Tellier tresexe (suterot)

Teliz mal Wikipedia.
Aller à la navigation Aller à la recherche
Tellier tresexe


Tellier tresexe tir berpotam ke Guy de Maupassant sanegayan bak 1891 koe La Maison Tellier larma.

Vildeks

Tellier tresexe tir tresexe yoltkirafe gu Tellier W-ya tilikya, winkon tigise koe Fécamp. Ba lan pereavielaf siel dum gubeon, anelik ke « zazdatresexe », i lokon dodelik is francaf ok englaf birelik voxis glastik ke widava kabdue tresexe va sint kabelcad voxen tuvel me zo fenkur. Radimi rwamara nope barlipaca razdasa va ziadgera is piruca kiren sinye va tresenya bal bata saftatena aundesinon me rotimpavantad numaze mallanid. Lantan ke sin va xe anamemanir nume va lazava ke bata budera kosmar : nope « taneafa tinefkara » metan me zo auzatar. Batdume gundafi tiki wal tresera is alka zo exoner aze remi varafa nega trenatar.

Tilik, i Tellier W-ya, va unenikyeem ta tcokera va tinefkara ke inafa Constance nutikya tire al divstar. Azon perzapafa koyara ke tilikya is tresenikyatum kan impadimak tir, kore sinaf kor askir da sinya nutid alkik. Tire lane papleketikye tarkapon kalitir da « bata weltikya va tucpastaxe arud ». Banugale tresera lokon tiyir widavafa tegira numen mek tawadayaf korik va sinafa ageltucafa gropa uculer.

Viele artlapiyid, pune va irubasikeem ke tela tawadayafa widega woeped. Direrielon, bal fipta, miltanya nutisa dumivafa kir bluctekorafa boreson roed, kimbason va intaf jotugal isu drasuyuna karuca larde va ana savsafa eba re ud, sume katalikevafa romeyura. Bata awiafa lorbuca va gertikye felber, i gertik torigis va batyona borera dum lorafa sugda ke kava ke Lorik. Moi divlanira va uja, widikeem va sina kiavar dumede va alkaf ezgalday tazukayad.

Voxen koe bata wida sinafa gropa fure vebidur. Tire Joseph Rivet, i berikye ke Tellier W-ya, radimida va kapa mu sina al firvir, pune va tana Rosa lagimpavantar. Voxen bantan kovewar numen uum kalion zo tenekar. Milk tir gaves kire milsielon dimon di gotigir enide va kera ke anelikeem ke Fécamp di dulzar.

Moi sinafa dimlapira ko Fécamp, kapama dene Tellier tresexe zo grustar, adoneteson va giltaf nobasikeem. Don tilikya roer ise va anelik roedar. Va fastafa askira is ruyatak bundar. Vielcek rundayan lev sugda ke Lorik is alka ton draera kle tenuwer.

Wori, nekev anameda nutisa fakedafa dene tresexe, sutesik torar da bali ke batyona ayikya voxis lojadion ayikyafa gropa ke bane sare zo godabored.

Dere rupel

Tellier tresexe
Open book nae 02.svg
XANTO
Vergumvelt La Maison Tellier
Sutesik Guy de Maupassant
Ava Francava
Suterotinda Berpotam
Evla 1881
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Moek ke La Maison Tellier larma, 1891
Open book nae 02.svg Grabom ke Guy de Maupassant Open book nae 02.svg
  1880  

Cwekfixuya

Delt va Guy de Maupassant
  1881  

Au printempsEn familleÉpavesHistoire corseHistoire d'un chienIzva ke dielkwikyaLa Femme de PaulTellier tresexePar un soir de printempsOpinion publiqueSur l'eauUne aventure parisienneLana kapa koe tawaday

  1882  

Autres tempsAux champsCe cochon de MorinClair de luneConfessions d'une femmeConflits pour rireConte de NoëlCorrespondanceEn voyageFarce normande

  1883  

DenisDeux amisEn merEn voyageEnragée ?Humble drameL'Ami JosephL'Ami PatienceL'Âne