Henri Lebasque

Henri Lebasque

1865-1937

Francaf lingesik

Joseph Henri Baptiste Lebasque, gubeon yoltkiraf gu Henri Lebasque tir direlitevaf lingesik is gretcasik.

Blirizva[betara | va krent betá]

Vey morafa yasa, koe Champigné widama ke Maine-et-Loire utca vatalte Franca ba 25/09/1965 koblir. Bak jotugal va yambafa olda ke Angers nobar. Veygadikeem tiyir tawamidusik isen tiyir gadikye miluntiasik is dolesik va inta. Bak rumeugal va aala grupepeyer larde gadikye va intagabexo gilusteyer. Inafa kralira va tuwava di tiyir taniafa gu inaf grabomeem.

Henri Lebasque va Paris bak 1886 koirubar ise va Colarossi cultim denfir. Batmana yasegafa yambafa bema va malaskira tcazafa is rebase leon dam tela ke Yambafa Bema ke Paris noveyer. Cultimeva ware felisa va bana zo malyopayar. Blidatason, Henri Lebasque va yambafa stinuca ta koewavara va kudja is yunkesa lingera ixam malsaver.

Radimion, remi tolda va lingexo ke Léon Bonnat ( 1833-1922 ) dene Yambafa Bema nobar. Henri Lebasque va yona taneafa trutca dene Meruptesikaf Bontay kiewatcon wonar, i dene bontay reduyun bak 1884 gan yambik jugemes va mek malyeruk mei gablexa. Mali 1888 va Ferdinand Humbert lingesik ( 1842-1934 ) ta skura va lenopeem ke Panthéon cugexa koe Paris tevdon dokobar.

Lebasque tir lojotafe kapbure oxila ke gijaf litevikeem neke tir gustafe gu afiuca ke sinyona trutca, soe va zovdara is febafa bunera wan lotir. Tici XIX^-eafa decemda va Camille Pissarro klaapafo kakever. Milugale va Maximilien Luce ( 1858-1941 ) vrafuevik isu Paul Signac ( 1863-1935 ) nobar, i va lingesik tis ke mila oxila. Va sinafe ckane lanedje vanikatcur voxe va opindafa nustuca ke Georges Seurat ( 1859-1891 ) taneaskisik ke bat lizor me malaskir.

Bak 1894 Henri Lebasque va Catherine Fisher ( okon Ella ) kureyer. Baroy nazbeik di tid : Marthe ( 1895-1989 ) titise lingesik is balumasik, az Hélène ( Nono, kobl- bak 1901 ), az Pierre ( kobl- 1912 ). Pak ke inaf grabomeem va yasafa wiyackafa nakila koe tuwavafa xuta ( matela, tawetc, ikz- ) bam pimtayar. Dene Bontay ke francaf yambik bak 1896 taneatomon wonar.

Taneon irubase koe Paris, Lebasque va widava titi XX^-eafa decemda bulur. Sfianuer nume kranaveper, batdume kurmik va tawaday pirdar. Ine koe Montévrain wida balemdon taneon koirubar, az Lagny. Va jontik patectoy skur : kuksafa nakila is awaltanafa wida is aala. Koe aryona gola ( Vendée, Normanda, Breiza ) dere jonvieler ise divon koyar : ko London bak 1904 az direilanon Madrid. Va Reynolds is Turner az Velázquez is Goya banlize mafelar. Dene Muvugalaf Bontay mali redura bak 1903 wonar. Soka va trutcapa ton litevaf martig vergumveltkirafa gu Estura moe werd luster.

Henri Lebasque va geeka ke Franca bak 1906 oxam kosmar. Kaiki jontika jonvielerapa, parmon di koirubar. Koe Saint-Tropez remi konak aksat ke 1906 zavzagir, aze koe Sanary bak 1911, aze koe Sainte-Maxime bak 1914. Va fentugal ke 1913 koe Nice tiskir, aze bak 1918 koe Cannes. Bak 1920 koe Saint-Tropez gire tigir. Bak 1923 koe Le Pradet poke Toulon jonvieler. Tere koe Le Cannet poke Cannes bak 1924 parmon koirubar. Abdi Taneafa Tamavageja, va yambik ke jemakeva al kakeveyer, i va tulon Henri Matisse ( 1869-1954 ).

Radimi koirubara va Le Cannet, va Pierre Bonnard ( 1867-1947 ) ke Nabi lizor is pokeon irubas nelkon nobar. Mediterraneafi afi is zakod ke lidawicka va benelaca ke inafa koekakorafa lingeropa banugale tadled. Valey yon delt isu yasafa nakila moe tawetc ok koe matela, Lebasque va jontika lebaca dere skur.

Henri Lebasque koe Le Cannet ba 07/08/1937 awalker.

Grabomeem[betara | va krent betá]

Henri Lebasque va kiewatca tuke yasafa nakila koe mediterraneafa xuta grupeyer. Va koredik ko matela ok moe tawetc aname soporaf ruxeem rundar. Rukuzafa skura va izga is afi va kirapa ke buneks tadler. Ayikyefa vola tid riafa. Lingesik va ayikyuca is rumeuca dulaper, malsaveson va kurenik is nazbeikeem wetce tezik. Tigirapa ke yasik koe wiyafa vanama va trutca gu daavafa divrozara va aulafa blira poke tuwava is koe zakod ke mediterraneafa domega artazukar.

Grabomeem tir zolonapaf gu tokoda ise vas indeem tikir : patectoy is delt is yalestaca is lebaca. Bata gedruca tir sugda ke bagalasa dulapera voxis griva ta kobara. Yambik va decitoy puntalingeks iku lavalingeks iku zovdaks iskeyer.

Va Lebasque gu kon aptaf lingeropaf lizor me kavaniksantut. In bak 1865 koblir ugale liteva vanblir. Va romplekura ke batmana listopafa artowara koton lyana gu pestalera me rodivvawar. Inaf taneaf grabom tid litevaf, voxe radimida va Paul Signac vrafuevik isu Maximilien Luce al kakever, pune lanedje va sinafe ckane beitur. Titi XX^-eafa decemda va jemakevik nobar voxen sinafa ukafa pistolera va ine me zoed. Mali 1924 gan Pierre Bonnard ( 1867-1947 ) vegungik is miloxilik loeke di zo turestar viele koe Le Cannet koirubar. Sin toloy va yona milafa watsa dulaped. Voxen Lebasque eze kota abdutumafa koparintara wan tir ise plaxon narison va saregael towar.

Paul Vitry yambizvopik koe suteks icde Lebasque va dalafa adala ke inaf grabomeem muxackayar :

« Lingera koe afi is daava, mivokon is fokton is numesugason nutir fli is ilkafa norluca ke Henri Lebasque. Me raveyen bolk wavdon vegeduyun tir, me tazukoy, me ind, oken lodamon in va kot vols argas ind vwalar ; va kotcoba blisa iku mempesa linger : va ayikya, va rumeik, va kelt is lava. Bagaf is lavukaf gael va grabomeem kolavar, i va grabomeem mesuves va gorestafe detce mei dem gabentafa keska mei odjafa uka : tuwava mu ine dun nujorur. »

— Paul Vitry, yambizvopik.

Dere rupec[betara | va krent betá]

► Trutceem ke Lebasque

Stragela[betara | va krent betá]

(fr) Brigitte Bouret, Joseph Déchelette, Fenêtre sur. Exposition, Roanne, Musée des beaux-arts et d'archéologie J. Déchelette, 09/03-17/06/2002, Roanne, Musée des beaux-arts et d'archéologie Joseph Déchelette, 2002, ASIN B000WQRTP6.
(fr) « Palette impressionniste et fauve en Méditerranée. Henri Lebasque et Henri Manguin », wonara ke tcila ke Roanne, 2009.