Jiomaik ke nefteem (suterot)

Teliz mal Wikipedia.
Aller à la navigation Aller à la recherche
Jiomaik ke nefteem

Jiomaik ke nefteem berpot tir suterot ke William Golding britanaf suterotik, sanegayan bak 1954.

Golding va malyopasa sazdara va seltay is inaf vodeem torler. Nakilason va yon rumeik moe letafa ewala, va watsa dum vura is rictela is gruidera is tizuca ruer. Bat rumeik vuroled kaatoes va volgunuca neke vey konaka koboda va ksubera va nuyuca is bloduca soye di raved.

Vildeks

Severo bureso va britanaf rumeikaf tum is abic milgik mo letafa ewala seluwer. Ant rumeik remblid, batvielu miv torleson. Kreme Ralph santoldik wetce okilik va int anamsteger nume kan kuldoyap va moblisikaf arak anam int kabelcar. Lana vexa aname xa vanpisa leca pendewer. Lantel gis va kuldoy koe nubeem nuyon ronopulvir edje arak terektar. Ralph va lospa ta moblira lasugrustar. Tuwavaf ardil exonewer, i ardil vexan gan kizeks ke Ralph is Bulolik sudaf bendik tunayas va andik. Kabelcara zo grustad enide kottan va rieta do lospa rowalpulvir. Rumeik va bata warzafa grustara malaskid. Ralph dositan gu Jack blakerikap is Simon mazdaf vazik va worara va ewala bokar.

Moi dimlanira bal kabelcara, rumeik va kosmaks pu lospa pwaded. Tid valeaf gu nuyuca is milgikaf isk co koaykas va betcoba. Tan jotik ke lospa pebur da craker da govitol co irubas koe ewala az co vumbes va sin. Dere espur da va tanoy al kozwir. Pola va rumeikeem adre kofir numen tison antaf, sin mea tid frendaf is daaviskaf. Ralph va sin latuvumeltar, zolteson da battel opelon al setrer numen govitol anton tir enga ke inafa gesta. Enide sin gan kona tota di zo rokozwid, pune sinaf antaf mergil tir askedara va tey. Acum belcon gorad da va tanoy tice meftava tisa gejopafo xo fu askedad aze kiewagitid. Tey tuke wezo ke Bulolik zo turunkar voxaze mea zo rostujer nume mo pakava ke ewala galbuwer. Bulolik pu lospa pebur da va wico abdi askedara va tey lokiewon co govegeduyud. Azon rumeik vofad da tan jotik al griawir, i tel co wiyis va govitol : zolted da bal fird ape xonukeyer.

Malaskison va pirdara ke Bulolik, rumeik va wico toz vegedud. Voxen ant Ralph is Simon bokayad edje artan don Jack va estura va ilt ik vefara moe piluda abdualbad. Ralph is Simon va wico tenuked. Kadimion taneafa koboda wal Ralph is Jack moakles va inafa rictela sokir. Jack gu tcabanera va govitaf bulol num seotara va atela gan yon loguazaf bewik ke lospa zo vajger miledje bantan va murobas tey tice meftava di sinkad. Jack trakur da metan va sin rovogiwatar nume va tcabanera kunte tey gogolar numen batcoba va Ralph ilpuver.

Adre Jack is duskikeem va intafa gexata linged enide ko tuwava va int di jed nume vas gejik cugeke vektad. Konviele Ralph va sumefa tota kozwir voxe ciwanon is zidegason rabater da gire tum ke Jack va tey grirunkaweyes me al kiewagir. Ralph va meftava lokalion laticlanir enide va ar tey di askir, voxe logaveon. Tunodranon, va pebura maldiner voxen Jack anton parar. Ralph karolar da bata menustuca tir merotixena. Adoneteson va rola, Jack ganer da lospa va taneaf aytatan bulol estutur ise va intyona sega kareizur.

Nope bata regala, Ralph karolar da sin va gomalaskin vexeem is abdukaceem ke lospa gire godrigdad. Voxen rumeik gan arcoba zo abdikereled : govitol mwarnes koe ewala kir wiyin gan konak. Lan trakud da in va mid gidivlanir solve ar va rid. Keyakseks icde broyera is foliks ke kottan dantaler. Rusagaf is bemuaf alpoz va warzafa mijera wal Jack is Ralph nekir kiren Jack va yordara ke Ralph isu gedira moakler. Karavaldatason va jotikeem, va Govitol djupotcabaner.

Rumeik kenibed abdida tcabaneteson fu mallanid. Erik jelik isu Sam va tey tice meftava rubad voxe va izga ezasa koe orika kozwid. Ve radeyed nume van pemaxo walzeteson va arak titlanid. Batviele dratcera en nutir geltrafa. Jack djukumallanir, laiteteson va Govitol do intaf tcabanes tum. Voxen Ralph is aryon rumeik djukudositad nume di tid lokeskotaf.

Ralph va buduca pu Jack is arak ke tum djuwazder nume va wafibol labalier voxen gluba biwe kelur. Rumeik va lazava ke brinuga ilgruped ise toz yordavefad lize tid tcabanesik az wivga. Vefason tic meftava artlanid. Wison va ayataka zekasina gan suka, Jack is Ralph otced.

Jack krupter da otcera ke tumokilik kabduu « Govitol » somerodoster nume djuprodimlibur. Voxen rumeik va okilafa yorda gu Ralph me djutiolted numazen nyaten Jack mallanir enide va intaf tum koe aala fu redur. Wori kadimion, cug rumeik va tum ke Jack kevlanid kire do in is inyon tcabanesik mea pested musedaf. Ant Bulolik is Simon is jelikeem dene staba ke Ralph wan tigid. Tum ke Jack luxeon loloon tugovitawer ise tuforteyfamawer. Jack gorar da sin pu Govitol gofirvid enide in mea di rotur. Acum va bulolya gu oceem solimpar aze aytar aze kabdue arak ke tum basalmar. Taka ke sulem ben ayezok zo kokoar ise kle zo firvir. Jack tir oklaf gu int nume mo piluda lanir. Va Ralph is inaf tumam ta dofa durgara djuganer. Ralph taneon tir rodaxas neke tere kevnaler.

Milviele Simon enintes va tey tice meftava sonker da mil govitol dye tir xonukeyes kevulubesikiusik besan gu stamaxa deena gan suka. Karavaldason va lospa kal piluda titlanir lize va ayezok dem taka ke bulolya wir, i dem taka inton yoltaya gu « Jiomaik ke nefteem ». Va lospikeem is tum ke Jack stutes is estus is kareizus va dilintyona gejafa sega vanion kozwir. Va bata kabelcara kle djukurimpavantar enide pu lospa dakter da govitol me krulder, voxen Jack va batman ovopaf siatos me folir nume trakur da Simon tir viwazeks va Govitol. Batdume va inafa xonukera malgorar. Rumeik va andik folid nume va Simon peyason toz alied. In vordavanon tere xonuker.

Rumeik oklaf is lulan trakud da va govitol al aytad nume va pemaxo ke Ralph djukuguiner. Va wezo ke Bulolik dubied, i va antaf mergil rotepus va tey, anamvilason va kotcoba don wico. Mali direviel Ralph is abic malaskisik gorad da va wezo ke Bulolik ko pistafa ralma fu dimnarid lize Jack is arak ke rumeikeem va intafo pemaxo al exoned. Bantel va gexata al linged ise va xatcaxa al diskid nume vas govitik en vektad. Davon kategid, solgison va Sam is Erik azu stoleson, kore dotegison Ralph is Bulolik va ardilaf kuldoy bured. Roger tan rumeik va pistokap mo Bulolik pastar. In zo aytar isen kuldoy miledje dere zo vilar. Larde antafa ardilafa is weltafa leca su zo vilar, pune Jack tuokilawer isen Ralph gonotcer.

Tcabanera va ayik zo bokar, katrasitison va Ralph preyutas. Jack va vask djukuteyar enide in di divlanir voxen tey va int kalion koaalar. Ralph va radeya impavantar ise van bira titlanir. Banlize va birelaf fayik kevlanir, i va fayik elogayan gan vikiz divstis va ewala. Ralph cugeke tir valeaf gu fala numaze va xonukera ke Bulolik is bifeem dilizeyes moe ewala kareizur.

Dere rupel

Jiomaik ke nefteem
Open book nae 02.svg
XANTO
Vergumvelt Lord of the Flies
Sutesik William Golding
Ava Englava
Suterotinda Berpot
Evla 1954
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg