Guyusik (suterot)

Teliz mal Wikipedia.
Aller à la navigation Aller à la recherche
Guyusik


GuyusikSchachnovelle ) tir berpotam ke Stefan Zweig, sanegayan moi inafa ksera bak 1943.

Vildeks

Nakila moe gidatotapa mal New York kal Buenos Aires dilizer. Koyasik don pwadesik is tan nik rundanyad. Va afigasutesa sizunta laizon kozwid, numen nik ke pwadesik givar da Mirko Czentović tamavaf guyutif nyelik moe tota tigir.

Tiso nazbeikye ke slavaf totasik ke Duna bost, is diso va grupera jontikedje gubirgayana, Mirko gan gertik ke intafa wida moi awalkera ke gadikye zo koemudeyer. Vakorkirapon grurabeliyir ise grurasuteyer ise ton gracafa tiva brunafa gu kotcoba vaxe guya solwikayar. Lansielon edje rizik do gertik ombuyur, pune bantan kev awalkesik zo rozayar. Bam rizik pu jotafo Mirko va tenukera va etsa krandeson drageyer. Mirko kan 14 vord war, toltomon, aze kev dimlaniyis gertik dere war : « Va viafa is giafa is verkafa vefara ksubeyer ise va mantafo jo meviele kamadayar, blaganyeson tic guyak. » Woenon gan inafa guyura, gertik va ino ko vegungafa wida malstar lize graba dilizer. Mirko va antafa taneafa etsa tazdar vieli va verteem giltaver. Azon kev kot lokiewaf guyusik to nuvon mowar. Simczic biptik ukeaf gu guya, va fukorlara va mallapira ke Mirko ko Wien bam gorar enide va ckaneeem ke guya di raver. Jotafo Mirko kev kot guyusik war voxe va kona etsa wiiskon me rodevefar, trabe me wison va guyak : « Ino va guyak koe dark vol roderietar. » Inafi durulafi gestaroti va kot lodarayaf is logruf guyusik maer. Soe Mirko gan erba roziliduna gan guyafa cenera anton zo dulaper : dive bata tamava, gin dimpir maytaf is arayiskaf tawadayik.

Dere rupel

Guyusik
Open book nae 02.svg
XANTO
Vergumvelt Schachnovelle
Sutesik Stefan Zweig
Ava Germanava
Suterotinda Berpotam
Evla 1943
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Taneafa piskura ke 1943