Surp Astvatsatsin (Areni)

Surp Astvatsatsin uja ( armenavon Սուրբ Աստուածածին եկեղեցի ), tir alkaf debak tigis koe Areni dota ke Vayots Dzor winka vagee Xayastana.

Uja moe azekexa vamoe Arpa kuksa tigir. Inafa vegedura bak 1321 gan Momik armenaf sposaf yambik zo bokayar aze moni 1338 moi inafa awalkera zo tenukeyer.

Vegeduropa[betara | va krent betá]

Surp Astvatsatsin tir sfeltafa uja dem tanoya truga is vamoeon feykoraf sfelt. Toloyi tuveli va kolanira va kolna noved, i bati geuon is bani taltuon. Tanoy darn va Ketya keve volseytaf cisek vamoe uwedjela ke taltefi tuveli zo balumayar. Bat balumaks isu jontikar tigis keve uja gu grot ke grabomeem ke Momik Vardapet zo torigid, i ke Momik dere tiyis vegeduropik ke uja sedme kosuteks. Momik nope volseytaf balumaks ke Noravank tucpastaxe tigise gerone Areni arte mon 6 km- nelkon zo gruper. Gamda keve cisek vamoe uwedjela ke geefi tuveli zo balumayad.

Koiste uja, vokodakorafi skunderi va truga is vamoef sfelt giskid. Volseytaf balumaks volas va vundaf tisik va balemoya raporbopica wale skunderi is levak ke truga ziked. Xuf dilkam aname truga is dilkam reme lentoreem jupad da afi kal sidot remstir. Lana mialivamufa vrepta keve ronefa rebava ke kolna tigir isen fuxedjama ( okon blixeko ) vompokeon tigid. Vokodakoraf dilk vamoe vrepta gu tanoya yunkesa is drefa briva zo solzarter.

Yona naboxafa cugexa isu xatckar atcom poke uja zo rowid. Rawaks ke berma ke XIII^-eafa decemda ke Tarsaitch Orbelian ke Syunik moneon dere tigid. Rawaks ke lana milsarefa za vegeduyuna gan Sarkis tujradik mali 1265 kali 1287 arte lentroneon tanoye kilometre tigid. Millize rawaks ke ara losavsafa za tigid.