Sofia Bogomolets

Sofia Bogomolets

1856-1889

Rossiaf artowasik

Sofia Nikolayevna Bogomolets koblirayoltaf gu Prisetskaya ( rossiavon София Николаевна Богомолец, Присецкая ) tiyir rossiaf artowasik. Koe Kovalivka widavama koe Poltava bowexo ke savsafo rossiafo gindaxo is refa Ukraina ba 27/09/1856 kobliyir. Ba 11/01/1889 koe Kara xalta poke Tcita koe Sibiria mulufter. Blirizva Inafa yasa tiyir vey polskaf oluik ise va pilkot koe Poltava winka koe Ukraina. Sofia Nikolayevna Prisetskaya koe olda ke Kyiv taneon vayar aze va selaropa koe ayikyafa tcema ke Sankt Peterburg toz vayar. Voxe kadimion tutenar ise do sane djublir. Do Aleksandr Bogomolets selaropik ( 1850-1935 ) kureyen bak 1876, sin koe Kuban gola koirubad aze selaropud ise galbedud. Bak 1879 gonobulud nume ko Xarkiv va int inked, aze ko Kyiv. Sofia Bogomolets va Tanara va Kobasikeem ke Geefa Rossia zabduyuna gan Nikolay Ctcedrin is Elizaveta Kovalskaya yoter. Va skedanya do Kovalskaya adre exoner. Radimi sopera ke toloy gadesik va grustaks bak 1880, va grosiba kogader. Flint is Sibiria Sofia Bogomolets koe vawila ke Kyiv bak taneaksat ke 1881 zo soper ugale nazbeper. Inafa vreda zo kowir numen jontik memwedaf suterot zo kowid. Koe flint ke Kyiv zo dagir lize va Aleksandr nazbeye radekar. Pintik gan veygadikeem di zo gaar. Komalyenon do lerdoy ar korik gan sayakaf erkey bak alubeaksat ke 1881, va flintafa tolsanda koe kawodafa xalta ke Kara zo lanzar. Ropexe ke Kara xalta, afigasuteks titi XIX-eafa decemda Ko Butirka flint ke Moskva az Krasnoyarsk flint zo arburer. Banlize gan susik zo fiker. Kevotcer ise do konaktan toz aelyaster. Bogomolets is Kovalskaya ko Irkutsk zo arbured. Bak toleaksat ke 1882 lajupotced voxe arti toloya safta zo vebidud. Koe flint, mil sin konakviele zo basvaged ise zo askipejed ise va plukerapa levgad. Gire aelyasted. Bogomolets va gakera vas alubda mbi laumasir. Ko xalta ke Kara bak bareaksat ke 1882 zo arburer lize va dagis gropeem wan kevotcer. Warzafa arburera ko flint ke Irkutsk. Inafa gakera gu tanda nope mijera va susik ware zo dakir. Koe flint ve kotcakoler. Bak taneaksat ke 1892 winugon zo tunuyar voxe arti barka koe Kara mulufter. Dere rupec → Rossiafa artowasikya Vuestexeem (ru) Internetxo : Blirizvama ke Sofia Bogomolets (en) Engel, Barbara Alpern is Rosenthal, Clifford N. Five Sisters, Women Against the Tsar - The Memoirs of five revolutionaries of the 1870s. 1975, London: Weidenfeld and Nicolson. ISBN 0 297 77065 9. (it) Elizaveta N. Kovalskaya, Sull'origine delle Unioni meridionali degli operai russi, «Katorga i ssylka», IV, 1924 (it) Franco Venturi, Il populismo russo, Torino, Einaudi, 1952

Sofia Bogomolets  Koblira  27/09/1856,  Kovalivka, Ukraina  Awalkera  11/01/1889,  Kara poke Tcita, Rossia  Vedeyot  Rossia  Tegira  Galbedus artowasik   Bifa  Zemlya i Volya Narodnaya Volya Kara xalta   Tuveli icde Izvopa

en:Sofya_Bogomolets