Shoghakat (Echmiatsin)

Teliz mal Wikipedia.

Shoghakat ujaarmenavon Շողակաթ եկեղեցի ), tir alkaf debak tigis koe Armavir winka poke Yerevan vatalte Xayastana.

Tiyir armenafa uja ke VII-eafa decemda koe Vagharshapat ( Echmiatsin ) alkaf avak ke Armena. Poke Wevala ke Echmiatsin ( 301 ) tigir. Shoghakat noeltafa uja gan Aghamal Sorotetsi sersik bak 1694 zo kolnayar.

Wevala is ujeem ke Echmiatsin is Zvartnots rawopaf debak, don Shaghakat uja, wetce arayaf debak ke tamavafa gadakiewega ke UNESCO bak 2000 belcon zo bendeyed.

Izva[betara | va krent betá]

Shoghakat uja moe debak tigir lize lospa dem alkikya dositasa va Gayane is Hripsime bal deweldura ke Armena va kristeva bak 301 RGJ zo tuawalkexayad. Agathangelos izvopik ke V-eafa decemda suteyer da jotafe is listafe Hripsime banugale tise kristevaf alkik koe Roma gu Diocletianus romafe gindikye poon fu zo yerumayar. Do Gayane ujokilikya il duxas gindik ko Armena otceyer. Trdat zolkevaf gazik va twa kazawayar kane Diocletianus va sinafa listuca pimtayar. Trdat va xo kosmayar lize toloya alkikya va int preyutayad aze va Hripsime az Gayane korenayar. Vewayason va inyona abdugara, Hripsime zo nakeyer aze zo tuawalkexayar lize Surp Hripsime uja porfeon di zo kolnayar isen Gayane dere nakeyene az tuawalkexayane moe debak ke darefa Surp Gayane uja. Bar-san-anyustoya ara alkikya moe xo ke Shoghakat uja dere zo tuawalkexayad. Kadimion Trdat gazik va kristeva dewelduyur ise ina vanpiyir winugafa alka ke gindaxo.

Vegeduropa[betara | va krent betá]

Direfe dre[betara | va krent betá]

Direfa uja ke VI-eafa ok VII-eafa decemda leve debak ke noeltafa Shoghakat uja tigiyir. Trakut da noeltafe dre vas cofuot ke bata taneafa uja rotir dayker voxen lana givaklita bazed da Shoghakat moe cofuot ke ara uja ke XIII-eafa decemda rotir zo kolnayar. Vagetalte arteon xe, joxara va xim ke lana tanolkobafa uja vegeduyuna moe ekavudaf azekos awisiyid, i moe uja nuve tis kimbasa amuda ke IV-eafa decemda. Vreptama keve geefa rebava co zanudayasa va trist tigir. Swalotekwa ke rebava va kira ordafa gu armenafa uja ke IV-eafa ok V-eafa decemda nedid. Toloyi tuveli van amuda dere tigiyid, i bati vageeon is bani vagetalteon.

Uja[betara | va krent betá]

Shoghakat uja tir tantamaxofa wevala dem varoneon tanoya mialivamufa vrepta is toloya vwepafa vokefa amuda. Konaki rebavaki ke vrepta co rotid evlon gu V-eafa decemda. Balemoyi skunderi wale istef lujoraf remaf is vamoefa anyustkrilafa akinta isu feyaf sfelt zeviandad. Dum koe lana aryona mialukugalafa armenafa uja, akinta is sfelt isteon vols vatalteon me tigid. Dalafi tuveli ke uja mal krilafa lupaxa pokeyafa gu taltefa rebava ke dre koon star. Kosuteksap keve divefa uwedjela moe tuvel tigir ise kum kramtaukaf drelk zo bloskayar. Dilafi lopinafi tuveli reme geefa rebava tigir. Mata zikexa va ujidja ziked, vaxe lan darkasaberopaf fum iste divak ke akinta is konak xatckar atcom kevkoe ticefa rebava is tanoy gamdakoraf fum kake ronefa rebava dem raltadakoraca is toloy gamdakoraf dilkam afiamas va vrepta ke uja.

Fenkunafa galzafa lupaxa vegeduyuna keni uja arte vatalteon dre tigir. Tanoy galzaf remakap iste vabduef lentor kal lupaxa star lize dalafi tuveli ke uja dye kabdueon tigir. Vokodaf trekdilk voke vokoda keve taltefa rebava voxisu lentefa isu geefa tigid. Xuta aname dilk is dalafi vokodafi tuveli gu darkasaberopaf fum is raltadaca is xatckar atcom zo zikeyed. Vimava dem tevoy giskis briz zanudasa va biot ke uja iste lupaxa tigir. Toakoraf fum va kota tevoya ticdivefa alava ke vimava ziked.


Divef wiks va Shoghakat
Wiks va uja, 2008
Akinta is sfelt is biot ke uja
Besanaf trist
Koef wiks va Shoghakat
Koak ke uja
Wiks va sfelt
Wiks va biotafa vimava

Dere rupec[betara | va krent betá]

Wevala is ujeem ke Echmiatsin is Zvartnots rawopaf debak :

Alkaxo ke Xayastana

Shoghakat uja
Wiks va Shoghakat uja
DEBALA
Patecta Xayastana       
Winka Armavir winka
Tigixo Echmiatsin
Maneka  40° 16′ 44″ L-, 44° 30′ 36″ R-
KIRA
Alka Armenafa kristeva
Ord Armenafa uja
Vegedura VII-eafa decemda
  Tuveli icde Yamba 
Shoghakat uja
Tamavafa gadakiewega ke UNESCO
Wiks va Shoghakat uja
DEBALA
Tawavaf seg Europa
Patecta Xayastana       
Winka Armavir winka
Maneka  40° 16′ 44″ L-, 44° 30′ 36″ R-
KIRA
Ord Arayaf
Ludeem (ii) (iii)
Debakaf otuk 1011
Bendesa ilana 2000 ( 24-eaf frugot )
Welmot ? km²
Winugafa pimtara ke UNESCO [1]

Wevala is ujeem ke Echmiatsin is Zvartnots rawopaf debak. Wevala is ujeem ke Echmiatsin is Zvartnots rawopaf debak va towara is nagewera ke armenafa garduja dem istefa vimava kan gamdakoraf zovdom blion yunked, i ke martig turestapayas va vegeduropafa is yambafa vonera va bata gola.

(en) Cathedral and Churches of Echmiatsin and the Archaeological Site of Zvartnots. The cathedral and churches of Echmiatsin and the archaeological remains at Zvartnots graphically illustrate the evolution and development of the Armenian central-domed cross-hall type of church, which exerted a profound influence on architectural and artistic development in the region. ~ UNESCO website, licence CC-BY-SA IGO 3.0

Tamavafa gadakiewega ke UNESCO koe Xayastana
Arayaf debak

Wevala is ujeem ( Surp Hripsime is Surp Gayane is Shoghakat ) ke Echmiatsin is Zvartnots rawopaf debakHaghpat tucpastaxe isu SanahinGeghard tucpastaxe isu Azat ticekrant

Echmiatsin is tigixo ke uja

Vuestexa[betara | va krent betá]

  • (en) Kiesling, Brady (2005), Rediscovering Armenia: Guide, Yerevan, Armenia: Matit Graphic Design Studio