Mixail Staduxin

  Tuveli icde Izvopa 
Teliz mal Wikipedia.

Valentronexo ke Sibiria vestayana gan Staduxin

Mixail Staduxin ( rossiavon Михаил Васильевич Стадухин ), awalkeyes bak 1666 tiyir rossiaf vestasik. Va valentronexo ke Sibiria kosmayar ise tiyir tan taneaf koyasik artlaniyis va Kolima bost isu Anadir isu Penjina is dere va lentefa krimta ke Oxotsk Bira.

Tiyir nuyaf tawadayik isu kazasik, xantaf gu wida kene Pinega kuksa koe valentefa Arxangelsk winka ke Rossia. Moni 1633 kene Lena bost iste Sibiria tigiyir.

Vestara va gola poke Kolima bost isu Anadir[betara | va krent betá]

Bak 1641 va brinuga van tana kovoa ke Indigirka bost dirgar, i van Emolkon kuksa inton yoltana. Bat yolt co rotir arapeniks ke yolt ke tana wida ke gola ( Oymyakon ), mantode Staduxin ron Sibiria al illaniyir. Radimi konaka tanda, Semyon Dejnyov va mila joya di moolaniyir aze va tela loon ronefa evilma ke Sibiria di artlaniyir, i evilma fure vuesteyena vey inaf yolt.

Larde Staduxin va dilk myoxakiraf sulem trasir ise va patectolafa plabuca kakever, pune va vegedura va toloya wilttota gorar aze va Indigirka bost kal bira do dositikeem vatitlapir. Banlizu sin van Kolima bost ronlapid aze va fentugalafo pemaxo exoned, ape poke Srednekolimsk wida. Kolima gola nijur tan lokulaf seg ke Sibiria dem myotaf sulem.

Bak 1645 Staduxin dem yulteem dem bruntolxa ko Yakutsk dimlanir. Bak 1647 gin mallapir, aykatason va gola rone Kolima bost kene Pogutca kuksa lev rossiafa ricuma lize Tcuktci sane blir. Nope mutacek va fentugal kene Yana bost gotiskir. Bak imwugal ke diretanda, va Indigirka bost kan impadimot artlakir lize va tota vegedur aze kal Kolima bost totar. Banlize zo givar da Semyon Dejnyov va Pogutca kuksa ixam al artlapir. Bat pereaksat ke 1649, kan toloya tota do bar-sanoy dositik va brinuga ke Dejnyov radimelapir. Tana tota kev raporka seluwer. Levaykat da Staduxin is lospik va Tcaun ceda oku Koliutcinskaya azon artlapid.

Nope gracira va uma eksa is wavduca ke totara is plabafa linulara ke patectolikeem, Staduxin dim Kolima lapir.

Radimion va Dejnyov kene Anadir bost kevlapir. Diretandon, sin belcon mallapid, ta vestara is grupera va lizukafa Yukagir sanelia is kabelcara va giva is myot koe batyona gola.

Oxotsk Bira[betara | va krent betá]

Bak toleaksat ke 1651 oku bareaksat, Staduxin va gefa brinuga kogader aze va Penjina bost artlapir. Bak idulugal va tota vegedur aze kene lentefa krimta ke Oxotsk bira totar, aze va artexo ke Gijiga bost kosmar lize fentugalur. Bak fentugal ke 1652 va Yana bost mone noelafa Magadan widava artlapir aze kal Taui ceda koe Oxotsk Bira dakir.

Tena ke koyareem[betara | va krent betá]

Bak 1657 Staduxin va Oxotsk gin lapir, az ko Yakutsk bak 1659. Ko Moskva wetce redakik tere dimlakir liz va warzot icde warzafa patecta vanburer, i va patecta lize bresitol is beretraf rupol dis va gulafe gije blid. Voxen tel lodulapaf sulem sedme in tiyir merikol dis va myot anton dowin gu tel ke ebeltaf bresitol. Koe Moskva bak 1666 awalker.

Klita ta exonera va tegira ke Staduxin wali 1651 is 1657 gracad. Va Kamtcatka rotir al vestar voxen mek kiewaskaf izvaf valdig vaon slamecker.

Rossiaf vestasik va Sibiria
Fedot AlekseyevVladimir ArsenyevVladimir AtlasovPyotr BeketovVitus BeringSemyon DejnyovKurbat IvanovDmitri LaptevXariton LaptevIvan MoskvitinMaksim PerfilyevVasili PoyarkovVasili ProntcictcevDemid PyandaMixail StaduxinOnufri StepanovSemyon TcelyuskinAleksey TcirikovMerkuri VaginYerofey XabarovYermak Timofeyevitc