Fanya Baron

Fanya Baron

1887-1921

Rossiaf artowasik is arotievik

Fanya Anisimovna Baron koblirayoltkirafa gu Grefenson ( rossiavon Фаня Анисимовна Барон, Грефенсон ) tiyir rossiaf artowasik. Koe Vilnius koe savsafo rossiafo gindaxo is refa Lietuva ba 21/01/1887 kobliyir. Ba 29/09/1921 koe Moskva gan Tceka gaderopaf ardial flioton zo klibuyur. Blirizva Bak 1911 Fanya Grefenson il gindafa vertuma ke Rossia otcer ise ko Tanarasokeem divlamar lize do Aron Baron va dodelafa lyumara is arotievaf lizor di paker. Bak taneaksat ke 1915 va exaksara ke yon kobariskik koe Chicago paker. Gan ardial zo sagonder. Konakviele zo soper. Va nuyevaf rieteem tegison galbur. Va sutelara va Mother Earth virda sanegana gan Emma Goldman dokobar. Dimlapira ko Rossia az tsunera va Bolcevik bolk Bak teveaksat ke 1917 moi titfira ke gindafa vertuma, do Aron Baron yerumanikye ko Rossia dimlapir azen sin va Kyiv koirubad. Kadimi Artowara ke Saneaksat, ko Xarkiv mallapir lize va Abdigalda dem arotievaf seltomeem ke Ukraina sanegasa va Nabat fela vilter. Va Nestor Maxno is Volin is Pyotr Arcinov kakever. Ba 25/11/1920 koe Xarkiv, do Aron Baron is 300 dastrubenik ( don Volin is Taratuta is Flecin is Mratcni is Dolenko-Cekeres is Gorelik ) pakes va Kotrossiafa Arotievafa Aba gan Bolcevik ardial taneatomon zo soper. Bak sopera zo fikeper. Fliotafa klibura koe fuk ke Tceka ardial « Fanya Baron tiyir rossiikya ke ord koton ektudas va lazava ke ayikeem. Remi jonvielera koe Amerika, va nuyaf ugal is kipi ke intaf ziliduksam koe iaxe, gu arotievafa galbedura ektuyur. Arti konaka tanda viele koe Xarkiv va ina al kakevé, inafa bitavura isu abidara al tunoaweyed, nope brazara ekeyena gan int is palikeem dim Rossia. Va kimiskafa takreluca is disafa swava diyir. Va an wavdaf lag rokotaskiyir ise to ton kuca is varafa fastuca gu beti begki va int rozelayar. Ton duxasa koyasa gropa, galbutuson va Nabat fela is grustatason va dodelik is tawadayik ik greleteson va oflintayan palik, Fanya va Ukraina exuleyer. Tiyir tan kosik ke zierdara ke Butirka viele ben usuk zo impadimayar ise olgon zo balieyer. Radimi inafa yatera il flint ke Ryazan, kal Moskva al lanir liz kolpakiron is erbiskon artlaniyir. Bat sutaf sok stegeyer da ina den berikye ke intaf yerumanik lagelbeyer lize gan Tceka ardial di zo kosmayar. Bata nuedapikya zaniyisa va seltafa artowara remi varafa blira, gan korikaj nurutis vabduik ke artowara zo xonukesiyir. Osk sin va Fanya Baron al aytad voxosk ison sovietafe bowere va namira va intaf awalkaf kosik gu tozekuca lasukluzar. » — Emma Goldman brudis va Fanya Baron koe « My Further Disillusionment in Russia, 1924 » Fanya Baron koe Moskva taneon zo dagir aze ko flint ke Ryazan zo arburer. Ba 10/07/1921 do lerdoy palik lajuyater. Va divflintara va Aron yerumanik sugar. Dagis gropeem koe flint ke Ryazan tir olgapaf nume va aelyastera nekir. Nope tigira koe Moskva ke arotievagrosibaf dastrubenik pakes va laxa ke Profintern grustaks, bata yastera walvedeyon tauler. Sinafa xuvara jupar da konak yastesik div TSSS zo aloyad : Voline is Vorobyov is Mratcni is Mixailov is Maximov is Yudin is Yartcuk is Gorelik is Feldman is Fedorov. Vedeyafa sopesa foxiega nope arotievafa galbedura is « dofuguca ke kevsovietafa gomilasa tegira » is epura va rolaf tal kev Fanya Baron zo divplekur, i nope koridareem varon askedayan gan Tceka ardial. Ko Moskva den berikye ke yerumanik gelber. Ba 17/08/1921 sin gan Tceka zo soped. Semyon Baron vere zo klibur edje Fanya zo solstar. Ba 29/09/1921 tir tan lerdoy korik zeltan koe fuk ke flint ke Tceka ardial koe Moskva. Klibura va Fanya Baron gan miv Lenin zo benplekuyur. Dere rupec ► Rossiafa artowasikya Vuestexeem (en) Paul Avrich, The Russian anarchists, Princeton University Press, 1967.

Fanya Baron  Koblira  21/01/1887,  Vilnius, Lietuva  Awalkera  29/09/1921,  Moskva, Rossia  Vedeyot  Rossia  Tegira  Arotievaf artowasik   Bifa  Arotieva Rossiafa Artowara ke 1917   Tuveli icde Izvopa    Tuveli icde Arotieva  Aron Baron yerumanikye, 1920