Ingrid Jonker

Ingrid Jonker

1933-1965

Geeafrikaf afrikaansavaf suterotik

Ingrid Jonker ( 19/09/1933 - 19/07/1965 ) tir geeafrikaf ezlopik.

« Rumeik me tir xonukeyes, me koe Langa mei Nyanga
mei Orlando mei Sharpeville
mei ardialxe ke Philippi
lize dem vilt koe taka dayker
[...]
rumeik biwe djuvefayas va awalt koe Nyanga kotlize tigir
rumeik vanpiyis ayik va kotafa Afrika moolanir
rumeik vanpiyis gulik ko kotafa tamava koyar
a novexa. »

— Ingrid Jonker , Die kind, ezla.

Ba 24^-e ke alubeaksat ke 1994, bal koflisa dewitca lente taneafa geeafrikafa puloda sanerotion libuyuna, Nelson Mandela va ezla ke Ingrid Jonker ozwar, i va ezla vergumveltkirafa gu Die Kind : « Rumeik aytayan gan sayakik koe Nyanga... [...] Rumeik me tir xonukeyes... to ebeltaf rumeik aytayan gan batakaf sayakik... »

Mejesa blira is gijarotif grabomeem is folvafi bali ke Ingrid Jonker jupayad da in tir tan lozolonaf suterotik ke Geeafrika is afrikaansavaf suteroteem, nekev ksera ba biwe bar-san-tolda.

Blirizva[betara | va krent betá]

Ingrid ba san-barda va taneafa larma suter, i Na die somer ( Radimi idulugal ), aze ba tol-san-barda va Ontvlugting ( Otcera ) sanegar. Remi blira va zaavafa solblira koe vo exuker ise ranker miledje dun lajupar da gan gadikye zo renar, i gan gadik is krinanik ke Vedeyafo Pako is taneagadesik va Urayasa Pulodafa Tuzda kevrojusa va Apartheid bolk.

Bristun is renan gan Jack Cope suterotik isu André Brink, Ingrid Jonker va intaf grabomeem mbi kagruper, tulon seotason va targafo afrikaansavafo poradro is filav nope Rook en Oker ( Vikiz is varka ) larma, voxe va Abraham gadikye meviele di buiver, i va gadik guon dameus va bet butc, is tabipis va dalintafa viltera kev zaavafa gaderopa ke bowere, is bilitafimaf gu dalintyon suteks, maneke bal pulodafa atatcera sanegon ganon di zo zamber.

Banugale Ingrid Jonker tiyir fertik ke toloy vilteyes suterotik, Jack Cope is André Brink. Tis loloon rantaf, ko misa is swavafa milbaviskuca tere belxar, batdume konakviele zo koroper.

Ba 19/07/1965 ba siel, mo Three Anchor Bay piluda poke kraba lanir, va bira kolanir aze va int wizur, « moe domega wale ontinaf werd is rata » milinde ba san-tevda koe ezla dye al suteyer.

Icde Ingrid Jonker, i icde suven korobik, Jack Cope suteyer da in tiyir tcumivaf is sakiaf is stuvaf, « meinde waltrakus va blira gu ezlopura. »

Ba 2004, semekon gu radimawalkera, in va diema ke Ikhamanga veem nope webera va geeafrikaf suteroteem is lyumara mu ayikaf rokeem mbi ziluker ; Ingrid Jonker Poradro va lokiewaf jotaf ezlopik ke Geeafrika batugale gabler.

« Ede Europa va Picasso is Guernica trutca rozinular, pune Geeafrika va Ingrid Jonker is Rumeik ke Nyanga rozinular. »