Lyudmila Volkenstein

Lyudmila Volkenstein

1857-1906

Rossiaf artowasik

Lyudmila Aleksandrovna Volkenstein koblirayoltaf gu Aleksandrova ( rossiavon Людми́ла Алекса́ндровна Волкенште́йн, Алекса́ндрова ) tiyir rossiaf artowasik. Koe Kyiv bowexo ke savsafo rossiafo gindaxo ba 30/09/1857 kobliyir. Ba 23/01/1906 koe Vladivostok xonukeyer. Blirizva Lyudmila dene kulafa is oluafa yasa koblir. Gadikye tiyir darkasaberopaf flibik. Sedme ina, tiyir fikaf is evayaf ise dile alieyer. Ina tiyir loon yastafa do gadikya. Dene sardikafa olda ke Kyiv vayayar voxe me di zo dobayar kire va rindera al vewayar. Bak 1876 va Aleksandr Volkenstein jotaf kurmik kureyer. Sin va tanoye nazbeikye ( Sergey °1877 ) di dikiyid. Koe Gogolev koe Kyiv winka koirubad lize Aleksandr va kobara al trasir. Bak 1877 nope gluya do Tcaykovski gaderopaf rijay zo soper aze ko Sankt Peterburg zo arburer. Arti jiz tere di zo vanbulur. Ko Kyiv dimlapid lize Lyudmila va dob ebon gu pomas selaropik bak 1878 seotar. Bak mil ilanacek, Aleksandr is Lyudmila dene Zemlya is Volya artowas lizor zegad. Do Goldenberg is Kobilyanski is Zubkovski va adjubera va Kropotkin bowesik va Xarkiv azeded. Ban in va flintik al askipejeyer ise va yastes vayasik koe Xarkiv al stakeyer. Ba 21/02/1879, pomanon gan Kobilyanski, Goldenberg va Kropotkin dimdenlakis koe lakirirem dierkar. Ban in astirbon zo bakar nume arti alubka xonuker. Aleksandr Volkenstein bak idulugal ke 1879 koe Kyiv zo soper. Lyudmila ko Poltava lajulakir aze bak santaneaksat va Rossia bulur. Jiz va 14 ke Sankt Peterburg (1884) Jizanik М. Ю. Ашенбреннер — Mixail Aschenbrenner В. Н. Фигнер — Vera Figner В. Г. Иванов — Vasili Ivanov А. И. Немоловский — Apollon Nemolovski Н. Д. Похитонов — Nikolay Poxitonov Н. М. Рогачев — Nikolay Rogatcev А. А. Спандони — Afanasi Spandoni А. П. Штромберг — Aleksandr Stromberg Д. Я. Суровцев — Dmitri Surovtsev Л. В. Чемодaновa — Larisa Tcemodanova В. И. Чуйко — Vladimir Tcuyko А. П. Тихонович — Aleksandr Tixonovitc Л. А. Волкенштейн — Lyudmila Volkenstein И. П. Ювачев — Ivan Yuvatcev « Dem mafelafa is olukafa gloga, Lyudmila Volkenstein va plinapafa altoza isu sumpasa belcon diyir. Tiyir ontinapaf is ubaf. Inaf usuk tiyir orikaf is soakiramaf ton gemaf tronk mo epiteem. Ukeem is axaf kolmeem ke gexata tiyid gemaf ke kuca ordon slavafa [...]. Lukoptaf iteem tiyir vecas is acon rodedisukes va gorestaf gemelt. » — Vera Figner negas va Lyudmila Volkenstein koe « Запечатлённый труд » namio, 1931 Lyudmila va rolafa remeluxaxa yoltkirafa gu Axmatova faver ise koe Swiza az Franca az Italia az Turka az Balgaria az Romania koyar ike blimir. Bak anyusteaksat ke 1883 ko Rossia dimlapir. Ba 31/10/1883 koe Sankt Peterburg zo soper aze ko Petropavlovskaya ralma zo kobuder. Xuton gu Jiz va 14 ke Sankt Peterburg dem tulon Vera Figner dere koridan, zo komalyer. Di zo xonukalanzar aze gakera gu tolsandafa koflintara koe Schlüsselburg ralma zo nuner. Katecton gu sonara va Nikolay II, Lyudmila Volkenstein va kastara va gakera belundar voxe gu sokera koe sumefa Saxalin ewala ke Sibiria zo steger. Bak 1897 ko flint ke Odesa zo arburer lize va namio di suter. Azon do Aleksandr ko Saxalin dimplapir lize ban in koe lizukafe ropexe di kobar. Bak idulugal ke 1902 koe Vladivostok koirubad. Bak geja wal Rossia is Nipona, Lyudmila va sayakik roper ise artowason galbedur. Ba 23/01/1906 bal exaksara kev geja is bowere imaxusa va tunuyara va gaderopaf flintik, milk va exaksasik viltar. Lyudmila Volkenstein tir tan jontik kosik. Dere rupec ► Rossiafa artowasikya Vuestexeem (de) Daniel Jamritsch, Blirizvaf teliz dene internetxo (ru) Jiz va 14, 1883

Lyudmila Volkenstein  Koblira  30/09/1857,  Kyiv, Ukraina  Awalkera  23/01/1906,  Vladivostok, Rossia  Vedeyot  Rossia  Tegira  Galbedus artowasik   Bifa  Zemlya i Volya Narodnaya Volya   Tuveli icde Izvopa  Divblinikafa wida koe Saxalin ewala lize Lyudmila Volkenstein ape sokeyer