Kolima (kuksa)

Teliz mal Wikipedia.
Kolima
KIRA
Abrotce 2 129 km-
Kuksaxo   643 000 km²
Bost Kolima
Celack 4 060 m³/v-
SALT
Klita Tcerski jaka
Artexo Sibira Bira
Kovoapa   Omolon, Anyuy, Sededema, Ojogina, Beryozovka, Yasatcnaya, Korkodon, Buyunda, Baligitcan, Popovka, Sugoy
TAWAVO
Patecta Rossia

Kolima ( rossiavon Колыма ) tir bost valentrone Sibiria.

Tawavopa[betara | va krent betá]

Klita poke Tcerski jaka isu Verxoyansk tigir. Bostxo tir dem vageeon is varoneon mefta is Kolima azekapa kene vatitef salt. Kolima bost va Sibira Bira ke Arktika Welfa konir. Tir teveaf lodabrotcaf bost ke Rossia, direemon gu Yenisey bost azu Ob azu Lena azu Amur azu Volga. Inaf celack tir vas 4 060 m³/v-.

Kolima bost va Saxa Sokasane az Tcukotka Winka azu Magadan remnir.

Salt[betara | va krent betá]

Kolima bost getalton toz nir aze arte Tcerski jaka lenttalton dadnir. Va moavafa gola ke Kolima jaka bam remnir. Azon va wedafa gola ke ronefa Sibiria keno Jansk azekexa lentronon konir aze lenttalton dadnir. Talte Anyuy jaka, bost va Kolima azekapa artnir aze tere va riskapa mantafa gu 150 km- is abrotcafa gu 100 km- nekir.

Oblaxa va Kolima bost bak Gulag ugal zo veguduyur : katice Debin widavama tigir banlize vawa stasa mal Magadan kal Ust-Nera va bost moe tana toloya kruldesa za vamoenir. Toleafa za mone Ust-Srednekan monaxo tigir lize molt ta divburera va divkawotayan yeld ke gola dere tigir. Batlizu Kolima bost tir rototan.

Kovoa[betara | va krent betá]

Nelkafa kovoa ke Kolima bost tid :

Kotavaf yolt Rossiavaf yolt Abrotce
( km- )
Kuksaxo ( km² ) Domega
Baxaptca Бахапча 291 13 800 Ronefa
Buyunda Буюнда 434 24 800 Ronefa
Baligitcan Балыгычан 400 17 600 Ronefa
Sugoy Сугой 347 26 100 Ronefa
Korkodon Коркодон 476 42 800 Ronefa
Beryozovka Берёзовка 517 24 800 Ronefa
Kamenka Каменка 279 6 140 Ronefa
Omolon Омолон 1 114 113 000 Ronefa
Anyuy Анюй 738 107 000 Ronefa
Taskan Таскан 232 11 200 Taltefa
Debin Дебин 248 5 530 Taltefa
Seymtcan Сеймчан 186 3 600 Taltefa
Popovka Поповка 356 8 350 Taltefa
Yasatcnaya Ясачная 490 35 900 Taltefa
Ziryanka Зырянка 299 7 310 Taltefa
Ojogina Ожогина 523 24 300 Taltefa
Sededema Седедема 567 18 500 Taltefa

Patectoy[betara | va krent betá]

Kene lok ke salt ke Kolima bost, taiga aala felir aze kadar ruga pok krimta. Koe bana gola tisa ana fentafa ke saneliakirafa tawava, tapsid is mata lava koe sid va atrira ke aal me noved : to gazaxo ke tij is berdava is trask is rucka tir.

Totara[betara | va krent betá]

Bost gan opra mali saneaksat kali teveaksat zo tutapar edje Arktika welfa loedje dere tir tapayana. Salt ke tutapayan salt bam vanpir nelkafa vawafa lya ke gola. Viele lava tir nuyafa, vatiteon 2000 km- ta kazara kan tota zo rosaved.

Lavopa[betara | va krent betá]

Vertuma ke Kolima bost tir azekafa noldakorafa, dum kot artnis va Arktika Welfa. Levgafa laumayera bak teveaksat ba bica gidilizer solve fentugal tir lewe celiskaf.

AKSATEAF CELACK ( m³/v- )
Lavopafa recela : Kolimskoye
( Patavayana giva wali 1978-1994 )

Divkawodara va moava is Gulag bolk is kusto ke Kolima[betara | va krent betá]

Vaticefi ki ke Kolima bostxo koe Kolima jaka isu Tcerski, nope jontiko kobaso pemaxo ke Gulag bolk zo grupeper. To tir patecta ke batakafa awalkera. Rossiavon, karedjo ruyer da Kolima va awalk sugdalarКолыма значит смерть ). Loo bato pemaxo bak sanda mali 1930-e ta savera va moava aultovesa koe bata gola zo koinkeyed. En tiyid ageltafo awalkopeso pemaxo lize konak vuntoy flintik xonukeyed, kosaf gu fentod ik askiperaja. I bat flintik benelon tiyid kosaf gu karlera ke Stalin aze bak Toleafa Tamavageja gejaflintik ke konak vedeyot zo loplekuyud. Radimi awalkera ke Stalin bak 1953, pemaxo adre zo griaskiyid.

Afigasuteks[betara | va krent betá]

Dere rupel[betara | va krent betá]

Vexala dem voapa ke Rossia

Bost ke Rossia
AlazeyaAmurAnabarAnadirDniproDonIndigirkaKamtcatkaKolimaKubanLenaMezenNadimNarvaNemunasNevaObOlenyokOnegaOxotaPenjinaPetcoraPurPyasinaSevernaya DvinaTaymirTazTerekUdaUralVolgaXatangaYana Yenisey