Winta dem jidol (suterot)

Teliz mal Wikipedia.
Aller à la navigation Aller à la recherche
Winta dem jidol

Winta dem jidol tir opasordaf berpot suteyen gan Pierre Boulle az sanegayan bak 1963.

Tir klecara va ayikeem is opa is geja voxise va watsa ke aptatca is towareva is ayaf selt dere ruer. Winta dem jidol tir tan losposaf berpot ke Pierre Boulle ise konakviele elpatopon zo zaleyer.

Vildeks

Rupa bak enekeugal tozuwer. Jotafa tolonga koe darktota puveguson koyar. Va lan ak dum tirac dile kabuyun ko bira gan birelik trasid, i va ak dem nega va divulafa stuva pwadena gan lane Ulysse.

Ulysse tir felusik. Va vestasa brinuga gadena gan Antelle tavesik wetceon paker. Sinaf mukot : vestara va bolk ke Bételgeuse bitejap. To baroy vestasik va winta milafa gu Tawava is anamenisa va bat awaltap akoyenon kosmad. Va ina gu Soror ( berikya latinavon ) yoltad. Ta pokafa wira va darklikayam rundanyad. Va Hector zegol dostad, i va zegol pakes va koyara ta bagalara.

Sin va ritagira ko luvedaxo kene uzda dem aftafa lava gorad. Va likay bulud voxen zegol otcer. Azon va conyuta ke ayikafa bora akoyenon kosmad. Sinafa rilituca zo divmodar voxen abdida va megrupene fu laxuworad, pune gan kolavara koe ringafa lava ke uzda zo zoeped. Laizon lebackafa yikya awir. Tir milackafa gu tawavik, vaxe tanoya pinta : kan ewaf avot somepulvir ise kan bule ik ie anton muxawer. Kotote luntud isen yikya gu Nova zo yoltackar. Va int belcon kolavad. Batvulon Hector jidol dimon awir. Tawavik zo woltendad viele va yikya moebidusa va sulem az goviton aytasa wid.

Direvielon Nova gin lanir, dositana gu konak bewik ke doda. Sin tid ayaf, lebon blid voxe somepulvid. Kan ie dere gimuxawed. Viele va vage ke baroy vestasik wid, pune divulon ve perled aze va sine sollipad. Re lebaf tawavik zo ganed enide va lospama fu radimlanid liz sin blid. Ko taneakafo xo artlanid lize bliragropeem nutir figapaf. Tawavik soe zo emudenyed. Voxen direvielon bifaja sokid : Nova is dositikeem laizon ve radeyed nume otced. Megildason baroy tawasik doon malvulted. Ve kosmad da tid wivga ke tcabanera grustana gan jidolap, i gan yiwol is parbol is zegol. Tan tawavik zo aytar, azen Antelle tavesik griawir azen tere Ulysse zo gralomer. Tuvirnambon sonker da va tamava felina gan jidolap molapiyid isen bantan va avot al voned ise dum ayik moe Tawava solinulad. Volson ayik batlize nutid govitol gotcabanen is malrosaven ta opafa bagalara.

Ulysse do Nova zo koribar. Kaliapon sus yiwol rabated da bat ayik wetce govitol me linular nume va okilik walzed, i va zegolya yoltkirafa gu Zira. Ina tir gruf opik ise woltendanon rabater da bate ayikye grupulvir ise cwe grupover. Pu parbolye yoltkirafe gu Zaius munester numen Ulysse va weslaratum dizo levgar. Zolteks : bat govitol nemon tir vikluyun bonol. Zira va voluca laner, da battan sotir amidaf. Wori Ulysse va ayikya gonowalikrar, i va Nova gaayana dositikya.

Ilfolira ke Zira fure kadad lanaca viele Ulysse kan seroy pebur lizu al artlapir ise kane. Ina va avot ke Ulysse toz raver solve ine va jidolaf avot. Voxen tixoluca fiste gotir : toktan gruper inde kosmara va grupoves govitol gan jidoleem co zo kevnaler ? Acum Zira pirdar da Ulysse tixolon di tilur. Isazon va aguntanik pu ine atoer : i va zegolye yoltkirafe gu Cornelius dere tise vartaf opik.

Ulysse va bata brutafa merunkuca impavantar nume va grupera icde anamef selt laumasir. Lanviele ta worara va sulemopafo nendoyexo zo vanstar lize va Antelle nik koribayan az tuoviskayan kranavon katrasir.

Zaius va opafa aba paker lize va divulafa toda ke Ulysse konedir. Acum ayik vey Tawava va intafa izva kareizur, kan jidolaf avot. Evodara tir belikafa numen jontiktan zo romplekud nume va tunuyara va Ulysse maldined. Bantan banvielu vanpir opaf dokobasik ke Cornelius. Azon va savsapaf rawopaf debak vestad isen joxara razdad da winta gan ayafa katca lekeon zo feliyir isen ayaf seltay nope astirbafa bifa ve atitsuyur numazen jidoleem sotowayar ise va runda ke ayikeem nariyir. Soye jidol va ayik anton di milaskiyir.

Nope walikrara va Ulysse, Nova nazber. Va pintikye yoltatane gu Sirius bliar. In lavion tir gruf nume atrison di grupulvir. Batdume wupeper ise arpumar da gan jidolap zo aytatar, i gan jidolap crakes va atitsura ke opaf lanaceem. Zira is Cornelius va Ulysse djukupomad enide ine mo Tawava di dimlapir. Ulysse do Nova is Sirius tere mallapir. Koyara kiewon dilizer, velik atrir ise toz pulvir. Tawava vannir, darktota va alpoz kolapir aze mosidar. Ulysse is exoma va int divtotad aze pu korik vanlanis djupropebud viele sonked da bantan kevlanis tir... yiwol.

Bata nega caeyena koe bat biratirac kosmayan gan jotafa tolonga en tir to divulafa rupa. Bat toloy yik, i toloye zegolye, va koyara soe wanud, modovason.

Dere rupel

Winta dem jidol
Open book nae 02.svg
XANTO
Vergumvelt La Planète des singes
Sutesik Pierre Boulle
Ava Francava
Suterotinda Berpot
Evla 1963
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Moek ke xantof piskuks, 1963