Frankenstein (suterot)

Teliz mal Wikipedia.
Aller à la navigation Aller à la recherche
Frankenstein

Frankenstein ( englavon Frankenstein (The Modern Prometheus) ) tir berpot ke Mary Shelley taneatomon sanegayan bak 1818 koe Britana.

Vildeks

Bak XVIII-eafa decemda, Robert Walton jotafe mivravese englikye va kosmara va lentenael vilter. Mallapiyison va lentefa Rossia koe dirgana tota, zo woltendar viele va ayikye moe impadimot kakever, i va ayikye riwe awalkeyese vox vewase va greledara, vieli zo givar da Walton lenton djukurabdulapir. Bantel va bantanye yoltkirafe gu Victor Frankenstein tunar. In akoleper, kuncasiyin gan koyara, is leve eaftaf darekeugal, voxe rabateson da Walton tir dem swava milafa gu dalintafa, pune va kareizura va intafa izva kiblar.

Gaayan koe Swiza dene kalafa yasa, do tulon Elizabeth gadiskafa kosayikya, Frankenstein tiyir pegaf gu grupera. Va grabom ke savsaf trakopik isu diolusik dum Agrippa is Paracelsus gaveon kosmar voxe me sonker da sinyona eva jontikedje al zo ikapid. Stakseyen den kotla ke Ingolstadt, in va roklara vofar nume va vayara va sazopa koaskir, tre vamoefa gruuca. Va tentura va bli toz vestar numaze lansielon ton galova, va lana diotetca novesa va dimblisira va awalkaf ug kosmar.

Dustulen gan rieta ke redura va warzafa blirinda kason vamoefa, gu kotartan va int sostar ise va bat azed toz kobaveyer, vegedutuson va warzafo alto mal awalkoda. Va ino ton gulik redur. Tere Frankenstein va tcobara dioter numazen warzaf blisik vanblir. Nekon, wison va kadara, grupeik mbi tuvirnar nume batviele sonker da awalkodik en tir evakaf kir stezaf. Va redunik jovler. Titkeyes koe ilava, va Rostaza blaganyasa vamo int aklon wir voxe viele kadimion divmoder, pune va meka conyuta di trasir.

Nope keravafa voza toz akoler. Selanon gan Henry Clerval rumeugalaf nikap, kosmar da va pulvira va sazopa robeomar. Arti vogonugalap djukudimdenlakir, moekote katrasitinon va Elizabeth, voxe gan twa ke gadikye gu eaftaf warzot zo kowalzer, i gu warzot da William jotafe berikye telomtayanon xonukeyer. Kalion dimlakison ko Genève, va Rostaza poke intafa oga kozwir nume laner da va gunik su kosmar. Voxen Justine zanisikya gu gomilara al zo koridar : lan flek dadiyin gan William ko inaf ucor al zo dimdrasur. Nekev karakera ke Elizabeth lanes va volgunuca ke yikya, bantan di zo vrayar. Victor va xonukesisik va William gruper voxe va pilkoma ke ageltucaf gunik me roverazdar kire engruper mantode wetce oviskik co zo malyedar.

Djukurietaruson, toz meftavutiur. Konviele vemon ice Blanc mefta, lente Rostaza xuye tigir. Rostaza zo djukuterektar. Victor taneon acagir voxen inafo po tir gijarsafo. Acum Rostaza va intafa izva kareizur.

Kaiki redura, Rostaza koe orike towayar, wijison, aze koe aalxo poke Ingolstadt tere tigir. Va awalt is lava kosmar, az va tey nope pemaxof tey iskeyen gan koyasik. Lakolanison va wida, zo kugdar ise gan irubasik zo balier. Ko vard gelber, poke copafo wicomo lize lana yasa dem tanoye guazafe wiiskikye is toloy rumeik irubar. Toideson, Rostaza va envaks va pulva isu favera az belira al raver. Va lane pone divbureyene ba redura koe ucor trasir : i va koekafe pone ke Frankenstein pintase va tiureem ke redura.

Pokoler da rion divnedison va int pu bata yasa, lokiewon dam gan aryon ayik di zo emuder ; keson, Rostaza birgon pomar. Konviele kolanir enide pu ant guazikye di pulvir. Viele rumeik dimdenlanid, pune zo aloyar. Yasa moion yater numen Rostaza va tizuca taneatomon satoler. Va inafa mona koanteyar, jaxadadason kev varaf ayikeem. Bam va Genève djukulanir enide va redusik di ralentar.

Moe kelda, va wizuwesa yikya giwar voxen inafe dositikye va in viltar. Artlanison ko Swiza, Rostaza va nuca gire latrasir ; pu rumeikye va int atoer, pokoleson da inafa volgunuca va vuda di djir ; voxen rumeye va in dratcer. Viele Rostaza sonker da va berikye ke redusik battode gir, pune telomtar. Va flek trasin keve awalkoda narir aze kakeveson va Justine kenibese koe baplaxe, bam va in ko ucor fargier enide ine di zo koridar. Batinde kev tel blodik ke intaf mejereem toz jaxadar, voxise pu Victor re djukupulvir. Va erura pu in askir : Victor va dositikya goredur enide ina mea di tir antafa.

Victor zo tukultar ise vewar voxen Rostaza abdiplekur da sume ayikeem do dositikya di blir. Konten gan antiuca ke Rostaza is sonkes va malyafa erudara, in soe malnaler.

Dimdenlanison, en miser voxe va lazava me roverazdar. Gadikye karaker enide in va Elizabeth di kurer, milinde batcoba jontikedje zo abdiwiyir, voxen Victor vewar abdida va Rostaza al tenutceter. Yonton gu koyara, va Engla djukulapir lize va yon grupeik abdi warzafa redusa tegira goruper. Va vacanelakirapa va Engla do Clerval bokar, puvegunsuson, aze va ant Clerval ware koyas isker. Askitison va grabom, va xe moe bumafa ewala valente Skota lizukedar.

Me karolar ise gan askira zo tukultar. Nuer kase blisikya va drageks ke Rostaza askiyin abdi redura naleter. In nuer kase ina me titir pisonasafa lidam ban in ise kase va bumuca sume ayikeem naleter ; ostik tokcoba dilizeter ede bat toloy stezik nazbalked ? Victor va warzaf awalkodaredunik sollipar, vol djukulinver. Rostaza va in askis wir. Sielon artlanir aze va Frankenstein ralentar, granseson va kaltrenara. Victor vewar numen riyomesa Rostaza dulzavar da kore Frankenstein tir dalintaf redusik, pune int tir feliik. Frankenstein soe vewar aze Rostaza mallanir, vogason da va Victor ba siel ke inafa vidia di katrasir.

Kiazan kir tenekayas, Victor va kota conyuta ke inafa kobavera koe ewala vilar aze kan witka mallapir. Egluson moe bira, va krimta ke Eirea tere artlapir lize gu pisonara mulon zo koridar. Va awalkoda mbi nedir nume kosmar da ina tir tela ke Clerval dem conyuta ke telomtasik keve berga. Victor toz tuoviskawer.

Viele tere grioviskawer, pune gadikye va in katrasir. Moida Victor al wazder da koe Skota tigiyir viele awalkoda ke Clerval zo trasiyir. Toloy Frankenstein ko Genève dimmallakid lize Victor va kurera va Elizabeth tere nalecker. Ta vidiakoyara do in mallakir, narison va ervo is kalobrason. Konviele va lorara gilder nume divlanir, laneson dan Rostaza pokeon tigir. Azen kizoyu va mawa ke kurenya divstir. Elizabeth moe ilava su zo telomtar solve Rostaza moe dilk evieson tigir.

Rostaza otcer. Warzot ke xonukera ke Elizabeth va gadikye ke Victor nopeon awalketese agvundur. Victor luxeon co djukurawalker neke va Rostaza toz onkar, torigison da batcoba en tir goni. Koo tamava kal Arktika Welfa onkar, malaskison va staksa iskeyena gan moretiasa Rostaza. Onkason tuaxayan, gan tota ke Walton al zo koemuder.

Tota gan opra zo vannarir isen drig tir riwe tcumives. Walton va Frankenstein givar da ba divoprara tota van Engla lodam nael vodjutur. Kore tir axaf, Frankenstein buiveteson va drig skeuson toz dewitcar, vox giopon. Awalker, dildeson da Walton va tcabanera va Rostaza fu linter.

Lansielon, Walton va lor gilder, divu ilpega lize alto ke Frankenstein tigir. Va Rostaza ikuzasa nope redusik trasir. Walton pulvir voxen Rostaza koridar da ba koblira gan Frankenstein al zo jovler. Kalir da kore va aytara jaxadason al puvegur, pune va daava me al kosmar. Pu Walton abdiplekur da mea djukuraytar isen inafa bocafa tegira titir vanlanira va nael az vikeara ko reliezak. In mallanir isen Walton va brucka vreparlewesa ko bra wir.

Dere rupel

Frankenstein
Open book nae 02.svg
XANTO
Vergumvelt Frankenstein
(The Modern Prometheus)
Sutesik Mary Shelley
Ava Englava
Suterotinda Berpot
Evla 1818
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Moek ke englavafa piskura, 1831