Tula (Tolteca)

Tula, kelu ke Tolteca sane

Zabduyuna az vilayana gan lorik

Tula kelu ke Tolteca gindaxo lente Mexico jumtak koe ref Hidalgo galdolk tigir. Minaf ref grupes sok nover da roruyet da Tula tir debak ke Tollan vundafa widava ( Xo dem edgarda kan Azteca ava ), i xo torigino gu diolaca gan Azteca saneik, lize berma tiyid kum aka. Nuve, Motecuhzoma Xocoyotzin Azteca gindik folkiyir volambik ke Tolteca gazik.

Rawopafa joxara razdad da Tula moni 900^-e RGJ bak radimpulukugal zo zabduyur ise va vegeduropafa gundaca dum Teotihuacán atoeyer. Tula gan gelbesik to rotir zo vegeduyur, i gan gelbesik otceyes il Teotihuacán ba inafa teyvilara bak 750.

Gijafa leon dam Teotihuacán, Tula soe tir woeckesa widavapa stujeyesa va gindaxo ruldaso vas jontiko radimpulukugalafo Maya xo, tulon vas Chichén Itzá.

Tela lozolonafa cugexa ke Tula yoltkiron gu B relida zo gruper. Bata relidadopewa pu Quetzalcoatl ( Bruxakirafe Perake ) zo tarizayar. Inafe levedre tid yunkeyene gu fetinte kaatoese va djuprodilfus tukrunol isu yaxol ik kiiz vumbes va takra, i gu leca muxasa va gejanorlik ke Tolteca sane. Dye kabdue relida, omafa rebava dem moeon balumaks kaatoes va Quetzalcoatl ton Lorik va Suka tigir.

Sedme remtrakura ke Azteca saneik, Tula radimi vilara va Teotihuacán gan Quetzalcoatl zo zabduyur viele in do jontik gertik isu jiomik gonotceyer. Inafe gadikye, i Mixcoatl mialalorik ( Perake ke Rujod ) ape tiyir taneik kizes va Tolteca felira. Soe tire Tolteca saneik va dugeem ke lorik gu tel ke ayik belcon vangluyayad ise va yon vund ke Teotihuacán vanikatcuyud enide va intaf vexeem di mwedayad numen atayera va Quetzalcoatl to koe Tula di waltodayar. Quetzalcoatl tiyir zolonaf maneke Ce Acatl Topiltzin sersik ke Tula, i zabdusik va widava is belcon ironokaf okilik, gu Quetzalcoatl va int yoltayar.

Volmezayana az anteyayana

Bak 1156, Azteca saneik va Tula dilfuyud aze kalvilayad, arse kiren ina tiyir wupesa jowawidava lentuon rokallanina gan dilfura ik faspara ke yon alizmonaf grelt. Ta tumalyara va lana fastafa vilasa tegira, widava zo kalanteyayar isen cugexa zo kidayad. Azteca saneik dakteyed da tamef meld wal Tezcatlipoca ( Vikizasa Elza ) intaf adomtaf lorik is Quetzalcoatl al dilizeyer.

Sedme vunda, Quetzalcoatl tiyir kaelaf loraf korobutik. Inafa karuca va djolera va walikrara is abidara va soyutafi goni is blodaceem ke gertapik rupteyer. Voxen Tezcatlipoca tcedeyer da in ulipiyir maneke ve akoleyer aze va listaf Xochiquetzal mbi atoeyer, i va tilikya ke baerdaf tresenikeem, nume tison izkaf walikrayar. Nope bati tegi, Quetzalcoatl va int gu teyxonuka di zo lanzayar, numen batcoba va firdera va Tula di tumalyayar. Takra ke Quetzalcoatl mal teyka ticniyir aze va kelt artniyir lize di kadayar Wuluz gazdabitej. Azon gu redus lorik zo dasugdayar nume lanviele dimpitir, divrokatason va Tezcatlipoca is tenatason va felira ke Azteca sane va Istefa Amerika.

Kipi ke Tula mea zo kojoxar ; ant istefa cugexa kotron zo vestayad : Anteyayana Berma is B Relida is Rebava dem Perake is Viputixopo. Bata kolna bak vilara va debak gan Azteca tolgenisik zo kidapayad. Gijotafi ki kum ckoda ke B relida zo deswayar. Jontik tawarn men disukeyen aname istef seg moe welmapa tigid neke icde tiyis lum ke widava bazecked.

Yon rawaks is cugexa ke Tula
Atlantes gulik ke B relida
El Corral relida
Tano ke toloyo viputixo ke Tula
Rawaks ke C relida
Anteyayana Dopewapa
Krexa ke Tula kaatoesa va coatepantli ( perakeanbsp;). Krexa kaatoesa va jinka poron gu Gadafa Tawava a anambe ke dopewa yunkeyed.