XayastanaVayotsDzorWinka

Teliz mal Wikipedia.
Aller à la navigation Aller à la recherche

Vayots Dzor Winka tir meftavafa winka vagee Xayastana, gerone Yerevan kelu, jowon ice Azera.

Winka tir dem 3 widavafa dota isu 5 tawadayafa. Widot tir Yeghegnadzor.

Tawavopa[betara | va krent betá]

Wiks va Jermuk krant

Tigisa vagetalte witafa Xayastana, Vayots Dzor winka tir dem walmot vas 2308 km² ( 7.8 % ke varaf welmot ke patecta ). Tir tela lesaneliakirafa winka ke patecta. Divefa jowa do Azara talteon is roneon tigid. Koefa jowa do lenteon Gegharkunik winka isu lentalteon Ararat isu geroneon Syunik tigid.

Izvon, noelafo tawavo ke winka va lok ke Vayots Dzot kola ke Syunik izvafa winka ke savsafa Armena kereler.

Vayots Dzor tir meftavafa gola. Nelkon tir dem baroya jaka : lenteon Vardenis jaka is isteon Arpa jaka is geeon Vayk jaka. Dem ontine vas 3522 m-, Vardenis tculk tir ane ontine ke winka, solve Areni krant tir ontinaf is lodomaf vas 850 m-. Vayots Sar tculkfey ontinaf gu 2586 m- riwe iste winka tigir.

Wiks va Arpa kuksa

Vayots Dzor tir dem jontika voa isu klita isu lavay. Tela lozolonafa kuksa tir Arpa kuksa nisa koo 92 km- koe tawavo ke winka. Inafa klita moe lenttaltefa datca ke Syunik azekonta dem ontine vas 3260 m- tigir aze va Aras kuksa konir. Tir dem yona kovoa disa va stoya dum Jermuk kuksa isu Herher.

Yeghegis kuksa tir dalafa kovoa ke Arpa. Va krantoza nendana gan bowere wetce tumtaxo ke govitafa blira konir.

Loa kuksa ke Vayots Dzor tid adalakirafa gu kaliaf cel is koliavapa. Abdumimaks ta remburera va lava ke Arpa kuksa van Sevan uzda zo skuyur. Arbureteson va celki ke Arpa kuksa, lavaberlotaf narilt bak 1981 mal Kechut oblaxuzda kal Sevan uzda tulon zo vegeduyur.

Yona uzdama koe krant ke Herher kuksa dere tigid.

Wiks va Vayk jaka

Izva[betara | va krent betá]

Vayots Dzor yolt gan Movses Khorenatsi taneatomon zo miwayar. Soe jontik debak isu muka evlon gu gelkeraporugalaf firday ik iyekotugal bal rawopafa kojoxara koe gola zo kosmayad. Gretcaks keve kiriafa buta kaatoes va tcabanesa nakila ik sulem dere zo kosmayad. Nope batyona rawopafa vayara, izvopik al levaykad da gola tiyir saneliakirafa mali abdiizvugal. Arulatum ke Areni don Areni-1 arula guazafa gu 6100 tanda is kosmayana bal rawopafa kojoxara skuyuna wali 2007 is 2011 divnediyir da gola tiyir saneliakirafa bak -V-eafa decitda. Tuvoraxo tiyir dem kacasis blet is tanoyo xuvasiko is yona belcetasa rumela is tawalodaf gilmok ise co tir telo losavson grupeno ke izva.

Rawopik va tanoya leltafa vukuda guazafa gu 5500 tanda dere trasiyid.

Mali -VIII-eafa decemda, Vayots Dzor refa gola tiyir ki ke Urartu gazaxo. Kaikion tiyir pak ke Armena gazaxo, tison utca ke Syunik winka.

Jontika uja isu tucpastafa belca isu teremtaxe wali X-eafa is XIII-eafa decemda zo vegeduyud ugale Vayots Dzor tiyir pak ke Syunik gazaxo.

Bak Mialukugal lesovawa va gola ke Vayots Dzor remlakiyir, tulon vawa reugale kagluyasa va Martuni widava isu Yeghegnadzor. Vayots Dzor va tano zolonafo tavexo ke mialukugalafa Armena bravayar, i va Gladzor kotla zabduyuna moni 1280 gan Nerses Mush.

Rekola wali XV-eafa decemda isu XVII-eafa gu tela lodorikafa ke izva ke Vayots Dzor zo torigir. Gola vanpiyir meldxo wal tolgenis milk is turkaf ok iranaf grelt. Batdume jontika cugexa isu wida zo vilayad isen sanelia zo arbureyer. Gola radimion tiyir ki ke Naxçivan sersaxo isen yolt tiyir Daralagez kali 1918.

Bak taneafu acku ke XIX-eafa decemda moi rossiapersafa geja ke 1826-1828 is nope Turkmantcay tenusa bioga ke 1828, Vayots Dzor winka mal Persa kal Rossia mwaruyur. Bak mil ilanacek va Armena warzafo ristulaxo zo kowinkayar. Bak 1849 Yerevan bowexo don Vayots Dzor zo reduyur. Vayots Dzot keon vanpiyir utca bak 1870.

Wali 1918 is 1920 gola tiyir ki ke sedielafe sokasane ke Xayastana. Moi levrotira va patecta gan Sovietafa Tanara, gola kali 1921 is cenera ke Bolcevik roti acagiyir numen Vayots Dzor winka gu Seltevafe Sovietafe Sokasane ke Xayastana zo kodoplekuyur.

Remi sovietaf ugal, refa Vayots Dzor gola tiyir ton toloya utca : Yeghegnadzor is Azizbekov. Radimi volruptesuca, ristulafa zabdura ke 1995 va sina gu tela refa winka jeayar.

Sanelia[betara | va krent betá]

Bak 2016, uldinena varafa sanelia ke winka tir vas 50 800 irubasik, trabe for vas 23 ir-/km².

Widavafa sanelia tir vas mon bareaca ke kotak.

Towara ke sanelia ke Vayots Dzor winka (1991-2016)

     Sanelia sedme otulara.     Sanelia sedme uldinera. Xantaza : ArmStat [1]

Doteem[betara | va krent betá]

Doteem ke Vayots Dzor winka
Dota Ord Welma
(km²)
Sanelia
(2011)
Widot Wida, monaxo Ewava
Jermuk [2] Widava 497 7359 Jermuk Gndevaz, Herher, Karmrashen Jermuk residential buildings.jpg
Vayk [3] Widava 184 7064 Vayk Arin, Azatek, Por, Zedea Arevik Stadium, Vayk.jpg
Yeghegnadzor [4] Widava 27 7944 Yeghegnadzor Yeghegnadzor landscape3.jpg
Areni [5] Tawaday 438 10 410 Areni Agarakadzor, Aghavnadzor, Arpi, Chiva, Gnishik, Khachik, Mozrov, Rind, Yelpin Areni village.jpg
Gladzor [6] Tawaday 131 5220 Gladzor Getap, Vernashen 2014 Prowincja Wajoc Dzor, Gladzor, Widok wsi z drogi H47 (03).jpg
Malishka [7] Tawaday 86 4460 Malishka Malishka Village, Armenia.jpg
Yeghegis [8] Tawaday 477 5961 Shatin Aghnjadzor, Artabuynk, Goghtanik, Hermon, Horbategh, Hors, Karaglukh, Salli, Sevazhayr, Taratumb, Vardahovit, Yeghegis 2014 Prowincja Wajoc Dzor, Trasa Spitakawor - Szatin (05).jpg
Zaritap [9] Tawaday 468 3906 Zaritap Artavan, Bardzruni, Gomk, Kapuyt, Khndzorut, Martiros, Nor Aznaberd, Saravan, Sers, Ughedzor Artavan Village, Armenia.jpg
Vayots Dzor
Վայոց Ձոր

Flag of Armenia.svg Vayots Dzor portal logo.png
Vayots Dzor in Armenia.svg
RISTULA
Patecta Xayastana   Flag of Armenia.svg
Utcinda Winka (marz)
Widot Yeghegnadzor
SANELIOPA
Sanelia 50 800 [10] ir- (2016)
For 23 ir-/km²
Ava  Armenava
TAWAVOPA
Welma 2308 km²
betara teza

Vuestexa[betara | va krent betá]


LocationArmenia.png
Navegador.png  Winkeem ke Xayastana  Flag of Armenia.svg

AragasotnAraratArmavirGegharkunikKotaykLoriShirakSyunikTavushVayots DzorYerevan