Dubiesik (suterot)

Dubiesik Georges Randal, i yikye vey yasanya abdiplekune gu blira ke glastikack, va ageltafa kubla kosmar viele gu intaf konoleks gan ziavikye zo azreger. Batvielu va lidafa mupera pestaler enide me di vanpir dofugaf gu mwelaf dubiesik : exus va tamava lize blir, pune di dubierebur. Gan bulaf Lamargelle gertik kalion zo tcaluter aze gu dubiesikafa tompuza is tozekikaf ontinuk zo koplekur. Konaka stuva nekina gan xuyava ik kakevera koe wenyafa zikexa ok xatcaxafa sirta radimifid, lize marwida va yona izga palsed isen awalkoda ve pulvid. Voxen benele batlize me tigir kiren Georges Darien, i sayudas arotievik ( is rotir int wetce ebus dubiesik, etrak wan tir ), va sutera va prostewaf berpot trumansar. Inaf koredik, tunuyayan gu glastafa levetirotaca isu nyukaca, va skeusa lanzasa dewitca kev selt, wali toloya raklera luwid, i kev selt osk noves va mwelafa dubiera isu bristus voxosk ware « onkas va tanuca koe azekuca kan usta ke tarkara ». Sedme André Breton, Dubiesik berpot belcekas va tapafa berpotuca is figapafa kleca, « tir tela lonustafa ruzadera jinon grupena kev murkuca is ortara is fituluca is nyukuca ». Louis Malle bak 1967 va elpat guon al askir. « Me djutí mwelaf tozekik ; va meka levetirinda albacká. Djutí dubiesik, soreliskaf. Mekobason blití ise bas artan va inaf waks oku faluks konarití, dye milinde bowesik is pilkotik is dirotkirik askid. » — Georges Darien « Tí dubiesik, to ageltafa. Voxe umeke trakopú ise va sugdala ke ravlem vofá nume va riwese zolone guon yofté. Ton tuwavasok, dubiesik tir to digisik va slikaca, i to kulik ; ton ref seltsok, dubiesik tir to paxayesik va kulik. Mana romplekura va rieteem ! inde mancoba abdi jin zo kaliyir. Voxen xabe ? Rokla fu tenuwer... » — Georges Darien « Gilestú, gilulí ; ise va razeka moe tinida is tirac moe azega giliské. Lan dubiesik va kotcoba dimvud, koe worana mona. Jin, meviele. Roton exavebú, ageltafa ; voxe va skalera gí : adujason ebú. » — Georges Darien Dere rupel Georges Darien : Francaf suterotik ( 1862-1921 ) (fr) Krent ke berpot, Le Voleur

Dubiesik XANTO Vergumvelt Le Voleur Sutesik Georges Darien Ava Francava Suterotinda Berpot Evla 1897 betara teza   Tuveli icde Suteroteem  Krent ke berpot, 1897