Jean de La Fontaine

Teliz mal Wikipedia.
Sauter à la navigation Sauter à la recherche
Jean de La Fontaine
1621-1695
Francavaf suterotik

Kudeem, reduyun mal tel ke Aisopos, va san-toloya neva piskuyuna wali 1668 is 1694 tantar. Jean de la Fontaine koblir, bak gazugal ke Louis XIII, ba 08/07/1621, koe Château-Thierry, dene glastafa yasa. Bata gorar da in di govanpir partik aze stakser, tison 19-daf, ko reila koe Paris. Voxen in me tir fitckiraf ta alkopa loon dam tegira ok arienteem. Antafa suterotura va in vanimpar. Koe Paris in va yone suterotxe isu dere ulixe isu vefaxe nobar. Gadikye gorar da va in gokurer. Bak 11-aksat 1647, Jean de la Fontaine do Marie Héricart zo kurer. Inya tir 15-daf. Ba tanda abdion, Jean de la Fontaine, gan gadikye xuvanon, va flieba ke "Gadesik va Laveem is Aaleem" koe vowidava al luster. Voxe va blira koe Paris abdualbar. Tir erbadebalakirajaf. Int is kurenik tid bozakirapaf.

Bak 1658, viele rawayane gadikye awalker, La Fontaine sol kurenik solparsawer. Pu Fouquet Gadepesik va Erbaxe ke Louis XIV jotaf gazik zo atoer aze va inaf gelukaf ezlusik vanpir. Vexe Fouquet zo basflir, bak 1661, numen La Fontaine drasuyus va intaf tengasik godimfir va Laveem is Aaleem ke Château-Thierry. Bak 1664, Bouillon dacikya, i ziavik ke Mazarin, ta irubara koe widava pir, aze pu La Fontaine erur enide zo relander. In va Yon reiz puvepes va dacikya medolenon suter. Ta remblira govanpir « zanise gentilhomme » ke Orléans dacikya. Koe Luxembourg berma, ke dana va mateleem karolar, tori moraca mo azega ke grenyafa guazikya zanolur. Do Molière is Racine is Boileau al joawer ise ta seotara va gazafi turwi giopon aneyar. Colbert, i warzaf Gadepesik va Erbaxe, obrar enide in ile Aboyikeem di zavzagir.

Bak 1668 La Fontaine va taneaf Kudak piskur. Soe meseotason va koni turwi. Bak 1671, va flieba adim lajudimdoler. Bak kadimifa tanda Orléans dacikya awalker. Jean de la Fontaine tir erbiskaf, riwe copaf. Tir De la Sablière Weltikya, arayakirikya, malfisa va omeltikafa yasapa, dana va in emuder ise vistaler ise kogestur. Sintafa naca 20-don jijatar. La Fontaine soe dun argeweyer. Yon Warzaf Reiz, piskuyun bak 1674, va Gazik volpuved acum zo poud. La Fontaine, ware erbiskaf, va gadafa mona ke Château-Thierry godoler.

Bak 1678, va toleaf Kudak piskur ise pu Montespan Weltikya vaon tarizar, ta vanimpara va inafa nendara. Inafa norluca adim zo kagruper : Yona Kuda pridud, in do Aisopos is Phedre zo dolunyer. Bak 1683, Colbert awalker. Ta Francavaf Cultim La Fontaine va int atoer. Voxen Gazik va arevlara va libura askir abdida tere naler. Ba awalkera ke De la Sablière Weltikya, bak 1693, in toz akoler ise abdiplekur da va volalkaca ok volceakaca mea piskutur. Remi ironokafa tolda bosgir ise va uja jeber lize va kustovudera blikeson lavulkur. Ba 13/04/1695 awalker.

Jean de La Fontaine

Jean de La Fontaine

 Blira 1621-1695
 Ava Francava
 Suterind Kuda, Ezlopa
  Suterot 
  • L'Eunuque (1654)
  • Epître à l'Abbesse de Mouzon - Adonis (1658)
  • Le Songe de Vaux (1659)
  • Elégie aux Nymphes de Vaux - Ode au Roi (1662)
  • Relation d'un Voyage de Paris en Limousin (1663)
  • Publication des Contes et Nouvelles en vers]] (1665)
  • Contes et Nouvelles en vers (deuxième partie) (1666)
  • Fables choisies mises en vers (1668)
  • Contes et Nouvelles en vers (troisième partie) (1671)
  • Daphné - Les Nouveaux contes (1674)
  • Publication de 11 fables et 5 nouveaux contes (1685)
  • Livre XII des Fables (1693) Kudeem ke La Fontaine
Bookshelf icon (red and blue).svg  Tuveli icde Suteroteem  Bookshelf icon (red and blue).svg

Kalkotavayan suterot[betara | va krent betá]

  • Kudeem ke La FontaineLes Fables de La Fontaine ), kalkot- 2005 gan Élisabeth Rovall, banliz