Decemdafa antiuca (suterot)
VildeksMacondo kolombiafa wida tigisa koe tambafa antiuca ke geeamerikafa tadava koe to sel ke lekeugal zo zabduyur. Konaka yasa va ekemafa wula is lindafa azeka remlaniyid aze drume weda zabduyud. To José Arcadio Buendia va sina stayar, do Ursula kurenya dere kosayafa. Va vowida al buluyud kiren José Arcadio va Prudencio Aguilar al aytayar, i va volnik tis tacedik banvielu dure olyastes. Batdume tolonga va yatera gorayar, dolizison va zabdusikeem va widel kadatas Macondo. Kosayikafa tolonga va toloye José Arcadio is Aureliano nazbeye is tanoya Amaranta nazbeya di dikir. Bexe mek sin va bulolaf ault dir inde batcoba sedme lizukafa vunda sosokir kotviele nazbeik tir vey
veyilagira José Arcadio Buendia vanpiyisa widokilik tir divulaf koredik loeke gikoaskis va volpestoraf abdumimaks zoben gan beta skaltafa rietova. Mal lane ske kal are dun grablur ise va kosmara va warzaca koburena gan romanik loeke albar, i gan romanik tandeon koolakis va wida stanon gan zegodaf Melquiades. Tuke sin, widik va ribiega ke sumafa tadava kosmad : zat is opraki is talas tcalist... Nucapa wale Melquiades is José Arcadio vanblir ; romanik va coras tawadayik ko divulafa axofera nyaper, i va tulon trakopafa aka. Melquiades va blira koe mona ke Buendia di jiadar, kobudenon koe olkoba lize va yona decemoya migajeyxa dem bulaf cek suter, i dem cek lajubasbeksatan gan ant Buendia bocikye.   ke Buendia Macondo laumar neken José Arcadio ko antiuca is koefa blira titplatiwer. Inafa aptasafa is durefa axofera va grupera van oviskuca adre platir : gabeno sol tamava, mevielu anton latinavur, isen tenuketeson va inafa krabera, yasa va ino kev aal ke matela tere gluyedar. Bravanon gu vrekaj kum piatoa, ino va yona ironokafa tanda banlize tiskir, anton auzunon gan gertik is tacedik ke Prudencio Aguilar. Batedje Ursula va mona gazar milinde decemdon di askir. Va baroy nazbeik gaar ise va tanoy lof vedgober, i va Rebecca. Atrison is belcon gaanon, Rebecca is Amaranta va eaftafa kevluca fu ugalad viele Pietro Crespi listafe tavesikye va klawura va blira ke wida rundanyar. Toloya sina va ine gojed voxe meka di dikid. Amaranta meviele di kurer voxe Rebecca va José Arcadio kureter viele bantel arti koyarapa anamo tamava al dimlapitir. Aureliano va Remedios luxeon taneon korenar, i va rumeayikya me rotatritisa. I bat diliodaf trakopik adre kadar volokaf lyumasik, platiyin gu keviera gan seltafa volmalyacapa ke intafe sare, aze vanpir Aureliano Buendia vombik okilik ke konaka kevmadara, i kivan vundaf gejelusik. Arti yona lyumasa tanda, al vanpir vedeyaf gradilik drasuyus va kota kontegera isu namira kir boikeyen gan vanpilkara ke arientus gaderopik va intyona cenera : ugal tove ino mea krulder. Koe roganyofaxo va int tere kobuder lize va dat moavaf kabay dun epur. Miledje va olk ke Buendia koe varafa vema al faytawar nume va san-peroye nazbeikye bliayar, i va kote ocye yoltkirafe gu Aureliano. Luxeon José Arcadio taneanazbalikye va nazbeik ke Pilar Ternera al nazbar aze va listafa romanikya anam tamava radimelapiyir. Dim vo, va Rebecca kurer aze sin va vreda poke awalkikxo koirubayad. Viele Aureliano berye fu zo zeltar, pune gan José Arcadio zo bligiwar. Voxen bantel arti abic viel kan zeltara zo aytar. Banvielu Rebecca ko sintafa mona va int reaker lize arti konaka sanda tere awalketer, trideyenon div nami ke yasa is wida. Pilar Ternera va toloy oc pu Buendia nazbar : Arcadio nazbeikye ke José Arcadio is Aureliano nazbeikye ke Aureliano Buendia vombik. José Arcadio grufo is pegafo gu roti kadar torkevik ke wida viele vombik ziavik al vajger da ino va Macondo di ristur. Vanyer tizafo is memalyafo maneke gan yasikeem don Ursula di zo kaagder. Tere zo zeltar. Aureliano va vombik gadye ta geja luxeon dositar, miledje voneson va veyilagisa rena mu Amaranta ziavya. Va Santa Sofia de la Piedad kurer aze va baroy oc dikid : Remedios listya az toloye jelikye : Toleafo José Arcadio is Toleafo Aureliano. Gan sayakik dodeyen gan viderevafo pako moion zo xonukesir. Santa Sofia de la Piedad va yona tanda ta vartera va oceem di tiskir ise va mona ke Buendia di viunsur, abdida kabdi awalkera bulur aze keldur. Remedios listya tir volgunik voxen inafa listuca va ayikye tudagar vieli sine xonuked. Mejiligasa va intafi roti, tir tec karaf pumkik lanviele va kelt ticnis dumede co tir tumtik. Darpe yona tanda, Macondo tutrigawer ; kelot va wida artlapir isen lanu bilkafu amerikafu sistu va int al isker, saveson va tawa is widikeem. Toleafo José Arcadio tir mazdafo is niskakorafo dum vombik veygadye. Batmil grupelik albas va wilyefa doaliera vanpir stasik va kobasikeem ke bilkaxo viele in va sistu tarler. Voxen lizor fikapon zo rujar : bar-decitoy korik zo lyestad azen alto zo kobirad isen gomilara gu nami gan winugafa izva zo relvar. Toleafo José Arcadio tir antaf remblisik, i bocaf vrutasik folin gan metan. Batdume gorar da kobudeson koe mawa ke Melquiades di antorur lize ilsetikenon gan kottel va basbeksara va nubasutekseem gibedubzer. Kevoke Toleafo Aureliano tir pojasik talgapason vumbes va blira. Wal Petra Cortes fertya ozodafa gu renarusaca, is Fernanda del Carpio fentunafa ilamtafa kurenya vaon walzilir. Bantelya sersapon gaayana tir tianafa is alkusarsafa neke va mona ke Buendia di gader, dace ikapison va kruldesafa Ursula unt tuwiiskaweyesa. Tolonga va baroy oc dikir : Renata Remedios ikayoltkiraf gu Meme az José Arcadio az Amaranta Ursula. Balemda dem duref muvacekap radimi zugafa rujara va dodelafa yastera tiskir : Macondo me di dimduntur. Bilkafu sistu va xo bulur, kenta mo taway dupur, mona don listafo yasaxo ke Buendia zaxad. José Arcadio velye titir papik inde Fernanda is Ursula al gorad. Kan imwalava zo kumzilipir, sedme verteem is vexeem ke ujalova zo gaar ; ko ujatavexe az Roma zo stakser. Fernanda va Meme lasuturietavar : i va lorbafa is tavusafa is tselkotrunyusa yikya. Voxen daavafa is kireptafa tuwava ke yikya tecapafa gu gadikye askir da ina va Mauricio Babilonia listafe dodelikye korenar. Viele Fernanda va arienta kosmar, pune va yikye viceson awalketese volmiv balier ise va itupikya koe orikaf reak kobuder. Voxen sinafa zukeyena renara va oc nazbar : Aureliano kobudeteno gan Fernanda koe yasaxo ke Buendia. Tamava va mecoba ke velikye gruper isen bane ine va mecoba ke tamava gruper. Ant atrir, mivraveson tavur neke ba san-lerdda va xadolafa grupera di dir kore va rebava ke mona meviele al divlanir. Banugale Ursula griawir, i bocaf vrutasik va vanblira ke prostelay is wida. Viele Fernanda silukon awalker, pune yafo José Arcadio dimpir : miltel co govanpiyis papik, geltron va blira dem skaltafa klokara vebena gu veyilagisa setikera va Amaranta guazafa ziavikya nuyukon ugalayar. Va Aureliano doirubar voxe vligur kiren ino tir gasuik. Gan yon jotaf gruspes dositik tere di wizur. Bam Amaranta Ursula dim wida gin tigir. Kureyena gu belgikye, tir itupafa is blipisa is merokeldaskinon ankeafa. Va Buendia yasa djudimempar voxen inafa sugara di tid giopafa. Arti volokafa lyumara kev int, Aureliano va yikya brostar, megrupeson da ina tir ziavikya. Inafa idulunafa is veyilagisa tid keni tenafa tumuteskawera ke yasaxe vombene gan frunku is keraf mical. Nazbason va nazbeikye dem bulolaf ault, Meme awalker. Viele Aureliano arti tuizakas mielcek dimduntur, pune va alto ke pintik divbureno gan cottoraf mical tit aal wir, lize José Arcadio Buendia redusik va prostelay zo vaniksantuyur : bocaf Buendia bewik awalker lize taneik xonukeyer. Piza tir artefa : gelbeso koe mawa ke Melquiades edje suka baliesa va mona is wida evier, Aureliano va beksayan sanskritavaf nubasuteks tere lajubasbeksar : guazafe romanikye va bali ke Buendia yasa al abdikaliyir, is va bana decemda edje ugal va kendapa al nutazukar. Aureliano keni abdigadafo yasaxo griawir, antafo dum ambik. Dere rupel
|
| ||||||||||||||||
.svg){kind=icon}