Lana kapa koe tawaday (suterot)
|
VildeksDufour W-ye parisaf kazik is Pétronille kur- is Henriette nazbeya abdiplekud da va ilanuk ke gadikya koe tawaday fu kapad, yason tiskitison va vumeltaf afizcek. Arti aluboy aksat, kepen viel artfir numen yasa waveon va int divilavar aze mallakitison egadar. Dufour W-ye va lakirirem ke intaf vroddolesik al beitur, i va listaf cuf is gijackaf irem. Latkafa yikye aguntanik ke Henriette dere tir ke koyara. Va Champs-Élysées revava az Neuilly koolakid aze va Bezons artlakid, i va widavama lentrone Paris arte tol-sanoye decitmetre. Remi zalor, yasama gan anamefa tuwava zo skebur : kusuca kotlize tigir, imwa ton kota uka, gael tir karaf, awalt jeber, adim afizcekany daktewer. Tukseem koe yorida zo isker aze yasama vecana gan listaf patectoy toz gozar. Sin va kuksapa dem karafa lava artlanid lize kelt tcazar : ina vawale aal va wafafa wira divnedir ise va yon worasik zoer, i va tulon banlize skeus witkusik. Dufour W-ya is nazbeya tid amidapafa : gadikya tir runkapafa voxen yikya weyustafa. Sinya moe sespado deasewed azen varafa yasa moe werd toz estur ise va bata tuwava votanyar. Toloye listafe is mempese yafe witkotusikye batlize gitiskise, va tanoya izgafa runda ke matela xaadad. Djurungruped, i va tulon Henriette jekupuse. Gadikya va tutulwawera ke alto gu tiavesa mundara luxeon lumisar. Yasama is toloye ayikye kle toz prilad, plataenon gan Dufour W-ya. Witkotye tid kanespafe nume va intafa blira skenon kareizud. Va Dufour W-ya puved ; Henriette yoke tigira ke gadye is aguntanye luxeon vanyer loeke funene.  Witkotusik, trutca ke Gustave Caillebotte, 1878 Tici estura, toloye yikye va sinya gu tiskirama moe witkot ganed. Dufour W-ya kalnaler, gan bate toloye megrupenikye dem reltafo alto zo jekupur. Tir mudikya, va batakafa divnedisa va nimateem gratca diskir isen ulimok va moueemap drigdar. Henri tan witkotusik va Henriette drumlanir, krenugon pulvir ise lasubrostar, va ine vazapafe is volgunafe. Gadikya koe kiewaf meem luxeon tigir kire galpeyer : zo djuviunsur, va jugemera cwasa leve skintusa tolonga mbi djutiskar. Tir gadiafa gu kotcoba, vandilitison va bata dure vebesa djumera. Henriette volson flecupur da va int tunuyar. Dositikye lakutcar voxen ine takaskarar. Arti abrotcifa acagira, tere xaar, koe « kusaf vask » lize yikye abdiplekuyur da ine va perca co rowir. Kore mecoba en dilizesa zo pimtar, pune dankara ke perca va vrutara ke bato fudaxomo tiavecker. Azon toloya ayikya va Dufour W-ye kese isu aguntanik ke Henriette kevlanid azen balemoy sin ko Paris abdi titawaltara dimlakid. Tolda tiskir, jotafe witkotye va gemelt tiskiyine do Henriette me rovulkur. Cwe al korenar nume ko Paris djukukazokever. Arti konaka abrotcifa kaaneyasa safta, va inafa oga tere katrasir voxen ant gadikeem ke Henriette irubar. Bantelya re tir kurenafa. Yikye gan bat warzot zo tugabentar nume batcepeson dimdenlanir. Trakur da vol co iskeyer da inya banviele mallaniyir voxe va intafa renara co gowelidayar. Arti tanoya tanda, Henriette is kurenik lakid millize bana kapa ke Dufour yasa dilizeyer. Edje kurenik kielon keniber, pune Henriette va mile witkotye gire wir. Pu ine movur da tel gemelt doon tiskiyin va int veber. Kurenik vanion divmoder numen Henriette ko Paris doon dimlakir. Dere rupel
|
 Moek ke La Maison Tellier larma, 1891 | ||||||||||||||||
.svg){kind=icon}
