Aristofanes

Teliz mal Wikipedia.
Aristofanes
-445 - -386
Savsaf ellasavaf suterotik

Aristofanes tir ellasaf buskaf ezlopik kobliyis moni -445 koe Kidatinaos koe Atina gola.

In va tawadayafi saneroti nupasuyur, tsunes va widavafe sokasane ba Peloponnisos geja. Aristofanes tir kategirevamaf : sagaf gu prostewa, va yona voda dum dili is proyuca is ronjuca lodam warzarieteem galbun gan yon trakopik etrakfamaf gu saref nalen lidot rojur. Gaderopon, me klabur da kotviele rokla zo raplekud va Atinaafi saneroti dilfur. Inafa rietava, kaatoeyena gan Atina bak medaf gejeem is Maraton, askir da tir kotabaf kevelik va kota gaderopafa ik lidafa ik alkafa ik yona suterotafa warzaca. Batdume intafa volmalyafa dilfura va Sokrates tumilan do "sofievikeem" is ke dan swavuca zo rotuldiner, ik va Euripides folvaf ezlopik pu dan olukafa opeluca ke abdiikeem zo culimer.

In koe Aigina ewala va tawayap nudigiyir.

In va savsafa buska, va wigarinda va taneon gaderopaf tandabifeem dem tizafa ilkafa dilfura is duskafa ozara, donon volar. Dum koe ellasafa folva lize koredik ton salma ik zveri ik vebra ikz- zo efud, tama, ont dankason va parabasis istefi nyabacakipi ont belcekaweson ko tegira ont adim rontion gukoeson va disukesik, va benelafa yorda zirser.

Grabom ke Aristofanes vas 44 buska zirseyena wali -427 is -390 ruldayar ; anton san-tanoya varafa al kalion artfid. Aristofanes va kotcoba is kizeyeem is yona gaderopaca is yon pilkovik is sokikeem is dere lorikeem gevanon laoon kodilfur.

In va baroy nazbeik dikiyir : va Filetairos vanpitis buskezlik isu Araros isu Nikostratos.

Bak -427 Oy Daitaleis ( Yon lorotasik ) taneafa wenyaxa va toleafo poradro war. Koe bat taneaf suterot Aristofanes awir dum en tir : va toloy yik koeon ralentason : va gruspenaf is ponkaf gu saref trakopaceem kontol, is ceakaf is sagaf gu prostewaf lidavodeem artol. Remay ke Nefelay buska koeon ixam zo lorder.

Axarneis ( Yon axarneik ) bareafa buska is taneafa kiewatca lanon tid -425 evlafa. Bata wenyaxa wastesa va dimdilira koe Atina bam kobodapasa do Sparte tiyir davafa kiewatca is geltrafa buskafa klepatoza.

Ippeis ( Yon okoldik, -424 ) buska, kev Kleon caprik pu in va arpeo nazbar, lize buntuyunon icde stibera va wideyarokeem volgunon di kagrupeyer.

Koe Nefelay ( Yon suray, -423 ) buska, in va trakopa ke Sokrates nedin ton tel lowupef sofievik balger. Bata wenyaxa va vidjesuca ke Platon godevrik ke Sokrates pu in vodayar. Battan naleyer da in va asklibura va inaf feliik sanegon zilison icde in va ewavaja al webeyer.

Koe Irene ( Dili, -421 ) is Lisistrate (-411), yona alutara ta dili, in va pakoikeem gu Peloponnisos geja vilatana va Atina vinter.

Sfenes ( Yona vebra, -422 ) buska va akoyduca ke Atinaafe sane, malyeson is iskedason va zolonaceem ugalzese, ranker.

Batraxoy ( Yona salma, -405 ) wenyaxa kev Euripides zo vodjur. Euripides ke dan folva, kevie telyona ke Aisxulos, va griva is lidopa gruspeyed.

Koe Ornites ( Yoni zveri, -414 ), va rietavaf wid kolnayan wale kelt is sid gan yoni zveri lize me tid gaderopafa rotoda ke tawavaf wid ise vansara pu lorikeem anton kredon zo nover, in gestar.

Eklesiadusay ( Pirdot ke yona ayikya, -392 ) tir malyopara va yona doevafa is ayikyevafa rietova tuurmana gan sofievikeem.

Ploutos ( -388 ) va solovuca ke dimziliwalera va kulaceem funten koe Atina nedir. In moni -386 AGJ awalker.

Aristofanes

Aristofanes

 Koblira  moni -445,
 Kidatinaos, Atina gola
 Awalkera  moni -386,
 ? Atina
 Vedeyot  Atina
 Ava  Ellasava
 Suterind  Wenya
  Suterot 
  • Οι Δαιταλείς – Oy Daitaleis (-427) – Yon lorotasik
  • Οι βαβυλώνιοι – Oy Babilonioy (-426) – Yon babilonik
  • Aχαρνεις - Axarneis (-425) - Yon axarneik
  • ιππεις - Ippeis (-424) - Yon okoldik
  • Νεφέλαι - Nefelay (-423) - Yon suray
  • Σφνκες - Sfenes (-422) - Yona vebra
  • Ειρήνη - Irene (-421) - Dili
  • Oνιθες - Ornites (-414) - Yoni zveri
  • Λυσιστράτη - Lisistrate (-411)
  • Τα Δημήτρια – Ta Dimitria (-411) – Kapa Ke Dimitria
  • θεσμοφοριάζουσαι - Tesmoforiadusay (-411)
  • Βάτραχοι - Batraxoy (-405) - Yona salma
  • Eκκλησιάζουσαι – Eklesiadusay (-392) – Pirdot ke yona ayikya
  • Πλουτος - Ploutos (-388)
  Tuveli icde Suteroteem