Miguel de Cervantes

Teliz mal Wikipedia.
Miguel de Cervantes
1547-1616
Espanavaf suterotik

Miguel de Cervantes Saavedra koe Alcalá de Henares ( lentrone Madrid ) bak 1547 koblir. Nazbeik ke wawaf selaropik ise levgas va krabesa blira ke gadikye, va vertafa vayara me tiskir. Soe va Alcala kotla azu Salamanca nunobar.

Beliraskeus, tir mivraves. Moni 1568 va yon taneaf blok suter, icde awalkera ke Elisabeth de Valois, i ke toleaf kurenik ke Felipe II gazik ke Espana. Voxen vazafa yawara anton tid, ise Cervantes koe ervoeba taneon ektuwer. Bak 1569, koe Roma va yasapa joawesa va Papik kozanir. Va Italia exuler ise, belison va yon pulukaf is milugalaf italiaf suterusik, va suterotafa ravera tukotrar. Bak 1571 va Lepante totameld kev turkik paker, viele va taltenuba drasur, nume va nubiskik ke Lepante toriyolt di zilur. Arti balemda, dimlapison va Espana, Cervantes gan yon tcordik ke Barbaria ( Lentefa Afrika ) zo gulder aze ko Jazaira gralometenon zo star, keson da kev inafa tunuyara paxay di zo doder. Batinde alubdon zavzar flintaf.

Wali 1582 is 1585 va sutera nelkon ektudar. Ton mefolisa kaliuca, va yona ezla isu drunta dana riwe kota kotvielon al griawid bam warzer. Tuke La Galatea tawadayberpot tugrupenawer, beka kan bruxa meblison. Bak 1584 kurer. Lanugale koaykakik, gan rictaga luxe erbabutcara zo uculer nume konakviele zo koflintar.

Koe Sevilla az Madrid, fordon is olon jadion remblir, voxen batcoba va kulaf ugot pu intafa suterotafa norluca dafur. Bak 1605 taneafa pakava ke El Ingenioso Hidalgo Don Quijote de la Mancha awir ise va kiewatcapa seotar, voxe golde baroya tcordafa piskura kodoleyena koe Madrid arti toloya saftama moi awira ke xanto pu in munestenser.

Bak 1615 in va toleafa pakava ke Don Quijote sanegar, kaiki toloy ar suterot, Novelas ejemplares ( 1613 ) is El viaje del Parnaso ( 1614 ). Adim, arti balemda levi awalkera, va Los trabajos de Persiles y Sigismunda ironokaf berpot, va tacukaf is purdaf berpot ke okolervolia, tenur. Ba 23/04/1616 koe Madrid awalker.

Miguel de Cervantes Saavedra

Miguel de Cervantes Saavedra

 Koblira  1547,
 Alcalá de Henares, Espana
 Awalkera  23/04/1616,
 Madrid, Espana
 Vedeyot  Espana
 Ava  Espanava
 Suterind  Berpot
  Suterot 
  • La Galatea (1585)
  • El ingenioso hidalgo don Quijote de la Mancha (1605)
  • Novelas ejemplares (1613)
  • El viaje del Parnaso (1614)
  • La Numancia (1615)
  • Ocho comedias (1615)
  • Entremeses (1615)
  • Don Quijote [ toleafa pakava] (1615)
  • Los trabajos de Persiles y Sigismunda (1617)
  Tuveli icde Suteroteem