Michel Onfray tir francaf trakopik isu vayarundesik, kobliyis ba 01/01/1959 koe Argentan widavama. Laner da trakopa gojupar da ayik va blira lokiewon impavantar, batdume in pu kottan lasuturovansanar. Va lo 115 suteks drages va kevsaltafa belira va prostewafa trakopa al askir. Lan batyon suteks al tid kiewatcaf dace koe mefrancavafa patecta, ise gu 28 ava al zo malfrancavad.
Michel Onfray va int gu nuyevik is Proudhon evik tentur. Inyona kevnuyotevafa is nafalevafa kotirkara is likerapa va eniltfamuca is warzarapaleva ke trakunyusa taltokeva, va garfelafa malyopara ke ticeikeem is glastikeem kevon nekid.
In va gaderopaf ik seltaf uum dene olyak is sumewisiki belon vezur. Inafa kotirkara va jontika kevudara daskid.
«Tokcoba tir taltokevafa tira? To folira va yona voda dum gotuskuca is beruca is walzilira is vonuca is doda is zilira is fastuca... tid. Folira va batyona voda me staper, sina koe blira vieleon zo goksubed, kotviele zo goviwazed. Taltokeva va intaf folisikeem dikir, va ksubesikeem abdualbá. Taltokevafa tira tir volto taltokevafa klapara ( batcoba co tir opelarsafa ) vox to taltokevafa ugalara. Wazdera va taltokeva kle me tir klap mei yotera va kono pako mei taulesa kretura ke rietodafa pasura, voxe to taltokevafa blira ugalana, ok meugalana...»
—Michel Onfray ~Mener une vie de gauche, 01/01/2012
Michel Onfray bak 1959 kobliyir, vey gadikye tise midus dodelik is gadikya tcatesik. Remi balemda bak rumeugal kali klaa vas san-balemdafa, tir sokes vayasik dene katalikevafa bema: bata rekola tcalapar ise va inafa alkiskeva pakon pebur, azen koe toloy suteks vaon di divrozar. Ba tol-san-barda va trakopafa vayara koaskir miledje watasaon va blira, tir pisidas felusik. Bak 1986 dobtcilkar: «Lidopafa is gaderopafa askoara ke fimafa trakura ke Arthur Schopenhauer kali Oswald Spengler» dene kotla ke Caen. Azon vanpir trakopus vayasik dene katalikevafa olda koe Caen, kali 2002.
Milugale nekev galejera titi 1980-e sanda isu tici 1990-e, va taneaf suteks toz sanegar. «Jivot ke trakopik» inaf toleaf suteks bak 1989 zo sanegar. Bak 1993 «Balumara va int» trakopaf vayarundeks gu Médicis poradro zo gabler.
«Dum gelkeon nope Jean-Paul Sartre foliyit da marxeva tiyir merokaikfina zida ke sare larde ticeikeem mofelis va kanaceem dun blikedar da nuyoteva va mila merokaikfina zida tadler. Rolafa. Nuyoteva tir rietoda jontikote voyapasa ton kosik is awalkik meviele otulan: ksera is ruyatfamuca is mala is tizuca is kevmisaxa is gomilara manton tid nope ina. Bata alka fitulafa lion dam marxeva remi inaf ugal ruyer da tuwavafa tuvexara guyunder aze va kaluca is tutrigara va kottan di warzer larde dolebela sotumwar. Volson, kottan rorabater, tumwasa dolebela enwe tir to torka ke erba is gazara ke mafia grustaks. Abdizilina matela va wula vols kona Versailles berma kiewagina gan merowina nuba, ton lorikevaf viwazeks ke nuyotevik ke XVIII-eafa decemda radekar.»
—Michel Onfray ~«Arnaud Montebourg, le seul antilibéral», 22/09/2011
Kali toza ke 2000-e sanda, Michel Onfray va suteks rues va trakopa gentimon gu Hedone eva iku Epikuros belon sanegar. Va kiewesturopa is rena is blirayamba suler. Konakbat vayarundeks: Delfajafa ova (1995, La Raison gourmande: Philosophie du goût) az Eva ke renaso alto (2000, Théorie du corps amoureux) az Volkost icde trakopa (2001, Antimanuel de philosophie : Leçons socratiques et alternatives).
Bak 2002 artfira ke Front National lugavaronokevafo pako kal toleaf siluk ke taneagadesikafa libura koe Franca va in tcalapar. Va Anamtavesa Ristula griflir aze va Sanefa Kotla ke Caen redur lize kali 2018 gader ise vezur. Kan bata kotla nuyafa is fastafa, va vansara va grupera djutumantar enide francafe sane gu saneevajafa trakura di zo aranamar. Inafa trakopafa tavera vergumveltkirafa gu «Volizva ke trakopa» va tcederapa kakeved ise kan olyak dere zo amuzed. Michel Onfray vanpir kanacaf korobik nume va awira dene olyak ik sumewisiki jonkar. Va gaderopafa atatcera paker, godjon ruyeson va kevnuyotevafa kotirkara.
«Alkiskeva va xuyava me tualkar. Tir morafa trakura voldum alka tisa kotevafa ikatrakura tukotasa is djukupebusa va kotak kan opelaf nelkot, i kan lorik... Alkiskeva sogruper da ova tir pinafa isen grupera datafa, isen grupene cugeke lopinafe dam megrupene, numen ina va opa altogir, i va opa jontiktode tcipasa, nume va koerusa staa doster voldum folixesik soye grupes va kotcoba icde kotcoba larde kruldese gan inaf lorik zo kuraniyir ise zo reduyur.»
—«Onfray, i trakopik lente E-T- sazda» ~Koerudaks ke C- Labbé is O- Recassens koe Le Point fela, n° 2146, 31/10/2013, bu 126-e
Michel Onfray wan suter nume va jontik suteks belon sanegar. Bak 2005 va Bioga va Alkiskopa (Traité d'athéologie) sanegar lize va baroya tanlorikafa alka nuer. Nekev funeyara nekina gan bat suteks, tol-vuntoy tulok ke neva zo doleyed. Bak 2006 va Gijarotiuca ke kruldera (La Puissance d'exister) sanegar lize Onfray va minafa tamava icde tiki do Hedone eva koerur. Bak mila ilana va Volizva ke trakopa (Contre-histoire de la philosophie) nevatum toz sanegar. Bak 2012 va Nuyevafa vura, trakopafa blira ke Albert Camus (L'Ordre libertaire: La Vie philosophique d'Albert Camus) lize va blira is rieteem ke bantan mafelan brudir. Bak 2015 va warzaf nevatum kabudar: i va Kliotafa xakola va tamava (Brève encyclopédie du monde) dem toloy taneaf olkoy: Cosmos: une ontologie matérialiste (2015) az Décadence: Vie et mort du judéo-christianisme (2017).
Trakopaf berpot ke Michel Onfray tid kiewatcapaf. Kan intyona neva, in weber enide trakopa tir rovansana tove kottan is pestakirafa.
Bak 2010, Michel Onfray va vayarundeks vergumveltkiraf gu Nom ke diersik: Freudafa kertandura (Le Crépuscule d’une idole : L’Affabulation freudienne).
sanegar. Va feliik ke swavadrunaropa dum drowigusik is neyik ke rictulokafa vertuma pimtar. Sanegara va bat suteks va funeyap tuyer. Nekev jontikote malyopara, konak decitoy tulok zo doleyed.
.jpg)
.svg){kind=icon}
