Marina Tsvetayeva

Marina Tsvetayeva

1892-1941

Rossiavaf ezlopik

Марина Ивановна Цветаева ( rossiavon )

Marina Tsvetayeva ba 26/09/1892 koe Moskva koblir. Tison jovapafa, dum yonara rossiafa ezlopikya, belison va yona kevartowarafa ezla, va 1905 Artowara moliker. Вечерний альбом ( Sielburey ) taneafa larma zo sanegar viele ina nemon tir san-anyustdafa.

Ba 1912 va Sergey Efron kurer do dan va baroy nazbeik di askir, vanmiaeon Irina nazbeikya aelawalketesa bak 1920. Kali Artowara, Tsvetayeva is yasa koe Krima irubad. Efron tiyir gejaf sayakik aze va Batakervolia di kozaniyir. Bam ko Moskva Marina gelber lize volfavlapon alubdon di ugalzer.

Bak 1921 Pasternak pu in vangruper da Efron tir blis is irubas koe Praha. Luxe Marina, tir toza ke divblirafa abrotcifa sanperda koe Berlin az Praha az Paris. Do Pasternak in va skewesa twadogolera kiewagitir ise erolaweter viele bak 1923 va blira koe TSSS kre dam va divblira battel kiblatar. Bak 1920 sanda ezla ke Marina va sanegprogera kakeved. In va yon rossiik remofis va Praha rungruper : va Nina Berberova is Nabokov is Gorki ikz-. Lente vonewera ke fascievafa iyela, wan lyumar suteson va doca dem ezla tarizana joke Ceskaslovenska. Bak 1925 inaf suteks kev batakaf divlamanikeem va sovietafa vertuma mibud acum in zo stragajar. Teni tanda, copon blison ise va blirugaceem trumamason volse golde volfakafa blira koe Ceskaslovenska puskeweyeson, ko Paris mallapir, koe Praha va kurenik iskeson. En tir robiskapaf. Ile intaf blif kliteem (« koe Rossia tí neviskaf ezlopik volse batlize tí belisikiskaf ezlopik ») soe wan blir ise suter milkalion dam kontegeem is milarmoron dam poeem tualbasas gan ina va yona logripokolena lazava.

Bak 1926, kan Pasternak, va Duineser Elegien is Sonette an Orpheus ke Rainer Maria Rilke kazawar. Barafa twadogolera koblir lize kottel va artel mafelar. Rilke tijir kotcakolaf koe Swiza levi awalkera. Pasternak gan sovietafa vertuma zo belkur. Rilke, dan dene bat tuantan is grupensen ezlopik va tana sarefa taneafa puda al grusoltrakuyur, pu in suteyer va « tokkane va sint uzat ? Wiltvordon », bak bata trelafa is cuisafa dogolera.

Koe kerafa Rossia, Marina va batakervolia siskeyer ; koe divlamanikeemxo va Mayakovski kevrojur. Bak 1928 brudison va inafo ezlapo va divlamanikeem ripindar. Kore bak divblirugal suteper, golde intafa kotirkara zo sanegansar acum gojer : « batlize [koe Paris] tí mefavlaf, banlize [koe Rossia] tí volrotis ». Do sovietaf birgardial kurenik kobar ise va yona bilma kunte yon kevstalinevaf lyumasik paker, va coba Marina nujidafanayar. Bak 1937 ko Rossia nazbeikya dimlapiyir. Azon di tiyir Efron baton divvawas va francaf ardial.

Bak 1939, me rozavzason, ko TSSS Marina is nazbeikye silukon dimlapid. Volkaluca va in koon ker : kurenik di zo zeltar ise nazbeikya di zo rezgaler. Tison gripokolewes is jovlen gan kottel, in suter : « Pu redusik : adim tir gemelt / da va fizud dimzilí. / [...] pu rinafa volpestorafa tamava / Va vewara anton kalí ». Marina Tsvetayeva, dum enide va ironakafa vewara tcalar, ba 31/08/1941 va int rumkar. Anton tir 49^-daf. Bak geja nazbeikye di xonuker ise tir tuke Ariadna divpemaxoayana nazbeikya da va inaf grabom grupet.

Inafi bali tir lugavafi. Yona folvafa watsa vlupesa va grabom ke Tsvetayeva gan tizafa griva va blira is kramuca is vedeyaf zaeeem, is tori vewara va rapaluca is yon soaks is skintaceem zo felid. Koe Tir jin levconyas, Nina Berberova, dana va inafa ezlopa mafelayar, va in batinde atoer : « In va guazafa titolesa zoera va yordagandura al xaakar ; ikikon tiyir rotapstan is mevangrupen ezlopik ik gadikya ik kurenik ik fertik ke jotalistikye, aliabdiugalkirik ik dankasik ke otcesa ervolia ik jotaf godevrik ik skewesa nikya. […] Voxe me kiewaskiyir va felira va int iku nyofara iku grupera. Va mana grupejera va int milon arayayar. Tiyir korowupen ik mivokajaf ik volkalaf acum iste yasafa " begama " zavzayar antiaf. Trenon vecaweyer ise coeweyer ».

Pegon aneyason va yon kakeveks is kagrupesuca, keskeon ( va Sofia Parnok is Rodezvitc ) in divekureron skedayar ise va yona napaca ( do Sonia Holliday jotaf wenyusik is Staxovitc elpatusik is Andrey Volkonski guazaf sersik is Nikolay Gronski ). « Va jin kalterktac ! Ware zo gonalbá kire awalketé ». Olegara va bellike viwazena gan tueaftasa albolegara. In, kotviele gripokolen, kotviele bakan, kotviele volkalaf… Va blira inafa lugavuca weyonar. Yona iyeptasa skewera, yona twalbara, sedme Tsvetayeva alba tir kevaldo ke redura. Volruptesi is iyeptafi is belikevafi rali va in vol spinkayar ta stuvablira koe doeva koe SSSR ik tira do kevdoevaf lyumasikeem, acum sol saref suterotxoeem uduton zo divpakudeyer. Dolge avot, tila ke Tsvetayeva tir milafa : jonte blifa isu ageltucafa, pestalenyera va altafa geltruca ke ravlem is sugdaleem. « Slikon kotviele al tir sabe ke jinafo koexo », in kaliyir.

Blira dem skewera is sollipawera is naca. Blira tanion kaikvolana koe inaf ezleem. Ezlopa dum folvabali. Volbografa is pirafa is basalmapana anda dana gan in tusutesar ta moblira kaiki kote yasafe ik pestakafe ik ugafe egale. " Joanuca is mejenianuca ke yon inaf blok kevie milbava is cwa ke telyon ke Puckin dile zo osted. In va tazukuca ik glabuca trumamar. Gonier. Awalkera is sutera va sint en gluyad. Ede ezlopa tir blira, tir wetaradro ise kobarazega tir muxelk. Godilfusa is gonempasa is gotrovgasa wetara va rolona koe ava. Wetara va tana intafa pakava ke dana basalmaks is gribidga anton lapted. Enide me zo rotroker, in va intaf tey godivbulur. Sutera ok awalkera, tir antafa okaca ".

Marina Tsvetayeva