Ingaxa (suterot)

Teliz mal Wikipedia.
Aller à la navigation Aller à la recherche
Ingaxa

Ingaxa tir berpotam ke Guy de Maupassant sanegayan bak 1884 koe taneatomon Le Gaulois fela az Contes du jour et de la nuit larma.

Va gabentafa stuva ke Mathilde Loisel kareizur, i va ayikya tuwiiskana gan klokara va kuluca num grebesa va intafa blira is tela ke kurenikye dimerbason va lana boza tiresoe me kruldesa. Bat berpotam gan tenusa wotraca iskesa va solnarira va lidok ke bata rupa pu askisikya is belisik zo adalar.

Vildeks

Rupa ton atoera va tira ke Mathilde dalaf koredik ke berpotam tozuwer. Vey unenikafa yasa num morafa anameda, tir kurenikya ke Loisel W-ye unenik ke Elda ta Sanegafa Tavera. Zo duxar kire va seltbil me roticfir ise va durgapa is tapega dun jugemer, i va coba nuve dure zavzasa klokaks. Taneaf pak ke suterot nedir da inafa kotcoba djudigina trabe tapega is glabuca en tir sume inafa vieleafa geltruca : oga tir morafa, ine va roga is listafe blucte me digir. Duxara ke inafa gropa tir maneke va tukulaweyesa nikya ke xida mea auzur enide me di zo nigesipir.

Lansielon, kurenye dem ganexa ke elda ta kapa dimpir. Mathilde toz ikuzer lodame vanyer valeafe : va meke blucte xariafe gu tcokera va mana bifa digir. Tere, kurenye va uma erba ta lustera va gemany zilir.

Joraviel vanfir. Mathilde wan zo kostrur : va roga me digir ise va jora toz klabur kiren kulikya diskisa va lolistafa roga banlize tigitid. Kurenye pirdar da tenekatason va uum va Forestier W-ya nik di auzur. Mathilde denlanir aze va lana ingaxa beitur, i va dye « duzflek ».

Tere joraviel artfir. Mathilde Loisel tir kiewatcapaf, tir « listaf lodam kota artanya, glabafa is kafa is kicesa is cugeke daavafa ». Moni baleme bartiv ke gazdacek bulur voxen viele kurenye gu lioza vaon vager, i gu morapafa lioza kapbure inafe blucte, pune in va fogelom kalion titlanir enide va disukera ke aryona ayikya va int anamplekusa ko « kulafa myotxa » me di levgar. Sin va riniz me ve trasid nume ta kon kal Seine bost golanid. Diola ke sielcek ixam al vreparlewer.

Deswason va blucte, Mathilde vofar da va beituyuna ingaxa al drasur ! Kurenye va varaf moolaniyin zalor gire exuler ; moni pere bartiv ke gazdacek aborkon dimlanir aze va ardialxe elogar, azis konaka fela abduplekuson va nyardexa pu korik dimvanburetes va roga. Tici afizcek, kurenye va koncoba men al trasir nume pu kurenya va twa mu Forestier W-ya dukalir, i va twa bazesa da budesiki ke ingaxa arbeweyer nume re zo dimempar, ugalwatason.

Arti perka, sinafa kaaneyara wan tid volwemtafa numen tolonga va roga djukurikaplekur. Latiskatason va ingaxa milafa gu tela drasuyuna, va rogiasik az rogiasik worad. Koe lana dolta ke Palais-Royal, va lana « duzpraka » tere trasir, i va roga dem dro vas bar-kun-tev-decitoy franc talolk nekev kastarama. Bam va tan-kun-anyustoy franc talolk konolemb va gadikye gan Loisel W-ye djukufavlar ise gu arak erbabeitur. Azon Mathilde va ingaxa koe rogak pu nikya dimkazawar.

Battode copafa blira ke Loisel tolonga tozuwer. Vredarur, Mathilde wetce tcatesik kobar, vageson dum « saneikya [...] olkoyolkoyon rojuse va intafa copafa erba » aksateon dimdodeteson va miaziliks.

Kurenye sieleon luxeon kobar. Arti tanoya sandapa ton irutara is copuca, sin va kotak don dulapokeem alten dimdoded. Mathilde mevielu nutir klaafe lodam intafa klaa ise va kotafa listuca isu jotuca al drasur : tir merokagrupene.

Bak lan taneaviel edje Mathilde moo Champs-Élysées ikpa gozar, pune va Forestier W-ya ware tisa lijotafa is brostasa kakever. Viele Mathilde kiavar, pune kulafa nikya me kagruper vieli ine va int atoer. Bam va gabentafa blira mali joraviel kareizur : va drasura va ingaxa, is va dimdodera va miaziliks droon gu bana lusteyena, is va olgafa kobara remi sanda. Forestier W-ya kontegesa bam razdar da bata beitayana ingaxa tiyir rolafa. « Inafa voda tiyir vas iclo alub-decemoy franc talolk !». Berpotam ba to bata razdara tenuwer.

Koredik

Mathilde Loisel

Inya tir dalaf askisik ke nega. Kobliyisa domon gu glastikeem is biwe vamoe dodelikeem is yambudikeem, va buvewera ke basruntanik pestaler. « Tir tana bana listafa is mempesa yikya kobliyisa dene unenikafa yasa ton rokla ke bali. » Soe erodon blir, va kwikya dikir, i va « jotaf breizik skus va dalintafa dulkafa monatcatera ». Soe tir volkalafa kire va ugafa puvegura ke kuluca me rovansar. Auzura va Forestier W-ya tanafa nikya va pirucapa divmodar maneke « nope niga is batcera is piksa is faxuca remi jontik viel ikuzer ». Batdume klokar, « kiceson dum Sphynx » va « raltadukaf cot ke daljek ok wilt ke nitca » lodam gubefa pot-au-feu estuxa pakana do kurenye opelikye fogevotar.

Dum sardikya klokar inde koe rumeikaf reizak co tigir : « va apulvafo sarandaxo dem ronekaf storn is afian gan ontinafa iyekotafa tilerda is dem toloye ontinafe kwikye diskise va drufta is kenibes koe mantafa iriba modovadayar ». Mathilde Loisel klokar da tir sersikya. Wori va tiveem me dir : opelapon gimuxar, dace narason va trogarn ke sanefa avinda. Radimion dakter da va kona gopluuna roga olegar : « kabe aka, co nutir en copaf, ~ gotur ».

Bata merotisa karolara va inaf diks isu digiks jupar da inya gu gabentafa blira zo lanzar, az kobarsasa blira remi toleaf pak ke berpotam. Va tanoya kalafa vula bak blira gruper : sirta firvina gan eldik ke Sanefa Tavera. Remi bat abic bartiv daavon ayewar : « kafa is kicesa is daavadagafa », izakon walzeriur, « alnitcanon gan puve » is fronason va « xult ke intafa listuca, ton aliuca ke intafa kiewatca ». Voxen setikera va bata zixa, va arak ke inafa blira loeke di tucopar. Dace eldik va ina katcalar. Ba taneafa toma ke blira, Mathilde pester da moe rundacka tigir, i va runda dubieyena gan dulkafa koblira. Goxe bali jupar da ina va batyon abic bartiv tcazapon di doder : va bata ingaxa beitayana gan Forestier W-ya drasur numaze va ara goluster nume dimzilir, aze dimdodeteson va bata tcazarsafa roga, va tanoya sanda tiskir, i va roga dem dro vas bar-kun-tev-decitoy franc talolk, trabe tufapa.

Mathilde fogetiyir volkalafe, en di tiyir. Trakuyur da tiyir basruntayane, tire moe seltbil di titfiyir. Va kwikya gotaruler, kraba ika mintila zo bulur dum lize dodelik gilirubad. Ison ine miv gokobar, va exomaf lag goskur : « va tcates lagap, va vitcaf ol ke burmotaxo », va grita ke tolonga tcater, va lava djaver, ise do dolekik acon goflider, « dem kita bene ma, dolekason, lutsaganon, kalrojuson va bet talolk ke intafa sutafa erba ». Inafa klokara va sersikya al kadar setra. Va katcalafa duga battode stragat : meviele modovadar da va beitayana roga me co di dimzilir. Bata telduca pu ine zo goroster.

Inafa moavayafa klokara jupayar da va antafa dina tufa al drasur : va listuca. Tire kubama ke kurenye gu nustuca ke exoma is ugafa dwira nendoyeyer. Viele arti sanda va Forestier W-ya gamdar, pune ina va Mathilde jontikeke sivaruyuse me kagruper : « Ine re kadayar pofa ayikya olgafa is figafa, ke sutafa exoma. Loitejeyene, diskijise va gratca is tise ton keraf nubeem », voxe « kotrafa gu intocafa is ixakafa daava », va stuva pu Forestier W-ya welidar. Belisik va virnafa pestaka vixasa va takra ke Mathilde rogestar viele nikya icde drasuyuna ingaxa dakter : « Voxen tela jinafa tiyir rolafa. Voda iclo tiyir vas alub-decitoy franc talolk !... » Mathilde va sedielaf aliugal tcazapon al doder.

Loisel W-ye

Kurenye ke Mathilde tiyir « papleketamik ke Elda ta Sanegafa Tavera ». Maupassant va bata uneinda grupeckeyer larde miv al tiyir papleketik ke Biratotara az dum Loisel ke mila elda. Loisel W-ye tir amidapafe gu kurenya kire tir kalapafe gu debala : va coba meinde co betar ise aulon blison dene morafa vreda va int puvoter : « Ax ! Mana kiewafa pot-au-feu estuxa ! Va mecoba lokiewafa grupé... » ~ kabdue sielafa estura diviegar edje kurenikya va dilgavaxa is gedelafa gestuxa dun klokar.

Gan aflicarura ke Mathilde zo rwalter voxe Loisel W-ye tir sintaik renas va kurenya ise felber viele va ganexa va sirta firvitina gan eldik lansielon sotcer. Batdume « zo akoydar viele wir da kurenya ikuzer ». Tiyir valeapafe da ina di tiyir kalafa. Viele Mathilde va blucteeem adraf gu tcokera va sirta divrozar, pune abicedje klabur : va balem-decemoy franc talolk wetar, i va erba ickrileyena ta intafa puvegura, i ta tulon « lustera va zelt az pakera va tcabanesa etsa [...] do konak nik koe Nanterre azeka », numen batkane kurenya va xariaf gem ta jora diskitir. Ina titir listapafa, ~ trakur, tukotrason va gem gu konaka imwa :~ « Va tuwavafa imwa plekutul. Batcoba tir krinayapafa bak bat cadim. Ika sanoy franc talolk va toloya ok baroya cuisafa raltada daditil. » Voxen sintaafe Loisel W-ye arte kunoya bora ile jugemera ke kurenya gire tigir : inya va to aka olegar kiren wawikafa nuvelara vanmiae kulikya tir ana plukera ».

To ine va beitara va roga bas Forestier W-ya rietar. Va abegafe Mathilde den sieljora vanstar aze koe letaf bontayam do baroye are weltikye mali miamiel di keniber edje Mathilde ilgaeleson dun stuter. Batcoba di tir inafa bocafa aulafa kenibera. Dim yasaxo tigiso keve Vawila ke Awalkexik gestayana gan Maupassant wetce lecaf yolt ke mejera ke tolonga, Mathilde va drasura va roga vofar numen kaaneyason va muka Loisel W-ye nekev cuera mielon di mallanir. Voxaze va denuca godoster : duz tid griawiyis. Bam nopeon va gadikyef konoleksam wetar enide va boza nekina gan drasura va roga di dimerbar. Va goni ke teldik is kurenik meviele fogekrular numaze gu kobasa is polesa sanda va int lanzar viele va bozara gu dimlustera va ingaxa godimerbar : valey kobara dene elda, « va gedira va dolekikafa variaga sielcekon kobaveyer aze mielon ika aluboy talolkam va bu fereon gimalsuteyer ».

Va meka ewaja kev kurenya tiyar ise meinde culimer. Inafa jugemera tid vodiskafa iskiren ant tela ke Mathilde tid. Isen bate sintaafe kurenikye, do kurenya, va yal ke lan stutes mielcek koe eldaxe tcazapon doder.

Forestier W-ya

Inya tir kulaf nik is xidaf pusik ke Mathilde Loisel. Sin dene xida rungrupeyed lize tiyid kare prostewa ke loa glastikafa yasa visteleyed. Va Mathilde agralon askiper voxen bane ine tir lickafe gu kuluca ke nik. To ina va ingaxa pu Mathilde beitar aze mevofason va ikaplekura dimnarir. Viele arti sanda va Mathilde gamdar, pune va savsafa milxidikya tuguazayana gan exomaf lag me kagruper solve int « wan tir jotafa is listafa is brospasa »: gan erba gu ligundera ke ugal al zo nendoyer.

Zo tuaklar viele Mathilde givar da va sanda ke blirugal ta dimdodera va ingaxa al greber, i va ingaxa ika dro vas iclo aluboy franc talolk. Volins tiyir askisik va volkaluca ke nik.

Drunara

Geltreva koe berpotam

Maupassant swavaf nazbeik ke Gustave Flaubert tir tan felisik va geltreva. Bati suterotafi oxi va geltruca lorapalon lakaatoer, medoncason mei turietavason, ise va koredik ke sanef ik kobas ok dile glastaf runt ginakilar. To toda ke Loisel tolonga tir : « Inye tir papleketamik dene Elda Ta Sanefa Tavera, inya tir vey unenikafa yasa ». Belisik va pestakevafa pimtara mei swavopafa vayara va koredik me trasir, vols kre geltrevafa trutca tcazedasa va geltruca djulingena gan suterotik dum litevaf ok geltrevaf lingesik milugalaf gu Maupassant is koaykas va geltruca ke dilintafa disukera gu yamba.

Maupassant va neki ke elupkafa buvewera dure grebesa va blira ke Mathilde me aneyar : anton rabater ise va keska pimtar, mekomalyeson. Laizafa tenusa wotraca ke nega ~« Voxen tela jinafa tiyir rolafa !»~ me tir do maltaves lidok, numen belisik va mecoba ke kategira ke Mathilde di gruper : meka ikuzera, me Mathilde vijese, me dimdodera gan Forestier W-ya... bekarotir... Maupassant va belisik logas va razdaks isker aze malfir. Bata suterotopa tir opelapafa arkum gu pestakevafa suterotinda ape co nediyisa pu belisik va Mathilde vijeyese ok Forestier W-ya dure borepesa.

Kotafa pwadera va berpotam tir milafa : vreda ke Loisel exoma kan abic godjaf conyukaks zo dalinger : estu walzilinu moe « anamkafa azega besayana gu mila ploda mali barka » ape kretsayana, is diliodafe papleketikye kosmase va aabreak vecanon dakteson : « Ax ! Mana kiewafa pot-au-feu estuxa, va meka arcoba lokiewafa grupé !» edje kurenya lenteon « va sutkafa gestuxa gizanoluna koe cuisafa porma modovadayar ». Belisik va kona oxifa trutca wir, i va nakila gan Courbet nedisa va kotcoba is loeke diepilesa. Radimion to lustera va gem is flidera va dro kiren balem-sanoy franc talolk tid itayapa tove morafa tolonga. Azon moi beitara va ingaxa pu Forestier W-ya, bartiv ke sirta mamler, i ke sirta nujnana kan afifa lingenaca co rotisa ke kona truta ke Monet, lize belisik « va Mathilde izakon is bolon stutese, alnitcane gan puve wir, i va Mathilde mea trakuse va koncoba, xulton gu dilintafa listuca, alion gu kiewatca, koe tec rujod ke kaluca nekina gan kota brudira ». Numafa malaytcura tir cugeke udutafa, isen geltrevafa pimtara gan Maupassant va kimtafa vieleuca ke basruntayane Mathilde, va pufafa kevaxara va afifa nakila ke sirta divnedir : « Ina va porma tcateyer, lameson va raltadukafa vitoda kev sudafa tawoldaxa is ludev ke milka. Va zionafa grita is klaim is bilunt tirdayar aze bene wazdel turodayar ; kotgazdon va dorita gu nuda titplekuyur aze va lava ticplekuyur, vukison moe kot vegem ta vangaelera ». Batabica pufafa conya sume skayasa keska ke pestakeva va Ingaxa gu geltrevafi oxi bendecked.

Ingaxa trelaf berpotam va opelafa rupa ke opelik kareizur. Meka tulistasa olegara loeke tir : Maupassant va geltrevafa is pufafa nega askir, numen batcoba va tenusa wotraca tupoapar.

Ingaxa : wulpelza

Wulpelza tiyir muka gofingesa va zveri kir jowikasisa va data afixa num vanimpasa az vannarisa : zveri gan dure niarusi afi zo rested numaze va volxeyuca gu bli doded. Mathilde Loisel ( isen francavafa sugdala ke Loisel yolt tir zverimi ) dere tir kosaf gu jowikasira ke kunoya afixa malkubuna lev afita gan ingaxa beitayana pu Forestier W-ya.

Mathilde va co godigina muka me dadir : va « gedelafo guto giskiso va droiskafa orilga » tigiso koe « ekoltaf is kofigan bontayam », is « afigasa dilgavaxa [...] is storn frofas va rebava gu savsaf koredik is divulafi zveri koe zultafo aalxo ». Tir lickafe gu Forestier W-ya nik : dile auzur voxaze dimlanison tir cugeke vanmanane, « ikuzeson nope niga is batcera is piksa is faxuca remi konak vielcek ». Wori inafa blira tir erodafa, do renase kurenye, voxe va kota batcoba vligur. Batdume duzafa ingaxa va inafa merotacagina jekura askir, dum awalkolafe ikse ke wulpelza. Ingaxa va kunoya afixa kabur, dure niaruson dum wulpelza, armoron gu stutera spikonasa va Mathilde maneke va ingaxa tere drasur. Randera griawir nume geltruca ben berga ke Mathilde grabler. Ingaxa al griawir numen klokara kenion. Roga va blira ke yikya nekev inafa gojafa pokolera me artazukayar : va meki diolafi roti dir. Mathilde va gradilafi bali ugalar, dum Cendrillon koe reiz ke Perrault, vox volsafi : inafa blira tiyir xariafa aze va sirta klokayar numaze ko sutuca flaydur.

Forestier W-ya loeke luxeon gubecayar : va rozara ke wulpelza me dulzayar nume ika duzingaxa va int me rawayar. Va ingaxa dem rolafa aka va int anton tuvaleayar, vox dem aka sizuntapasa lidam garifa akoba. Kas me tir aneyan mukot ? Va bidga vefar ise dace nekir voxe me kempar. Gruper da muka sometid diolafa : roti tir ke disukera va sina. Batmana sumeuca icde ugafa muka va inya tuayar : viele Mathilde dakter da va sanda ta dimdodera va roletafa ingaxa al greber, pune Forestier W-ya birgon co rowiver, grupeson da va garifa is tcazapafa roga re digir. Meinde : va bali ke kimtafa nikya forendar. Inafa ageltafa kuluca tir dira va takra metuodjana gan erba, is grupera da rolafa ingaxa lidam duzingaxa ton tcaza sodrayded.

Mefavlaf awalkoday

Maupassant va blira is ayikya is nik is witkotus afizcek moe Seine bost leve awalt albayar. Ede va duxara al gruper, pune batcoba vol tir kuranafa tici blira viele gan akola zo tuoviskayar. Va awalkoday koaykayan gan Mathilde pu tolonga nope drasura va ingaxa vol plier ise divnedir eke duxara finena gan Mathilde is kurenikya tir giopafa.

Maupassant ins jupar da Loisel tolonga keve Rue des Martyrs ( Awalkexik vawila ) vistaler : yolt ke nuda va fuza dakter. Viele Mathilde va ingaxa drasur pune malyedar da al rolayar, isen larde kota rola va vugdara sodiner, mevulkuson da yikya dene alkaf kizey zo gaayar. Nope seltafa rotakafa tirka ixam bliyir nume zo duxayar, voxen gan exomaf lag re zo titmimar. Va inafa antafa kulaca drasur : va listuca. Va sintaafe kurenye tit malaytcura doimpar, i va kurenik teniskon gonokobas is drasus va erodafa blira is govulkus va kota klokara va tcabanesa etsa. Kas bata awalkexafa blira va iteem ke Mathilde fenkur ? Mekon : ine wan laner da gu rokaf digiks gan bali al zo zelar : i gu kuluca. Maupassant va meka sidjesa ewa kou inaf art plekur, isen trakura va inafa bloduca ke tisa coba, va swava meviele remfir. Efe inafa telduca zo gokagruper : Mathilde pu nikya va drorso ke duzingaxa dimdoder. Sometir dubiesik voxneke sometir tienafe.

Bat awalkoday tir inafa antafa coba ware dikina : to dro ke telduca. Batdume tir oklafe da pu Forestier W-ya dakter da va kotcoba ta dimdodera va boza al wetar. Voxen viele nikya va ageltuca razdar nume va giopuca ke duxara konedir, pune mefavluca ke basruntara kev gexata divroidar. Mathide Loisel va koncoba mea dikir, va dace me awalkexafa ravalduga. Ede awalkexik co krulder, pune Loisel W-ye va semek co riwer : tir blodafe gu mecoba, va puvegara va renanikya anton djumeyer, mekon culimer ise dace finer da mo narana kelda vaon di vandositar.

Dere rupel

  • Guy de Maupassant : Francavaf francaf suterotik ( 1850-1893 )
  • (fr) La Parure, dene Wikisource ( xantokrent )
  • IngaxaLa Parure ), kalkot- 2013 gan Élisabeth Rovall, banliz
Ingaxa
Open book nae 02.svg
XANTO
Vergumvelt La Parure
Sutesik Guy de Maupassant
Ava Francava
Suterotinda Berpotam
Evla 1884
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Le Gaulois fela ke 17/02/1884 lize Ingaxa berpotam taneatomon zo sanegayar