Oksana Catcko

Teliz mal Wikipedia.
Aller à la navigation Aller à la recherche
Oksana Catcko
1987-2018
Ukrainaf arotievik isu ayikyevik

Oksana Catcko ( ukrainavon : Оксана Василівна Шачко, kobl- ba 31/01/1987 koe Xmelnitski koe Ukraina, aw- ba 23/07/2018 koe Montrouge koe Franca ) tiyir lingeropaf yambik is arotievaf is ayikyevaf sayudasik is redusik va Femen ukrainaf lizor do Oleksandra Cevtcenko is Anna Gutsol.

Blirizva[betara | va krent betá]

Oksana Catcko dene Orthodox kristevafa yasa koblir. Dene alkafa bema vayar lize vanpir lingesik va brija. Konak inaf grabom koe Ukraina aze divefa patecta zo wonad. Voxen tis sanbalemdafa va alka dimfolir aze va doevafa rieta dulaper.

Dene kotla ke Xmelnitski va Oleksandra Cevtcenko is Anna Gutsol rungruper. Sina va rojura va ayikyaf rokeem is muxasa nuyuca belcon sayudad.

Femen lizor[betara | va krent betá]

Moi lana exaksara rankeyesa va awalkera ke balemoya ayikya nope ropesa enja is avonanuca dene ropexe ke Xmelnitski, Oksana Catcko is Oleksandra Cevtcenko is Anna Gutsol bak 2008 va Femen lizor zabdud.

Bak anyusteaksat ke 2009 bal exaksare koe Kyiv, poatason va kanaceem gu ledungera va tegira ke sinaf lizor, va nedira va moueem taneaskir. Bata exaksarinda kaikion titir nuvacka ke Femen is jontikara ayikyevafa sayudasikya koe konaka patecta. Oksana Catcko tir redusik va sayudasa is listopafa ewavinda ke Femen lizor : lingera keve mebafa java is imwafa sona.

Ba 19/12/2011 Oksana Catcko is Inna Cevtcenko is Aleksandra Nemtcinova koe Belarusa exaksad, kevotceteson va torkeva ke Aleksandr Lukacenko taneagadesik. Kabdue aveg ke belarusaf gaderopaf ardial koe Minsk, diskisa va rolaf nyoxeem vuestes va tel ke Lukacenko, va int basvaged aze arti abic bartiv moe goldaf etol gan konake ayikye zo soped aze kan diremuk ko aalxo mone Gomel zo malstad lize bak mielcek is fentodcek zo ernigad. Zo jovled voxe va wida tere di kallanid. Ba 21/12 mila baroya ayikya va intafa brazara bal felafa laxa koe Kyiv pintad.

Oksana Catcko bal exaksara ke Femen lizor koe Paris, 2012
« Pulvitison va uumap, va yamba malsavet. Wetce brijopik va brijafa ewava icde cinaf lizor konakviele djuskuyú. Arti kaaneyasa tolda, va redura va bata ewava cwe al tcedé : ayikya dem imwafa sona bene usuk is ton olgafa tirka nubokumasa is nimatsotcesa is adja keve alto is zidesa gexata. »

— Oksana Catcko, Crash Magazine, 12/2017


Gaderopaf gelbesik koe Franca[betara | va krent betá]

Dratcena koe vo, Oksana Catcko bak 2013 va Franca gaderopon ditsadar aze arti tolda mbi kserar. Ko yambikafe xe koe Clichy levirubar.

Fure mulos dene Femen lizor gepoyted. Oksana Catcko is konakara izvafa sayudasikya va relidafi is rictulokafi roti pendeni gan Inna Cevtcenko is pokeik ke francafa gama ke grustaks kovewad. Batdume va lizor bulur ise va lingeropa en ektudar.

Ba 23/07/2018 koe Montrouge deoron ice Paris, misepeson kser.

Dere rupec[betara | va krent betá]

→ Femen

Vuestexeem[betara | va krent betá]

  • (en) Oksana Shachko: Counter-Religious Iconography, 032c,‎ 10/2016
  • (fr) Galia Ackerman, Anna Hutsol, Oksana Chatchko, Inna Shevchenko, Femen, Paris, Calmann-Lévy, 2013, ISBN 978-2-7021-4458-9
  • (fr) Galia Ackerman, Oksana Chatchko était une vraie révolutionnaire, une artiste qui voulait transformer le monde, Huffington Post,‎ 30/07/2018
  • (fr) Christophe Dauphin, Oksana Shachko, Les Hommes sans épaules, n° 44,‎ 10/10/2017
  • (fr) Quentin Girard, Oksana Chatchko : mort d'une Femen désabusée, Libération,‎ 24/07/2018
  • (fr) Olivier Goujon, Femen : histoire d'une trahison, Max Milo Éditions, 2017, ISBN 978-2-315-00818-6
  • (fr) Chams Iaz, Oksana Chatchko était comme une muse pour moi, Le Temps,‎ 25/07/2018
  • (en) Armelle Leturcq, A meeting with Oksana Shachko, Crash Magazine,‎ 12/2017
  • (ru) Ее убил Париж. Жизнь и смерть Оксаны Шачко, Радио Свобода,‎ 28/07/2018

Oksana Catcko

Oksana Catcko

 Koblira  31/01/1987,
 Xmelnitski, Ukraina
 Awalkera  23/07/2018,
 Montrouge, Franca
 Vedeyot  Ukraina
 Tegira  Arotievaf ayikyevik
  Bifa 
P Parthenon 2.svg  Tuveli icde Izvopa  P Parthenon 2.svg
Rb-star.svg  Tuveli icde Arotieva  Rb-star.svg
Anarchist star.svg
Arotievikya

Fanya BaronOksana CatckoVoltairine de CleyreMercedes Comaposada GuillénVirgilia D'AndreaAlexandra David-NéelEmma GoldmanClaudia López BenaigesLouise MichelFederica Montseny MañéLucía Sánchez SaornilFlora Sanhueza RebolledoMaria NikiforovaOlga TaratutaAndrea Villarreal