Teyara va giopaceem

Teliz mal Wikipedia.
Teyara va giopaceem

Teyara va giopaceemThe Bonfire of the Vanities ) tir berpot ke Tom Wolfe sanegayan bak 1987. To inaf taneaf berpot kalion vanpiyir tamavafa kiewatca.

Vildeks

Sherman McCoy parloesik ke Wall Street velitaxo kobas dene Pierce & Pierce sistu koe gogolkiraf seltany ke New York kulon blir. Dem Judy kurenikya tisa vredaf yunkesik is tiguafa is rekodusa, is Campbell tevdafa nazbeikya, McCoy yasa koe kulupafa kraba keve Park ikpa idjon ice Manhattan irubar.

Sherman tir vey WASP prostewafa yasa ise koe losposafa kotla ke patecta al vayar. Tir kulaf is djuman nek radjaf. Kotcoba mu McCoy kiewaskiwer, i mu tan « Felisik va Tame » tis an parloes dolesik ke sistu. Voxen in tove Judy va mempesa Maria Ruskin birgoton skedegar, i va kurenik ke tilapik ke New York tufaweyes grustason va talara van Makkah.

Sherman va Maria dimlapiyisa mal koyara koe Italia ko severoxo aneyayar. Dimlapitison stason va Mercedes diremany, va divaxo ke vawuda roklar nume do fertik idjon ic Bronx volins tigir, i idjon ic wawafa revava valente New York lokon saneliakirafa gu ebeltik is Latino korik.

Maria is Sherman va keldacka me lajudimtrasid ise gan tubemuasa sanelia ke koolapina revava zo kovudayad nume toz radeyed. Spua kalfir viele va lavuga daykesa iste vraday moe stirk vansas va vawuda tere katrasiyina glad. Grifuneteson va nuda, Sherman va direm divlanir voxen batviele toloy jotaf ebeltik kadim sin gepoyted ; battol va pomara pu Sherman drager. Voxen bantan va skay abdipestaler nume va ludjik akoyeson vajiker : va lavuga kev taneaf kabur aze va toleaf epitason trovgar aze va direm krilon ic remburenik rundanyar. Maria ton stasik yatkon mallapir nume va tan jotik otceson klantar, i va Henry Lamb san-lerddaf.

Henry Lamb nope opelaf bakaks ke nubask koe kwitazaniga zo roper voxe kadimion toz reler, radimida va tcala is ki ke lujas otuk ke trvogayas direm pu gadikya al bazer. Kogrupara zo sopur nume va Sherman kalion artfir. In batvielu vanpir wivga ke felasik is gaderopik is winugik impavantas va bata arienta tuzeitatason va dilintafa tollibura ok abduaskira. Dere tir jala ke afrikamerikafa xuvasa lospa gadena gan Bacon skaltaf gertik djumalsaves va « Lamb arienta » mu dilint, lecason gu lyumara kev « malyera ke batakik », i kev malyerot vol djutrasis va waltasik va Lamb pimtan gu jotaf ebeltaf riwetcaf is zvakiskaf vayasik volmalyon alieyen gan bali.

Darpe nega, Sherman banvieli rules tan « Felisik va Tame » bravon gu zvak ke cug unaykik, va atitsura ke intafa tamava tcoker. Va une az kurenik az cug nik ilbeder ise va jontika plukera levgar, i va satcon konakbartivafa koflintara koe Bronx erkey az exaksara kabdue intafo bedablo, abdida grupar da « re gokadar sulem ise golyumar ». Batcer da moi walta va rictaga me al elogar ( kire va kosmara va intafa mesaguca kivayar ), ise va aluteik narar. Pirdanon gan bantan, va Maria lagikser enide ina di welidar da ba walta to stayar.

Tena ke berpot va Sherman dacken gu rawara gan jontik memalyaf jiz is arpumas va flint vas tolsanalubda nedir, voxen in gevason zo vandilir kire va int re djukurojur.

Drunara

Teyara va giopaceem va kanacafa is malyerotafa elodera levgana gan kulaf batakik pimtar, i va batakik renzan gu gunackik ke gomilara tove mezvakes jotaf ebeltik ke Bronx revava. Bene erbafi is rotifi vefaki, gaderopik is dodaf ik alkaf andik is bewik ke malyerotafa ristula is felasik va bata arienta lasumalsaved enide va mikrafa is seltafa spua tegulasa va selt ke New York ilkon di impavantad.

New York bak 1980-e sanda tir ugacka ke bat berpot. Gu memalyafa is zaavevafa is flijisa widava gan Tom Wolfe zo nedir lize ilkafa molera ke fliwaf is avonan oxik, kali akeoyera ke lanyon, va sint gamdad ise walglad.

Pwadese dre

Pwades reor ke Teyara va giopaceem va nega atoesa va untafa trakula ke konak koredik walgamdar.

Vaxe Sherman McCoy, bat nelkaf koredik tid Lawrence Kramer yudaf pomas malyesik ke Erkey ke Bronx, is britanaf felasik Peter Fallow ruyatakoles is nulesaf kobas ta dem akoydas warzot.

Teyara va giopaceem
XANTO
Vergumvelt The Bonfire of the Vanities
Sutesik Tom Wolfe
Ava Englava
Suterotinda Berpot
Evla 1987
betara teza
  Tuveli icde Suteroteem