Lola Iturbe Arizcuren

Teliz mal Wikipedia.
Aller à la navigation Aller à la recherche
Lola Iturbe Arizcuren
1902-1990
Espanaf arotievik isu ayikyevik

Dolores ( Lola ) Iturbe Arizcuren ( kobl- ba 01/08/1902 koe Barcelona koe Espana, aw- ba 05/01/1990 koe Gijón ) tiyir arotievagrosibik is ayikyevaf sayudasik ke Mujeres Libres espanaf lizor.

Micaela kaelafa gadikya ke Lola Iturbe tiyir euskadiafa, vey Monreal widavama koe Navarra winka. Va Barcelona koirubayar lize Lola kobliyir.

Blirizva[betara | va krent betá]

Rumeugal[betara | va krent betá]

Micaela Iturbe nope erbarge moi radekara va pintikya pu tawadayikafa yasa ke Cerdá nafer lize Lola remi kalaf rumeugal do baraf nazbeikeem ke brogadafa tolonga di bliyir. Viele tir perdafa gan gadikya ko Barcelona zo dimdikiyir. To banviele kosmayar da va ara gadikya dikiyir. Koe Barcelona dene mona ke guazafe glastikye irubar lize va gadikya ta kwafa kobara pomar. Me zo askipejer voxe va nuyuca pojana koe tawaday batcer.

Viele inafa unesa glastafa yasa va erbargepe toz levgayar, pune Micaela Iturbe buluyur numaze va yasafo vedgobexomo djukugediyir lize Lola pomason dere kobayar. Azon wetce asadas ravesik seguyur. Larde mali rumeugal dun kobayar, pune va bema abicedje nobayar. Ton mivravesik vayayar, va bagala koe bemafo vistalexo dum teca nuyevaf bemugal di setikeyer, i va xo lize va yon amidik vey gedrafo xo ik seltafa ik gaderopafa anameda rorungrupeyer.

Arotievafa sayudara[betara | va krent betá]

Viele tir san-balemdafa, Lola koe vageiaxe zo uner lize va taneaf arotievaf sayudasik rungruper nume va Grosiba va Vage ( Sindicato del Vestido ) ke CNT galda yoter. Va nuyevaf lizor toz denfir.

Do aryon arotievaf sayudasik va lyumara mu gaderopaf stolenik paker. Titi 1920-e sanda va Germen rijay denfir lize Juan Manuel Molina ( okon Juanel ) ixam sayudar. Sin vanpid dositik ke blira is rietava. Va Granollers az Barcelona koirubad.

Bak santaneaksat ke 1924, Lola va bocafi bliraki ke Juan José Montero arotievik isu José Llacer tocker, i ke sayudasik lanzayan gu xonukera nope dilfura va sayakaxe. Bak 1926 ko Paris koe Franca va int godivblir liz va Juanel kaaneyapan gan espanaf ardial kevlapir. Aze ko Belga. Ba etimara va sokasane ( 1931 ) ko Espana rovodimlapir. Do Juanel vanpir sutelasik va Tierra y Libertad virda koe Barcelona, i va virda tisa vila ke Arotievafa Espanafa Galda ise va konaka arotievafa kabelcara paker, don tulon Buenaventura Durrutí is Francisco Ascaso, ise va exura ke 1933 azu 1934 dere paker.

Espanafa artowara[betara | va krent betá]

Bak balemeaksat ke 1936 va Mujeres Libres arotievayikyevaf rijay dozabdur, i va grustaks ruldatas vas loa 20000 bewikya, ise vanpir sutelasik va milyoltafa virda lize va jontik teliz yolton gu Kiralina sanegar. Mali pereaksat ke mila ilana va sutelasikeem ke Solidaridad Obrera virda dere paker.

Va konak seltaf abdumimaks tegison sayudar, i tulon va lyumara kev savera va tresenik num sinafa walburera. Moi molikera ke arotievik kev stalinevik bak alubeaksat ke 1937, ta tunuyara va arotievagrosibik ke POUM grustaks stoleyen gan espanaf stalinevaf doevik kobaver.

Radimi sokasane : divblira koe Franca az dimlapira ko Espana[betara | va krent betá]

Tici Toleafe Espanafe Sokasane is yatera is gelbera ke jontik sokasaneevik ko Franca, Lola Iturbe koe Nïmes widava ke bana patecta soker lize va birgotafa acagira va Nazi kerelera paker. Radimi tena ke tamavafa geja do Juanel koe Toulouse tigir. Kev torkeva ke Franco sayudar. Vielu sopera va Juanel bak 1946 koe Espana kali 1952, wetce dodelik dene vageiasa raba kobar.

Lola Iturbe dun tir ke CNT birgotafa grosiba ise va tegira ke Mujeres Libres divbliyin rijay do aryona arotievayikyevik dum Suceso Portales is Sara Guillen seramon paker.

Radimi awalkera ke Franco bak 1975, Iturbe ko Espana tere rodimlapir. Do Juanel va La Verneda koe Barcelona parmon koirubar. Kaiki awalkera ke Juan Manuel Molina bak 1984, koe Asturias winka fereon soker.

Lola Iturbe ba 05/01/1990 koe Gijón valente Espana awalker.

Xantaza[betara | va krent betá]

Bat teliz tir pakaf is zaleyen kalkotavaks va teliz ke Anarcopedia internetxo

Dere rupec[betara | va krent betá]

Mujeres Libres

Suteks is suterot[betara | va krent betá]

  • (es) Mujeres heroicas, 1937.
  • (es) Nuestras luchadoras, Barcelona, 1937.
  • (es) La Mujer en la lucha social y la guerra civil en España, México, Editores Mexicanos Unidos, 1974, OCLC 4743450

Vuestexeem[betara | va krent betá]

  • (en) Martha Ackelsberg, Free Women of Spain: Anarchism and the Struggle for the Emancipation of Women, 2005, AK Press. ISBN 978-1-902593-96-8.
  • (es) Antonia Fontanillas is Sonya Torres, Lola Iturbe. Vida e ideal de una luchadora anarquista, Virus Editorial, Colección Acracia, Barcelona, 2006, ISBN 978-84-96044-69-2, OCLC 470673900.
  • (fr) Blirizva ke Lola Iturbe dene internet
  • (es) Blirizva ke Lola Iturbe dene internet

Lola Iturbe Arizcuren

Lola Iturbe Arizcuren

 Koblira  01/08/1902,
 Barcelona, Espana
 Awalkera  05/01/1990,
 Gijón, Espana
 Vedeyot  Espana
 Tegira  Arotievaf ayikyevik
  Bifa 
P Parthenon 2.svg  Tuveli icde Izvopa  P Parthenon 2.svg
Rb-star.svg  Tuveli icde Arotieva  Rb-star.svg
Lola Iturbe Arizcuren is Juan Manuel Molina Mateo dositikye, afigasuteks kaiki 1939
Mujeres Libres 9.gif
Mujeres Libres ~ espanafa arotievikya

Sara Berenguer LaosaConsuelo Berges RábagoMaría Bruguera PérezPepita Carpena-AmatMercedes Comaposada GuillénAnna DelsoMika Feldman de EtchebéhèreAntònia Fontanillas BorràsSoledad Kasilda Hernáez VargasLola Iturbe ArizcurenPaquita Jolis PuigConcha Liaño GilIsabel Mesa DelgadoFederica Montseny MañéAmparo Poch y GascónMaria Suceso Portales CasamarLlibertat Ródenas RodriguezLucía Sánchez Saornil