Beendos me zo gonaytar (suterot)

**Beendos me zo gonaytar**
	XANTO
	XANTO
Vergumvelt	To Kill a Mockingbird
Sutesik	Harper Lee
Ava	Englava
Suterotinda	Berpot
Evla	1960
betara	teza

Beendos me zo gonaytar

Rupa bak 1930^-e sanda koe Maycomb koe Alabama dilizer, i koe tan galdolk vagee Tanarasokeem. Banugale bata gola tiyir zaavevapafa isen jontiktan adalaf gu abdimalyeks icde diveik is ebeltik is jadion betar amidaf korik. Bak Deonapa afroamerikik nope solblira is solkatcasa ura is dile merowina divlapura dun mejed, beka ebeltikafa levetiruca winugon tiyir tuneyena. Gu klaba zo ralentad : batinde eva va miltuca ke ayikeem kotlize etimana, vox baninde yona geltraca ke solkatcara. Gu « niger » pobaxaks zo askiped ise gu divseltanik zo torigid. Bata Amerika nijur merogildana iton gu rumeik ik volgunik.

Vildeks

Bak 1930^-e sanda Maycomb widavama koe pekodaf idul ke Alabama modamar. Igeltaf is aulaf batakik lotis va intafa blirinda is oklaf gu abdigadik poke aryon batakik blid, i poke tawadayaf wawik dile memwon laptes. Isen tite seltbil, wawafa is dulkafa ebeltikafa sanelia tir. Banlize Scout tevdafa rumeikya tisa pwadesik va berpot, is Jem loklaafe berikye atrid. Tid gadikyiskaf numen Atticus Finch gadikye tise aulaf aluteik va sin ant gaar, pomanon gan Calpurnia ebeltafa kwikya torigina gu yasik. Atticus va aulafa is wiyafa rictela tove nazbeikeem ksuber. Jem is Scout gu toloy becik vols meblodaf sulemoc goviklun kare seltaf bekseem zo askiped. Acum Scout is Jem va ewafa is liziwesa nuyuca voldum cug palik pojad : kan Weltik kare orpa va gadikye efe yoltad, voxe dere kan yoltega, ise mekivason koerud, ise va erura va pebura meviele klabud.

Lanviele Scout is Jem va Dill rabetaf is volordaf rumeikam tiskis va idulugal koe Maycomb rungruped. Afizcek dem vefara dilized. Sinafa abdualbana vefara tir dizvera va mona ke Radley yasa lize Boo Radley blir, i va yikye co kobudeyene nope sardafa akoydaca gan gadikye num banvielu mea co wiyise va afizafta. Boo krulder, inaf yolt tir Arthur, ise tire va mona meviele bulur. Gesta ke baroy rumeik va in gu gulestudjik artazukar, i gu rostaza vebesa va klokara is vefara bak dace bemugal. To taneaf bemaf tandacek ke Scout tir : in ixam grubelir ise grusuter ise dum Jem tir jebes ravesik. Lanitison kal bema, Scout is Jem va Radley yasaxo gokabduolanid ise va mukama palseyena ko aalsuxoma jontikviele trasid. Boreon narud da bat beyark tire tid yalam mu int. Kas va birgaf nik co dikid ? Rotir lantan malplekuyus va Jem gu lana debalaja lanviele in va pilkot ke Radley al kolaniyir numaze gan Nathan pilkotik is berikye ke Boo zo zeltayar ? Jem va rija koo sulgafem volins al sollipayar nume otceson jovleyer, isen mila rija trumon dimasadayana is soayana direvielon di zo katrasiyir. Jem narur da to Boo va batyon siabeksam gifirvir ise ba ban aptaf sielcek puon al zanapar.

Bema is vefara, batcoba va blira ke Scout kereler. Tanda tiskid, Dill kotidulugalon dimlapir, Jem atrir ise tulukrawer, isen milgikafa tamava nutir divulackafa gu rumeikya vol djuvektasa vas teza djustegeyemba gan jontik milgik : va ekoltuca is utcoruca is diskira va gratcot is gem. Bexe Atticus va mancoba vol djumer. Ba kristnazbalavielafa kapa, va zeltam pu kot nazbeik firvir ise va toloya djiara anton granser : va kontan meviele goneckindatad ise va konbati zverimi yoltkirafi gu beendos me balieted. Sini dankatason batlize anton tid ise va metan rotud. Aytara va beendos tir troba.

Scout va riwetcuca ke gadye co djuposisker : voxen Atticus va disukexaca me askir, tir « guazaf » ( balem-sandaf ) ise kotrielon opelon gikobar ise va fela kotsielon belir. Kali bat viel ke toleaksat viele maya ko nuda mopler : bresitolakoles vakol wal mona lopcer. Atticus gan Heck ardialokilik zo rozar aze va inafo ervo narir aze va sulem tanviltason aytar. Scout va coba grupena gan kottan kosmar : gadye tir an viltasik ke gola. Osk va int me milmur, voxosk va viltaxo meviele diskir.

Bak 1935 gomilara koe bata widavama zo raplekur : lan ebeltik yoltkiraf gu Tom Robinson zo buntur kire va batakafa yikya co al boer, i va Mayela Ewell tisa nazbeik ke Bob Ewell ruyatfamaf is tizaf korik, i ke rastusik blidas va paz is dubieks, tis dem grelt dem zionaf is gaajayan rumeik, irubas koe wico poke doritaxo. Widava zo vurjer viele Atticus konaler da va Tom Robinson di runrojur. Mbi culimer da « va ebeltajik co albar ». Beka Scout va sugdala me gildar, pune gan bat blayak zo bakar, nume va pobaxasik koe bema rwamar vieli gadikye jupar da in abdiplekur da mea rwamatar. Berikya ke Atticus, i Alexandra ziavya, do yasa ba jiz denon irubar nume va Scout gu tezafa sardikya giopon artazukar. Arinton gu toza ke jiz, ayiktum djuvrayas va Tom ko flint artlanir ; Atticus va in ker ise pulvir. Scout mejiligas va keunira kabdu dratces tum gepoyter, pu ficik agralon pulvir ise va gadye pomar enide battan memaltegison di bulud.

Azon ken viel sokir. Maycomb al kadar kazaxo, varafa batakikafa sanelia al artlanir, tcoketeson va xonukalanzara va Tom Robinson kiren tena ke jiz tir enlanafa, sedme batakik ieson jaxadadas lidam ebeltik trobindas. Viele jiz tozuwer, rumeik va erkeyxe anjed aze mo soza vanmiae ebeltikaf saneg rundanyad. Voxen Atticus va volgunuca ke Tom fu wazder : va Bob Ewell taneon biber nume va inafe diave isu krize kabdunedir ; azon va vrutaks ke Mayela griksear : tire Tom dis va ablenafa ma nope walta, va ina me rodefelileyer nume me roboeyer. Nekev batcoba Tom zo lanzar, me gu traliriba vols gronaf flint. Jem laneyer da Tom co di zo vanbuluyur nume uduton zo awuzar. Atticus pebur da debala me tir bateke orikafa : taneatomon batakikaf malyeruk ugaliyir abdida va ebeltik lanzayar ise va ana gakera me rewayar. Luxeon gadikye ke Mayela bak jiz zo plukeyer nume va blira ke rotaskipedayas korik volunt dratcer : i ke malyesik is Atticus. Battel va bata dratcera nubumason tsenter ise kevganer da nazbeikeem dum gelkeugal mekivason diwan blid.

Soe ban krizik va nazbeikeem ke Atticus di relingar : bal siel ke Halloween bak orika suzdar aze lanubemar. Bak lyumara ma ke Jem zo empar isen Scout galovon divvawar : kontan va sin al pomar aze va bindes Jem kal mona ke Atticus al burer. Bob Ewell su xonuker : kev zae ardeotayar nume va int volins nubemayar. Batcoba tir pebura ke Heck ardialokilik. Tel tixolaf is lemes pomasikany tir to Boo Radley. Scout va intaf mayesisik tanatomon gu blira kakever nume kosmar da Boo dum Tom Robinson tir beendos, i volgunaf tisik aytayan gan kon ayik. Batugale Scout va rumeugal go bulur ise va birtafa is dile tapedafa tamava ke milgikeem gokofir.