|
Balemlenteem
Lenopa icde ayafa stuva remi toloya kunda
Balemlenteem tir francavaf berpot ke Yurani Andergan sanegayan bak 2010. To glupafa izvafa lenopa dilizesa remi mon toloya kunda tir, i tacukafa ayafa stuva edje va ugal katicfit, onkason va yon ambik kagluyan gan yon bulaf balemlent dem namiks xantaxanton veyziliyin is sagon deayan is grupes da sin tid xantaza ke izvaki ke tamava is lamese sanepe.
Dre
Berpot vas 36 luz ( yoltan gu sokta ) ruldar, lospan koe baroy tum, i va kota mukasa va solwifa neva ta dovafa piskura :
1-eafa koyara : Lava is gael is uga is tey ( 12 sokta )
- 1-eafa sokta : Sabrina / Tahiti, Moorea, Marquises (Nuku-Hiva), Hawaii. 2008.
- 2-eafa sokta : Nicolas / Paris (Franca), 1407.
- 3-eafa sokta : Catzahuatl / Tenochtitlan, kelu ke Azteca gindaxo, 1432.
- 4-eafa sokta : Akakuhe / Aotearoa, geeewala, 1312.
- 5-eafa sokta : Kutavai / Nuku Hiva, Hakaui krant, weti mon 900 tanda.
- 6-eafa sokta : Tapahina / Geefa krimta ke Perua, weti mon 900 tanda.
- 7-eafa sokta : Raupaniu / Rapanui, weti mon 900 tanda.
- 8-eafa sokta : Ratiavato / Refa Madagasikara, lentefa krimta, weti mon 1630 tanda.
- 9-eafa sokta : Hinatea / Nuku Hiva, Hakaui krant, moni 120-e ilana ke kristevafa jara.
- 10-eafa sokta : Akateani / Samoa, Savai'i ewala, moni 40-e ilana ke kristevafa jara.
- 11-eafa sokta : Itxabay Anki / Refa Guatemala, Maya gola, weti 2356 tanda.
- 12-eafa sokta : Xotxicatzal / Danipaguatxe (Monte Albán), Zapoteka gola, weti 2344 tanda.
2-eafa koyara : Ilsetikera ik setikera is namira ( 13 sokta )
- 13-eafa sokta : Gonoa / Tite ref Emi Kusi merunkaf tculk koe Tibesti fluvor, weti mon 3000 tanda, ugale Saxara men vanpiyir letaxocko ke reugal.
- 14-eafa sokta : Zankan / Idjon ice azekexa iste refa Nigeria, kovda ke Nok diref seltay, radimi 15 tanda.
- 15-eafa sokta : Akavai / New Hanover ewala, Papuaniuginea, 2008.
- 16-eafa sokta : Teavai / Sulawesi ewala (refa Indonesia), geefa dega, weti mon 3750 tanda.
- 17-eafa sokta : Koias Malateios / Refa Malta ewala (Mediterranea Bira), weti mon 4000 tanda.
- 18-eafa sokta : Koias Geios / Khrateia (refi Kriti ewala), Knossos berma, weti mon 4000 tanda.
- 19-eafa sokta : Koias ta Mari / Mari, savsavaf wid kene Eufratos, Mesopotamia, weti mon 4000 tanda.
- 20-eafa sokta : Koias Anaion / Mone Don bost, koe rijust ke refa geefa Rossia, weti mon 4000 tanda.
- 21-eafa sokta : Itaka / Aomori, valente Honshu ewala (Nipona), 2008.
- 22-eafa sokta : Agwade Key / Kengee refa Tana uzda ( azekexa ke Ityopia), weti 2500 tanda abdi kristevafa jara.
- 23-eafa sokta : Agwade Geracha / Kengee refa Tana uzda ( azekexa ke Ityopia), radimi tolda.
- 24-eafa sokta : Agwade Teyem / Kengee refa Tana uzda ( azekexa ke Ityopia), radimi gire tolda.
- 25-eafa sokta : Agwade Tekur / Kengee refa Tana uzda ( azekexa ke Ityopia), radimi ware abica tanda.
3-eafa koyara : Yona bula isu ambik ( 11 sokta )
- 26-eafa sokta : Hina Rumi / Taiwana, geronefa krimta, weti 5000 tanda.
- 27-eafa sokta : Inya / Sinia, geefa krimta, weti 8000 tanda.
- 28-eafa sokta : Nayan is Skayna / Refa Tcerna bira, getaltefa krimta, weti 8000 tanda.
- 29-eafa sokta : Omayra / Refa Kolombia, Nevado del Ruiz gola, weti 8000 tanda.
- 30-eafa sokta : Bat-cue / Refa Kanada, Calgary gola, weti 12000 tanda.
- 31-eafa sokta : Verintuva / Rossiafa sumetaltefa gola. Pereaksat ke 2008.
- 32-eafa sokta : Tamaya / Refa Mongola, Arhangay rijustxo, weti 19500 tanda. Tanoy vielcek koe blira ke ayikya.
- 33-eafa sokta : Tameik / Refa Sakartvela, geefa Kavkaza, weti toloya kunda. Ana bocafa yovara.
- 34-eafa sokta : Lorik
- 35-eafa sokta : Teyas
- 36-eafa sokta : Kudafay
| Isen batcoba tiyir lana migaca ke inye : aliera va inya az estura az boera az kenibera.
— 7-eafa sokta : Raupaniu |
Sebuks
To taneatomon vudimes is rwaltes berpot tir. Kota sokta kle tir tanoya rupa, i tanafa stuva batinde gobelina. Rustonaf is kireptaf martig laninde pulotaf nek fetintekiraf, is pwadesa ekamuca askisa va rundapa gu kodororara is pilkomara, is vetcoyerapa va tawavopafa is izvafa is avopafa is arayafa xuta is kasuca ke bifeem. Kota warzafa sokta tir kojoara, darkarusa is ugalarusa is tire kan betara va koredik. Bata 36 sokta tid teca 36 recela ke lana koafisa kelda.
| Enlebafa, inafa listuca kev iteem ke Kelt sizuntayar ise va yotaf lorikeem pitcas va inafa lubera ape tudagayar. Jonkaf iteem male temba ik toeem dizveyed. To divulafa nakila ke awalkolikya enbudasa va vura ke tamava, i adrefa kroguca ke furefa tena ke ugalboca.
— 11-eafa sokta : Itxabay Anki |
Berpot va vergumvelt gu balemlent narar, i gu meroatalena is kotunafa « diolafa » akama deayanon dadina gan gradilik. Balemlent tid tan kerafem ke berpot voxen va sinafa ageltafa sugdala isu yordara oxam adre vangrupet. Deayan gan ayikya, va yona lekeaca lantode « grurazdad » voxe koe ayikyefa nuba anton tid lecafa xacka tugorayana ton gaderopafa ik alkafa favera. Ar kerafem gan tculkafa vundopa zo kotadler, i gan teca axofera dositayasa va koyara ke yone lamase sanepe, i va koyara tisa xutadetce ke stuva kali tenule vas ekwa.
Berpot en tir lipek dem ki va sint volkenon kseasi, kotraf gu sledaja milinde bal rawopafa joxara lana pakafa ik roklanafa remtrakura jontikviele rotid, neken belisik va gijarotifa sapuca avlakavlakon remwir. Suyafa watsa gepoytesa dum merotacagina ora tir tela ke dofi nami, i remzilis stravok is iltazukara is dantera is dimponara va ini, is nazbal ke zabdus vundap vey sane, i ke vund deayan gan ant ewuca. Isen kore sutesik va fiaera va alaake puvegur, pune va giltafa pulukafa vundopafa vuestera is seltay altogis va sutena remgrupera ik cugexuca cugeke brayton afanar. Batinde to entanuskaf berpot tir, kotraf gu tixolafa grupeluca luntafa gu « izviskafe » sane. Va polinesiaf totasik voxis abdikolombaf korackik ok lanisik ke afrikafa meila az abdiizvaf ambik drikon pilkomat.
| Numen, ekap ke saneeem is izva nope yona rotuxara ik ayafa corasa golara jontikviele turunkaweyed, lorik is volwica vol tiyid neki. Ayafe egale rotir anton tiyid danexa ke oviskuca ik grolera ke abictan, rodjine gan mek lorik. Oretlik koe kot tisik rosokeyer, koe okilik moekote. Kevon sin va aliuca gokalfiyid, aytason va krapol vols umbeteson va ayik, kosmason va divulafe sane iku divefe is tusagason vols intotcon flaydutuson, vulkuson va Boonsyat tucuisatason va inya num lokiewon katrasitison.
— 14-eafa sokta : Zankan |
Ton ara benelaca, berpot va ayikyaf sodjey dovoron ikatcur. Lolistaf koredik tid ayikya, dile folvafa nek kottode dadisa va lana elupkuca is deasa va meugalafa is dofa voda. Sutesik va savsaf ayikyarotif selt satcon fitcon konakilar. Tulon tana sokta tir lize va lan selt kosmat lize ayikya va nazbeuca gubirgad nume va lecafi rotipi dadid, i va roti levlyumani gan lan « gertik » djukuvanpilkas va bata grupera. Ison lojadion, ant abictanya va ambafa grupera jiligansason dadid, i va grupera dimzilina bal ejadesa fruga kan lana birgafa ava.
Edetire kota sokta me tid suteroton milvwafa numen konaka di conyutansad. Soe nekev 1200 bu me arga mei abrotcacarsa tid isen belca laumason lulanon zo belir darpeda belisik sonker da kene tec namifum tigir voxisen coba banvieli awisa ton tcastafa is meruptesa stuva va varafa tanuca soye razdar ise va wira va cugunaykaf savsaf vox vulkuyun nazbal levfenkur. Voxisen va cug yolt ke gradilik medjuposetiket kiren lo bat tid merotiyan neken sinafa videna ewava tir merofolinon cufa. Djasta ke sutesik tir guyundera kan veyordaf koredik. Batkane lo decemoy gradilik tere anton tid abica sokisafa ordaca, tufetinteasa va veyzilis stravok is doca remi oxileem.
| « Neken gonotrakú da va deayan konoleks lorkat, i va konoleks jontikedje guspayan gan ambikeem ika cuga olkafa is dofa mejera. Voxen min, minafa ketsuca, minyona vodaja, minafa volwalnafa axofera va wituca, van groya ton fansilesise kalie va min guoted. Rotir minafa katca tici joya tigir ? ».
— 36-eafa sokta : Kudafay |
Arti nega ba Neandertal ugal, pestalet da kenda va minaf rekeugal voxisu direkeugal vawalplekur. Balemlenteem tir jonkaf berpot dem tselka lize tacuke, ok diolafe geltre sedme torigira ke sutesik, va klabaf lum ke ageltuca gu ewafa prostewa icde remzilira va vund is lekeugal krister. To undera va ambafa rodapa is inafa gesiabliuca do tuwava tir.
Savera va Kotava
Koe berpot, Kotava tir ava co uyuna gan neandertalikeem is birgon veyziliyina pu xantoceem remi jontika oxila is kievotena gan konaka gradilikya ton yona abrotcifa dankamodovara ( chansonge ) iku riadu ( malkotavaks ton notraks ke berpot ).
Dere rupel
|
|
.svg){kind=icon}