitakobar. Va Joséphine Gavaudan ( Fine ) kobas moe dolexo yerumar. Bantelya dun kobayar edje inye gibevunguyur. Kotviele sin uliyid, pune rwamayad. Va baroy nazbeik dikid : Lisa Macquart ( 1827-1863, ~ Jivot ke Paris ) az Gervaise Macquart ( 1828-1869, ~ Sagondexo ) az Jean Macquart ( kobl- bak 1831, ~ Tawa az Egale ). Gervaise zo envayar viele tiyid izakaf ; tiyir gijafe is mazdafe ise eteyer. Jean tiyir vrokaf voxe djukavayayar. Lisa wetce zanisik kobayar ise va Paris bak 1839 keni unesik al koirubayar. Kotvielu Jean is Gervaise erbawamad, pune Antoine volwegayer nume bene sin is Fine blir. Gervaise is Fine va boriza belcon gilulid kotviele Antoine me tigir. Antoine va sokasane ton mergil jaxadas va selt is Rougon yasa zobeyer. Vielu Rougon yasik va tirka dene kategirevikeem lagexoneyed, pune Antoine tiyir toktera va sin. Dace dratceyer da va izva ke Pierre dubieyese va gadya fu sanegayar. Antoine va dofugik gu dilfura va Rougon latrasir. Aristide va ine rodaxar. Miledje Ursule berya is Mouret kurenye va tcema gedid ise tid kalaf. Ursule bak 1839 mulufter aze Mouret kser. François nazbeikye ( 1817-1864, ~ Olgalicura va Plassans ) gan Pierre zo uner aze va Marthe kosayikya kurer. Silvère gan Adelaïde ( Dide ziavya ) luxeon al zo koemuder. Silvère is Dide ziavya va sint karolapayad voxe zavzayad weyustackaf. Silvère va Dide rubayar kotviele ine deoneyer. Silvère tiyir gorestafe is manton mivravese ; tir ravesik ke lan krafoliasik. Va grabom ke Rousseau belir ise fogetir sokasaneevaf. Antoine is Silvère va sint kakeveyed ise va gaderopa pulviyid. Antoine va ine kev Rougon yasa lavanmadayar. Titi 1850 Fine awalker. Antoine va jontika nela ke mona doler, trasitison va erba, aze va waks ke nazbeikeem konarir. Arti tanoy aksat, Gervaise do Lantier is oceem ko Paris yater. Antoine va kita meseramon gire iar. Viele kevmadara koe vegungafa widava moi kevsokara al tozuwed, pune Antoine va fala witar. Va lan blay moe viga ke Plassans kevlanir aze kobuiver da in va Rougon volnik ke sokasane di golanir. Va Pierre mallaniyise me trasir. Blayap ke ara widava ko Plassans ba 11-e bartiv al kolanir aze va dalafa viga al artlanir. Ayik va dotokilik is ardialaf redakik moliked aze wiluon feliled. Silvère va lan batultik ( Rengade ) nules va Miette rwamar. Silvère folir da va in al aytar nume denon gelber lize va tigira ke Pierre me katcalar. Pierre latatcer da Silvère fu mallanir voxe zo ilplatir. Silvère van Miette is vintesikaf arak gire mallanir. Viele blay va widava djupromallanir, pune Antoine buiver da tol-sanoy ayik zavzagid enide do sin va Plassans lastujeter. 5-eaf luz Vintesik va Plassans van Orchères mallanid. Ba ticawaltara, Miette toz geber. Silvère buiver da ine va irowa pu artan dear aze sin van Orchères tildeteson roykad. Pulvid ise va sint kutcad viele di tid antaf. Miette tir lerddafe viele gadikye gu pisonara zo komalyer. Ine do Eulalie Chantegreil ziavikya is Rébuffat kurenik is Justin kosayikye tere al blir. Ziavikya awalker edje Miette tir santandafe. Rébuffat va ine gu tawamidus dodelik askipeyer. Icde inafe gadikye nugeyer. Lird koe kusk ke mona ke Dide Ziavya tiyir pakanaf gu taway ke Fouques nume gan toloya tanta zo rofaveyer. Lanviele ruza empawer viele Silvère faveyer. Va warzafa di gonepur aze inketeson mo rebava ticlanir lizu va Miette kozwir. Sin pu sint adre pulvid ise sinton toz gruped. Bene lird va sint altoz kakeved, disukeson va tcaza ke kottan koe lava. Arti ugalam, va mana debala tabiyid. Silvère va tuvel askedayan gan Macquart is Adelaïde katcalar. Va tselka ke bat tuvel koe mona aneyar numaze tere trasir. Direvielon reme derniga ke tuvel va Miette akoyer. Sin kan nuba va sint gid ise pulvid. Rwodeson Silvère va Dide ziavya kozwir. Xuye ina kal lird al lanir. Bam va Silvère kagruper nume zo romplekur. Mepulvison va ine ben nuba narir aze ko sinaf kril vanstar aze va tselka tit lird mimar. Ba bat miel, Dide Ziavya ve deoneyer. Silvère is Miette va tuvel mea faveyed voxe koe Saint-Mittre lizuxo toz kazokeveyed aze remi tolda. Koe tawaday mielon gozayad. Idulugalon koe kuksama va int kolavayad lize Silvère va pujera pu Miette taveyer. Koe Saint-Mittre lizuxo Miette va naboxak lanmielon kosmayar lize lan rosolwini kosutekski tigiyir : « Batlize Marie... dayker... awalkeyese... » ( Yoltack ke Miette tiyir Marie ). Silvère is Miette aulon al kenibeyed. Van Orchères mallanid, kazokeveteson va vintesikeem. Silvère va Pascal selaropik gamdar. Vintesik zo givad da bifatum ke Paris kev sokasaneevikeem al tenuler. Remi toloy lof vielcek koe Orchères zavagid. Lan sayakaf milk vanlanir. Kevaliera tozuwer, lantan otced. Miette zo bakar, va ast licar numaze luber. Silvère doon zavzagir. Pascal artlanir viele ine bocon ve gandir. Su xonuker. Miledje vintesik zo staked. Tere batultik awir aze va Silvère il Miette doimpar. 6-eaf luz Ba alube bartiv ke gazda, Rougon va mona ke gadikya bulur. Liter da widava tir awalkafa. Kivar da va fala al drasur. Dimdenlanison, va brucka ke kurenya kake tuvel kozwir. Mo twern va tselka ke yultxo dem viltaxa mbi malkabur. Va Roudier is Granoux katrasir. Zo givar da vintesik bak miel al mallanid. Sin va bar-san-lerdoye ayikye kabelcad aze va viltaxa ko yultxo dimnarid aze kal dotaxe lanid. Va susik komodeyes trasid ise kolanid. Macquart koe bazaxo ke dotokilik tigir ise va dimlanira ke vintesik ker. Rougon va bazaxo ruzader. Bak rwamara, zelt ke Rougon viltar nume elza zo blokar. Macquart zo kostoler. Rougon pu widava etimar aze kev Félicité dimlanir. Vanafiz dur, sin pulvid ise va direfa tcedera klokad. Artel artlanid ise va Rougon siskavad. Vuillet silukon fure awir. Va piutexe bak krogafa bifa al kereleyer. Sin va gradilafi tegi ke ervolita kareizud is empara va elza. Rougon ko dotaxe mallanir. Ba sane bartiv, warzot icde bifeem koe Plassans al galbuwer. Warzot icde sopera ke Rougon va inafe berikye evodar isen ant balem-sanoy wideyik tcedeson al skud. Rougon rega ton teza zo taxar. Félicité va Aristide kozwir aze lasubuiver enide ine va int zokever voxe va datan vanwayas men gruper. Rougon va dotaxe kereler, va bakanik don Rengade auzur. Sanelia folir da sayakik giwatason fu artlanid voxe ba siel gestir da vintesik moe vanafa kelda tigid. Vuillet va fela enzobesa va tirka ke gindaroti me djurubiar kire me gruper inde bifeem fu tenuler. Larde vintesikafu nisu wan tid, pune Rougon ko waba ke Carnavant malstar lizu sin va widava ropitcad aze mielcekon sued. Ba gazda lide ke kottan tir omafe. Tuvel ba miafiz zo fenkud. Nisu icde rodja ke kevsokara exuled numen Rougon is Félicité toz piksed. Nued dume Eugène givatason me al suter. Va tulok ke Vuillet tizon dilfus va vintesikeem wid solve bantel milgazdon kivarsayar nume va mecoba kevon rubiayar. Tokdume batmana laizafa betara ? Félicité va Vuillet ko piutexe kevlanir nume inde uculeyer pune rabater da in va twa ke Eugène al remazavzar, i va twa daktesa va tcedera ke kevsokara. Félicité do Vuillet tuseylar : inafa antafa xialara tir gogol eksas va reila gu neva. Félicité dimdenlanir, djukujaxadason kev Pierre icde twa. Nujifolir da kotcoba al rodjer. Pierre ve perlerser nume va kotafa yasa buntur. Tere razdar da va yona twa bas Eugène al kazawar. Gire stujeteson va arienta, Rougon ve rieter. Direvielon Félicité ko dotaxe lanir, pulvitison pu Macquart. Bantel va blira koe tapegafa xuta karolackar numen inafa seramuca mu sokasane titfir. Ika decitoy franc talolk is nuyuca levnaler da va sokasaneevik ware tigis koe widava kal dotaxe fu star liz sin gan skay zo nareted. Rougon ko dotaxe dimlanir. Koe widava spua tir pofa. Granoux va dotaxe sielon artlanir, zobeteson va Rougon. Félicité va Aristide lajubuiver da sokasaneevafa neya tir rodjeyesa. Macquart dene gadikya kali siel vasker. Va sokasaneevaf dositik kabelcar aze va dotaxe vanlanir lize skay va sin ker. Iyepta va widava divmodar numen jontiktan trakud da vintesik va widava su kolanid. Granoux biotar. Balemoya awalkoda koe dotaxe tigid aze banlize zo isked enide ba gazda gan widavikeem di zo wid. Irubasik re tid muntaf da gan Rougon kev vintesikafa dilfura al zo rojud. Ervoliama dirgana gan Masson vonkik is Blériot W-ye artlanir aze va widava kolanir nume va sanelia karavaldar. Aristide va teliz mu gindaroti koe Indépendant fela sutelar. Rougon is Granoux gan Blériot sanegon zo sendad. 7-eaf luz Bak diref taneaviel, sayakaf milk va Plassans dimlanir. Va noeltafa stakera koe Saint-Roure al paker. Mayesis tawuk jontikeke en dilizer. Eugène suter da Rougon gu Légion d'Honneur semek is yutesikaf play fu zo gabler. Sin va batcoba djukukapad nume va aryon porik ta sielestura ganed. Rougon den gadikya lanir lize va Macquart is Pascal katrasir. Dide ziavya moe ilava yokageson tigir. Macquart setiker da ina va lavajeb diveon al ulir aze lemisteyenon al dimlaniyir. Pascal va tunuyara va Silvère bas Rougon laseotar. Rougon va Macquart doder aze sielestutuson denlanir. Aristide is Rougon dilid. Buduca ke Rougon is diref semek zo doljed. Lanviele Félicité pu Aristide erur kase ine va warzot icde Silvère dadir. Bam razdar inde bantel gan Rengade al zo aytar. Viele milk gin dimlaniyir, pune va yon sokasaneevik koe Saint-Mittre lizuxo toz stakeyed. Korik zo kaikalieyed aze zo zeltayad. Rengade va Silvère vanmiae stolenikeem al trasir aze zeltatason al malstar. Silvère mo kelda poke naboxak ginobayan do Miette zo stayar. Gan Rengade zo badenyasiyir aze zo zeltayar. Bak ban sielcek, Rougon yasik va saneuca wan impavantad. Va gindik vanvimad ise va Rougon gu mirnki ika inaf diref semek ziked. Dere rupel Émile Zola : francavaf suterotik ( 1840-1902 ) francavafo xanto, dene Wikisource : La Fortune des Rougon

Tufa ke Rougon yasa XANTO Vergumvelt La Fortune des Rougon Sutesik Émile Zola Ava francava Suterotinda Berpot Evla 1871 betara teza   Tuveli icde Suteroteem  Alubeafa piskura va berpot bak 1875