Xonuka tir jinafa eba (suterot)

Teliz mal Wikipedia.
Aller à la navigation Aller à la recherche
Xonuka tir jinafa eba

Xonuka tir jinafa eba gan Robert Merle zo suteyer aze bak 1952 zo sanegayar. To berpotafa mivizva ke Rudolf Höß tiyis taneaf dirgasik va Auschwitz awalkopexo num plekuyus va rundapa ta koskura va saneaytara. Koredik ke neva, i loote izvik, vaxe tanoy kan ikayolt zo dasugdad, i vaxe Heinrich Himmler. Rudolf Höß gan Rudolf Lang koredik zo kaatoer. Tir pwadesik.

Vildeks

Izva ke Rudolf Lang koe Bayerna tozuwer. Titi berpot, in tir sanbardaf. Tir vay katalikevafa yasa isen gadikye tir kazik vey fayikafa yasa. Tir boksik stolenaf ke alkafa noglaza. Kalir da bak jotugal derkeyer nume kodiner da nazbeye di vanpir gertik enide inafa derka di zo vugdar. Lanviele Rudolf va nimat ke palik volins arber. Pu gertik movur voxen gadikye va regala zo givar nume va nazbeye tizon vorcer. Bantel al trobar kire va rola bak sielafa yasafa movura me welidayar. Banvielu ten folixeyer, trakuson da gan gertik zo levcoeyer.

Gadikye ke Rudolf ba 15/05/1914 awalker azen geja tozuwer. Yikye wetce korlaf ksidasik vilter aze va milk van redjel tolon laradimlapir. Nope jotafa klaa zo dimelagdar. Soe vanpir pomasik dene sayakafe ropexe lize va Günther redakik gorestapon bakayan rungruper ise tunar. Turestan gan in, va atayera va Germana gu tela va kristeva ikaaykar. Golde in tere rovilter. Inafa vertega ko Turka az Iraka zo stakser. Zo wizbur ise nope buduca va levfayik zo abduaskir. Koe Turka va taneafa stakera tcoker : dofa vrayara va konak decemoy wideytik, is vanmecobana wida don ayikya is rumeik. Surtera va Germana tir skopo. Dim wideytafa blira meseramon. Inafa yasa mea rozolkomer isen vo gan artowasa skaltera zo botcer edje doevik is vedeyevik va sint moliked. Ton dodelik labliwar neke den Nuyalafa Taksa fure vilter, i den anamsayakaf blay lyumas va Bolcevik sayudasik is doevik, is yazgas va fikafa is durulafa nuva.

Viele va Nuyalafa Taksa bulur, pune ksubeson va konaka eba remblir voxen deona va Germana dendapar numen Rudolf ton ebeltafa copuca blir. Fu kser viele pradjaf palik va in gu stekefa ageltafa yasa koplekur : vedeyaseltevafo pako. Vanpir tan inaf strusik ise va tan tsunesik adjuber, i va tavesik torigin gu relmesik gan Nazi pakoik. Nope bata adjubera, gu flintafa sanda zo lanzar neke arti alubda nope linularanya zo tunuyar.

Nazi pako va in wetce barnaf unenik dene pilkot ke Von Jeseritz tremkik rundar, i ke vonkik tegison yotes va pako. Arti baroy aksat, vonkik va jovleyen vesk dimempatan puon odiar. In arti tanoya tanda jupekar. Dirganon gan vonkik va Elsie Brücker yerumar. Tolonga va balemoy oc di dikir. Va lolozolonafa blodaca dene pako darpeon vansar aze den SS- ervolita zo dostegar vieli gan an Himmler okilik va gadera va warzafo pemaxo mbi odiar, i va pemaxo lize awalkopera va Yud sane rabon di zo sopur : Auschwitz. Inafa yordara   va 500 000 « tanta » ( trogarn dasugdas va rezgalenik deokatan ) tandeon fu awalkoper. Numen ton keskotaf ristusik, Rudolf va vuida jupekar. Bak santoleaksat ke 1943 gu kodisukesik va rezgalexoeem zo koflir. Va Auschwitz bulur aze va Berlin do yasa koirubar. Va rezgalexo kotliz worar. Ta pomara va « aptafa sulera » va 400 000 magyaraf Yud saneik, koe Auschwitz bak ki ke idulugal ke 1944 jonvieler.

Teni balemeksat ke 1945 kevu rossiafa abdulapira yater. Koe barn remi anyustoy aksat va int vaskar abdida ba 14/03/1946 gan amerikik zo soper. Pu Polska zo zurter aze zo koerkeyar. Solve Himmler kseyer, pune Lang va batcoba gu relmera torigir ise va intaf blodaceem kotron luxeon welidar neke va beta sidjera vol muxar. Tici neva, koe fuxedja zo wir lize va xonuka ker, avlemodason is patason va boreem.

Dere rupel

Xonuka tir jinafa eba
Open book nae 02.svg
XANTO
Vergumvelt La Mort est mon métier
Sutesik Robert Merle
Ava Francava
Suterotinda Berpot
Evla 1952
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg