David Copperfield (suterot)

Teliz mal Wikipedia.
Aller à la navigation Aller à la recherche
David Copperfield

Vildeks

David Copperfield titi nafalugal ke Victoria gazikya vagerone Engla koblir. Inafa koblira va inafi bali gu awalkedafa kueca nutcalar kiren in tir radimiawalkafe nazbeye : gadikye weti tevoy aksat abdi koblira mulufteyer. Mejiligason remi blirugal, in va gadikyefa vola uduton graceyesa di aneyar. Wori, rumeugal tir kalaf. Koe Blunderstone widavama blir, gaanon gan gadikya krenugon renasa is viunsunon gan yasafa kwikya, i gan vonafi is prantafi Peggotty. Antafa izgama koe trutca tir : ba koblira lana Betsey veyziavikya ko yasafa mona va int ganeyer aze welton zo nukantayar kiren nutikya va pintikye vols pintikya al nazbayar. Al mallaniyir kalison da mevielu gire di zo wiyir.

Lanviele Peggotty va David ko Yarmouth yasa malstar, i ko moltam varone patecta. Banlize inafa yasa blir. Mona tir divulafa : to totacewa trovgafa moe piluda tir. Rumeye va agralafa yasa ke kwikya rungruper : Pegotty W-ye onasik, is Ham Pegotty inafe jotafe nutikye, is moekote Emily listafa nutikya. David va kiewotaf tilderugal tiskir voxaze ko Blunderstone dimlapir lize inafa tamava su zo romplekur. Kiren gadikya al tolkurer. Kurenikye tir orikafe Murdstone W-ye mekrenugon is meagralon gigaase. Alpoz koe mona gan rumeik fure mea toz rokagaelar. Murdstone W-ye va David dace tazer ise ustar. In zo kevier nume tarler, talgason va nuba ke ficik. Ko stolese jandexe ke Salem House fordafa bema zauzenon zo stakser.

Bat grenyaf kizey vas flint lodam bema vektar. Kimtaf David zo yander ise zo sinkansar ise zo pluker nume tir volkalapaf. Do toloy palik soe tuluntar : Tommy Traddles is James Steerforth. Battel tir itupaf daavik is ronkaf dositik ; bantel tir listaf ise gan David zo mafelar. Voxen etseriafa ilkuca kake bana listuca va int palser. Warzafa nigera va David fure ker : renapana gadikya awalker, adre aytayana gan Murdstone W-ye. Bane ine pu David dakter da in re godzalwatar. Nume zo stakser ko London enide dene voremaxe di kobar lize va tirac afizcekon emar ise tucuar. David va warzaf dositik re kosmar : wawuca. Soe afimi koe bata orikafa trutca tir : David gan sintaafa yasa zo vistaler, i va Micawber. Yasokilik tir Micawber W-ye grupulvinyise is dise va moavafa takra, dum kurenya is nazbeikeem. David dene sin va lacuca ke ebava numen vadulucapa wal sin vonewer. Goxe batcoba jijansar kirneken Micawber W-ye tir dugakiraf vox gedijis va arienteem nume bat sintaik do varafa yasa nope boza fure zo koflintar.

Va tokcoba David gonaskir enide di moblir ? Va London djukubulur nume kal Dover mallanir lize Betsey ziavikya irubar. Gevason tove in mafenkur ise va tubronazbeara gorar, molikeson va vitcafe Murdstone. David koe fordaxo mea gokobar voxe va bema koe Canterbury gire denfir. Betsey ziavikya va nutye den Wickfield aluteik vistaler. Agnes nazbeikya ke Wickfield va David fure korenar. In va Uriah Heep unenik ke Wickfield dere rungruper, i va zijnodaf is dulkaf floyik vox dulkarsaf num volteldaf. Tire Heep va axuca ke Wickfield impavantar : bantel gilulir. Bat meteldaf unenik va gedira va ilput vion vox lanon adre narir.

Ugal tiskir azen David va Steerforth savsaf palik xuye kakever. Ko Yarmouth buiveyeson malstar enide in va Peggotty yasa di rungruper. Rietaja ! Banlize Steerforth va listafi vox foktafi Emily brostar, i va Emily fure kuresi va Ham, nume kobuiver enide sin belcon di yated. Ugalon gu Engla ke Victoria, mancoba en tir seltafa xonukalanzara. Soe sintaafe Pegotty W-ye va nutya djukukaaneyar. Batcoba jupar da va jontika coyunta di exuler. Arti konak aksat va Emily akolesi is jovleyeni tere katrasir.

David djuvanpir mwopik nume dene Spenlow W-ye pisidar. Va Dora inafa nazbeikya rungruper. David vanpir pulodaf ugaldik, trabe va atatcera dilizesa dene puloda ke London remsuter. Voxe co vanpir suterotik. Inafa ugafa debala tukiewawer nume va Betsey ziavya rawayana gan nistura ke Heep rogreler. To banugale va Dora kurer voxe goxe di laredjar kiren ina va ebava me rodegedir. Bata mempesa meblodikya me tir exomik vols rumeayik baninde djumaskipen. David tere trobindar nume va ina entisa malnaler.

Blira va Micawber W-ye is Traddles daavikye mo kelda ke David gire plekur. Micawber va murkuca ke krizaf Uriah Heep koflintayan nope rotceliara pu David razdar. Betsey ziavikya va intafa tufa rodimdigir ! Voxen koe blira ke David, kaluca va inkera meviele ugalir. Jotafa kurenya mulufter azisen Ham Peggotty nik xonuker, takrelon greleson va bopelanik. Ba pilkomodara va awalkoda kottan zo akoyer : to Steerforth.

Wori, to bocafa piza ke bata rupa tid. Micawber yasa ko Australia djukudivlamar lize Micawber W-ye di tutrigawer nume va vieleaf beg ke yasa di tumusar. Peggotty W-ye is Emily ko arkum va sin dositad. David va rena ke Agnes Wickfield luxeon kosmar nume kurer. Tere tir kalik is trigaf suterotik.

Yunkeks va berpot

Dere rupel

David Copperfield
Open book nae 02.svg
XANTO
Vergumvelt David Copperfield
Sutesik Charles Dickens
Ava Englava
Suterotinda Berpot
Evla 1849
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Moek ke xantofa piskura, 1849