Judith Gautier

Teliz mal Wikipedia.
Judith Gautier
1845-1917
Francavaf suterotik

Judith Gautier ba 25/08/1845 koe Paris koblir aze ba 26/12/1917 koe Saint-Enogat awalker. Tir nazbeikya ke Théophile Gautier is Ernesta Grisi.

Va Maxime Du Camp wetce povakik dikir. Théophile Gautier va nuyucapa nutisa xanta ke inafa teykasa korobaca pu Judith isker. Dum gadikye, Judith tir suterotik : inafa taneafa webera va suteroteem tir teliz icde kalfrancavaks ke Baudelaire va Eurêka ke Edgar Poe, teliz karolapan gan ezlopik suteyes va Les Fleurs du mal larma.

Judith tir arayakirapik siniavuckus tuke tavereem ke Din-dunling, ke siniaf gaderopaf gelbesik emudeyen gan Théophile Gautier. Bam va Le Livre de Jade larma dem siniafa ezla sanegar. Bata larma va kiewatcapa trasir. In dere tiyir sutesik va konak berpot is jontik berpotam is yona drunta.

Facnapan yoke intafa listuca, Judith va Catulle Mendès suterotik korenar, voxen Théophile Gautier va kurera tsuner kire va Catulle Mendès wetce blijirakirik torigir ; bata vewara va soltanara ke gadikeem ke Judith ostik daskir, lecen Ernesta va nazbeik zober. Kurera ba 17/04/1866 voldo Théophile Gautier areldon sokir ; vrutasik ke Judith tid Flaubert is Turgan, solve Catulle Mendès gan Leconte de Lisle is Villiers de l'Isle-Adam zo dositar. Catulle Mendès tire tir kurenikaj uculeyen gan Théophile Gautier, nume tolonga bak 1874 soltanawer aze bak 1896 ten solyerumar.

Judith tiyir napik ke Richard Wagner, kakeveyen bak idulugal ke 1869 koe Luzern. Va imwayikya ke Parsifal co koswavayar. Va konak suteks icde lexasik dere suteyer, ise doon daalapayar.

Dere tiyir nik ke Victor Hugo isu fertik, koswavas pu in va konaka ezla.

Tir taneafa ayikya kazawana ko Goncourt Cultim, bak 1910. Va deba ke inton mekarolan Jules Renard bam plekur.

Judith bak 1917 koe intafa mona ke Saint-Enogat awalker.

Kalkotavayan suterot[betara | va krent betá]

Yona imwa ke RonekaFleurs d'Orient ) : larma ke Judith Gautier dem ronekafamaf warzotam, sanegayana bak 1893.

  • Balemoya proyikya ke ArabaLes Quatre sages d'Arabie ), kalkot- 2013 gan Sabrina Benkelloun, Wikikrenteem dotay, banliz 
  • DjemilaDjémila ), kalkot- 2013 gan Sabrina Benkelloun, Wikikrenteem dotay, banliz 
Judith Gautier

Judith Gautier

 Koblira  25/08/1845,
 Paris, Franca
 Awalkera  26/12/1917,
 Saint-Enogat, Franca
 Vedeyot  Franca
 Ava  Francava
 Suterind  Berpot, Berpotam
  Suterot 

Berpot - Berpotamak

  • Le Dragon impérial (1869)
  • L’Usurpateur (1875)
  • Lucienne (1877)
  • Iskender (1886)
  • Fleurs d'Orient - Yona imwa ke Roneka (1893)
  • Le Roman d’un éléphant blanc (1893)
  • Le Collier des jours (1904)
  • Le Paravent de soie et d’or (1904)
  • En Chine (1911)

Ezlak

  • Le Livre de Jade (1867)
  • Les Poèmes de la libellule (1885)
  Tuveli icde Suteroteem